ភោជនីយដ្ឋាន « អិនប្រាំបី» ៣ថ្ងៃមុនឆេះម្តងរួចហើយលើកនេះឆេះជាលើកទី២
- ភ្នំពេញ
រាជធានីភ្នំពេញ ៖ អណ្តាតភ្លើងបានឆាបឆេះបំផ្លាញភោជនីយដ្ឋាន « អិនប្រាំបី»ឆេះជាលើកទី២ អស់បន្ទប់មួយដែលមានទំហំ ៤ x ៨ ម៉ែត្រ…
រាជធានីភ្នំពេញ ៖ អណ្តាតភ្លើងបានឆាបឆេះបំផ្លាញភោជនីយដ្ឋាន « អិនប្រាំបី»ឆេះជាលើកទី២ អស់បន្ទប់មួយដែលមានទំហំ ៤ x ៨ ម៉ែត្រ រួមទាំងសម្ភារៈប្រើប្រាស់ខាងក្នុងមួយចំនួន ទៀតខ្ទេចអស់គ្មានសល់ ដែលបានបង្កអោយមានការភ្ញាក់ផ្អើលយ៉ាងខ្លាំង ទៅដល់កម្លាំងមានសមត្ថកិច្ចមូលដ្ឋាន និងរថយន្តពន្លត់អគ្គីភ័យជិត ៣៨គ្រឿងចុះមកជួយធ្វើអន្តរាគមន៍បាញ់ទឹក ពន្លត់បានទាន់ពេលវេលា ។
ដោយកាលពី ៣ថ្ងៃមុន ភោជនីយដ្ឋាននេះ ក៏ត្រូវបានភ្លើងឆេះផ្នែកដំបូលខាងលើម្តងរួចមកហើយ ដោយសារតែក្រុមជាងផ្សារខ្ទាតធ្លាក់កម្ទេចកម្ទីធូបបង្កជាអគ្គីភ័យម្តងរួចមកហើយ និងត្រូវបានជួយពន្លត់បាន លុះមកដល់ពេលនេះ ក៏ផ្តើមឡើងដោយសារតែការធ្វេសប្រហែសរបស់ក្រុមជាងដែកផ្សារដូចគ្នាកើតឡើងជាថ្មីម្តងទៀតផងដែរ ។
ករណីនេះដែរបានកើតឡើងកាលពីវេលាម៉ោង ១១ និង ២០នាទីព្រឹក ថ្ងៃទី២៦ ខែកញ្ញា ឆ្នាំ ២០២០ នៅចំណុចភោជនីយដ្ឋាន«អិនប្រាំបី» ស្ថិតនៅផ្លូវព្រះមុនីរ៉េត កែងផ្លូវ២៨៦ ក្នុងសង្កាត់ទួលស្វាយព្រៃទី២ ខណ្ឌបឹងកេងកង ។
តាមប្រភពព័ត៌មាននគរបាលពន្លត់អគ្គីភ័យបានប្រាប់ឱ្យដឹងថា ម្ចាស់ភោជនីយដ្ឋានដែលត្រូវបានភ្លើងឆេះខាងលើ មានម្ចាស់ឈ្មោះ Lim Kian Wei Desmond ភេទប្រុស អាយុ៣៥ឆ្នាំ ជនជាតិសិង្ហបូរី មុខរបរម្ចាស់ភោជនីយដ្ឋានយីហោ «អិន ប្រាំបី» ។
មុនពែលកើតហេតុ ខាងភោជនីយដ្ឋានបានអោយក្រុមជាងដែកមួយក្រុមមកធ្វើការផ្សារជួសជុលភោជនីយដ្ឋានរបស់ខ្លួន ដោយពីមុនវាជាក្លិបកម្សាន្តដែលបានបិទអាជីវកម្មក្នុងអំឡុងពេលផ្ទុះកើតជំងឺកូវីត ១៩ អស់រយៈពេលជាច្រើនខែមក ហើយកន្លងមកហើយនោះ។
តាមប្រភពដដែលបានប្រាប់បន្តទៀតថា ដោយសារតែរាជរដ្ឋាភិបាលមានវិធានការ ទប់ស្កាត់ ការរីករាលដាលនូវជំងឺកូវីត១៩ តម្រូវអោយបិទគ្រប់ងាជីវកម្មក្លឹបកំសាន្ត និង ខារ៉ាអូខេនោះ ទើបមម្ចាស់ហៅជាងអោយមកធ្វើការជួសជុលកែប្រែពីក្លិបទៅជាភោជនីយដ្ឋានវិញ ហើយក៏ស្រាប់តែខ្ទាតធ្លាក់កម្ទេចកម្ទីភ្លើងធូបទៅចំលើពូក អេប៉ុង បង្ករអោយឆាបឆេះយ៉ាងសន្ធោសន្ធៅ និងផ្សែងខ្មៅហុយទ្រលោមឡើងតែម្តង ។
ភ្លាមនោះក៏បង្កអោយមានការភ្ញាក់ផ្អើលយ៉ាងខ្លាំងទៅដល់អ្នករស់នៅក្បែរខាង និងកម្លាំងមានសមត្ថកិច្ចមូលដ្ឋានខណ្ឌបឹងកេងកង និងរថយន្តពន្លត់អគ្គីភ័យមកពីគ្រប់បណ្តាអង្គភាពជាច្រើនរហូតទៅដល់ជិត ៤០គ្រឿង ចុះមកជួយធ្វើអន្តរាគមន៍បាញ់ទឹកពន្លត់បានទាន់ពេលវេលា និង មិនឆេះរីករាលដាលទៅដល់ផ្ទះរបស់បងប្អូនប្រជាពលរដ្ឋនៅក្បែរខាងបាន ។ ដោយក្នុងនោះមានរថយន្តពន្លត់អគ្គីភ័យរបស់អង្គភាពនេះ ស្នងការនគរបាលរាជធានីភ្នំពេញចំនួន ២១គ្រឿង និងប្រើប្រាស់ទឹកបាញ់អស់សរុបរហូតទៅដល់ចំនួន ៥៩ រថយន្តទើបគ្រប់គ្រងសភាពការបានទាំងស្រុង ។
ក្នុងករណីអគ្គីភ័យឆេះភោជនីយដ្ឋានយីហោ «អិន ប្រាំបី» ជាងលើកទី២នេះដែរ គឺបានឆេះបំផ្លាញអស់បន្ទប់ដែល មាន ទំហំ ៤ x ៨ម៉ែត្រ ខ្ទេចអស់ទាំងស្រុងគ្មានសល់ រួមទាំងសម្ភារៈប្រើប្រាស់ខាងក្នុងមួយចំនួនទៀតផង ដោយមានរថយន្តពន្លត់ មកពីតាមបណ្តារអង្គភាពជាច្រើនចុះមកជួយធ្វើអន្តរាគមន៍បាញ់ទឹកពន្លត់ទើបធ្វើអោយភ្លើងរលត់ទៅបាននៅម៉ោង ១ ថ្ងៃត្រង់ ថ្ងៃដដែលនេះ និងមិនបានបង្ករអោយមនុស្សណាម្នាក់រងគ្រោះថ្នាក់ឡើយ ៕
ចែករំលែកព័តមាននេះ