រាជធានីភ្នំពេញ ៖ រយៈពេលជាច្រើនសប្ដាហ៍មកហើយ សង្វៀនប្រដាល់របស់ស្ថានីយទូរទស្សន៍អាស៊ីអាគ្នេយ៍ និងប៉ុស្តិ៍លេខ៥ បន្តបិទចោលការប្រដាល់របស់ខ្លួនទាំងស្រុង ក្នុងពេលកន្លងមក សង្វៀនទាំងពីរក៏មានសក្តានុពលក្នុងការលើកស្ទួយវិស័យប្រដាល់ផងដែរនោះ ។ យ៉ាងណាក៏ដោយ…
រាជធានីភ្នំពេញ ៖ រយៈពេលជាច្រើនសប្ដាហ៍មកហើយ សង្វៀនប្រដាល់របស់ស្ថានីយទូរទស្សន៍អាស៊ីអាគ្នេយ៍ និងប៉ុស្តិ៍លេខ៥ បន្តបិទចោលការប្រដាល់របស់ខ្លួនទាំងស្រុង ក្នុងពេលកន្លងមក សង្វៀនទាំងពីរក៏មានសក្តានុពលក្នុងការលើកស្ទួយវិស័យប្រដាល់ផងដែរនោះ ។ យ៉ាងណាក៏ដោយ ក្នុងចំណោមសង្វៀនដែលបានដួលសន្លប់ទាំងពីរ សង្វៀនប៉ុស្តិ៍លេខ៥ បានក្រោកឈររួច ដោយបានប្រកាសបើកឡើងវិញនៅថ្ងៃសៅរ៍ទី២៩ សីហា ឆ្នាំ២០២០ ស្អែកនេះ ។ មន្ត្រីស្ថាប័ននេះ ក៏អះអាងថា នឹងដំណើរការមួយសង្វៀនទៀតសម្រាប់ថ្ងៃអាទិត្យផងដែរ ដោយគ្រាន់តែមិនទាន់កំណត់ថ្ងៃ ។ ជាមួយនឹងការប្រកាសនេះ បានបង្ហាញយ៉ាងច្បាស់ថា ប៉ុស្តិ៍អាស៊ីអាគ្នេយ៍នៅតែបន្តបិទទ្វារដោយសារតែហេតុផលស្ពុនស័រ។
អ្នកនាង ដាឡែន មន្ត្រីទំនាក់ទំនងផ្នែកព័ត៌មាន បានអះអាងថា ស្ថាប័នប៉ុស្តិ៍លេខ៥ នឹងដំណើរការបើកប្រដាល់របស់ខ្លួនជាថ្មីឡើងវិញហើយ ដោយការប្រកួតលើកនេះ គឺនៅតែជាការប្រកួតជ្រើសរើសជើងឯកដូចមុនដដែល។
អ្នកនាងថា ការប្រកួតលើកនេះ មិនប្រើរូបមន្ត៣២នាក់ជម្រុះយកតែម្នាក់ដូចមុននោះទេ គឺប្រើរូបមន្តជម្រុះក្នុងចំណោម១៦នាក់វិញម្ដង ដោយសារតែអំឡុងកូវីដ-១៩ ពិបាកក្នុងការស្វែងរកកីឡាករដែលមានសមាសភាពប៉ុនគ្នាឱ្យចូលប្រកួត ។ អ្នកនាងថា ការប្រកួតលើកនេះ គឺជាតម្រូវការចង់បានរបស់ស្ពុនស័រដោយប៉ុស្តិ៍លេខ៥ នឹងដំណើរការលែងផ្អាកទៀតហើយ បើទោះជាបញ្ហាកូវីដ-១៩ នៅតែជាឧបសគ្គនៅឡើយក្ដី ។
អ្នកនាងបន្តថា ការបើកប្រកួតជាថ្មី គឺចាប់ផ្ដើមនៅថ្ងៃទី២៩ សីហា នេះតែម្ដង ខណៈដែលកម្មវិធីប្រកួតសម្រាប់ថ្ងៃអាទិត្យ ក៏នឹងចាប់ផ្ដើមក្នុងពេលខាងមុខផងដែរ ពោលគឺបន្ទាប់ពីការចរចាជាមួយនឹងដៃគូស្ពុនស័រសម្រេចរួចរាល់ ។ អ្នកនាងថា ការប្រកួតជាថ្មីនេះ មានការរំពឹងថា នឹងទទួលបាននូវការចាប់អារម្មណ៍ ខណៈដែលស្ថានភាពកូវីដ-១៩ រាងស្ងប់ស្ងាត់បន្តិចផង។
នាពេលកន្លងមក លោក សេង កដិកា អ្នករៀបចំកម្មវិធីប្រដាល់ ធ្លាប់អះអាងថា ស្ថាប័នរបស់លោកសម្រេចចិត្តបិទចោលការប្រកួត ដោយសារតែហេតុផលស្ពុនស័រ និងស្វែងរកកីឡាករមកប្រកួតនៅក្នុងប្រភេទទម្ងន់ថ្មីមិនទាន់គ្រប់ ។ លោកថា អ្នកខ្លះទៅស្រុក ហើយអ្នកខ្លះមិនទាន់ចូលក្លិប ធ្វើឱ្យការជ្រើសរើសកីឡាករដើម្បីប្រកួតរដូវកាលថ្មី នៅតែមិនស្រួលដូចមុន។
លោកថា ការបិទទ្វារជាថ្មីនេះ ពិតជាប៉ះពាល់គ្រប់ផ្នែកដែលពាក់ព័ន្ធនឹងវិស័យប្រដាល់ទាំងអស់ តែលោកថាធ្វើម៉េចបើនេះគឺជាបញ្ហារបស់ពិភពលោក ហើយប៉ុស្តិ៍លេខ៥ ក៏មិនចង់បើកប្រកួតក្នុងភាពស្ងប់ស្ងាត់ផងដែរ ទើបសុខចិត្តសម្ងំសិន ។ ទំនងជាមូលហេតុនេះហើយទើបរូបមន្តក្នុងការបើកប្រកួតជាថ្មី ត្រូវបានប្ដូរពី៣២នាក់ មកត្រឹម១៦នាក់ ។ លោកថា ការប្រកួតនឹងមិនល្អមើលនោះទេ ខណៈដែលកីឡាករក៏មិនប្រកួតអស់ដៃ ដោយសារតែហេតុផលគ្មានអ្នកទស្សនា។ ប៉ុន្តែជាមួយនឹងការបើកដំណើរការឡើងវិញនេះ លោកថា ប៉ុស្តិ៍លេខ៥ នឹងរៀបចំឱ្យពួកគេប្រកួតអស់ដៃ។
ងាកទៅលោក ញាណ សុធី អ្នករៀបចំកម្មវិធីប្រដាល់ប្រចាំទូរទស្សន៍អាស៊ីអាគ្នេយ៍ វិញ លោកនៅតែអះអាងថា ស្ថាប័នរបស់លោក នឹងបន្តបិទទ្វារ មិនដឹងពេលណាទើបអាចដំណើរការវិញនោះទេ ដោយលោកបោះពាក្យថា ទំនងជារហូតដល់ចប់កូវីដ-១៩ ហើយមានការបើកទ្វារឱ្យអ្នកគាំទ្របានចូលទស្សនាឡើងវិញ។
លោកថា ហេតុផលគឺការរៀបចំកាលពីមួយរយៈពេលមុន គឺនៅតែមិនទាន់ល្អនៅឡើយ ទើបលោកបន្តបិទទ្វារ ។ យ៉ាងណាមិញមានការបង្ហើបថា ហេតុផលសំខាន់គឺដោយសារតែស្ថាប័នរកស្ពុនស័រដើម្បីរៀបចំមិនទាន់បានប៉ុណ្ណោះ ខណៈដែលស្ថាប័នក៏ចង់ដំណើរការដែរ ប៉ុន្តែដំណើរការទៅមិនរួច ។ ការបញ្ជាក់នេះ ស្របពេលដែលសង្វៀនផ្សេងបែរជាមានលទ្ធភាពបង្កើតបន្ថែមនូវការប្រដាល់របស់ខ្លួន បើទោះជាចំហាយកូវីដ-១៩នៅតែវាយលុក។
នៅសង្វៀនCNC និង CTN ដំណើរការរហូតដល់ទៅ៥សង្វៀន ខណៈដែលសង្វៀនបាយ័ន និង PNN ក៏បង្កើន ហើយមើលទៅរឹងមាំទៀតផង ។ មុននេះ សង្វៀនបាយ័ន ទើបតែប្រកាសបើកមួយសង្វៀនបន្ថែមទៀត ទើបជាការចាប់អារម្មណ៍ ដែលសង្វៀនអាស៊ីអាគ្នេយ៍ ដែលមុនកូវីដ-១៩មានរហូតដល់៣សង្វៀន និងពេលខ្លះមានដល់៤សង្វៀន ស្រាប់តែបិទស្ងាត់ឈឹងបែបនេះ ។ យ៉ាងណាក៏ដោយលោកញាណ សុធីថា កំពុងស្វះស្វែង ដោយអាចបើកមុនកូវីដ-១៩ចប់ទាំងស្រុង ឬអាចបើកវិញឆាប់ៗ៕
ចែករំលែកព័តមាននេះ