រាជធានីភ្នំពេញ ៖ ស្របពេលដែលតាមបណ្តាសាលារៀនទាំងអស់នៅទូទាំងប្រទេសកម្ពុជារបស់យើងត្រូវបានផ្អាកមួយរយៈក្នុងអំឡុងពេលផ្ទុះមានឡើងនូវជំងឺផ្លូវដង្ហើមកូវីដ ១៩ នោះ រយៈពេលប្រមាណជាជាង ៣ខែមកហើយ ធ្វើអោយអ្នកមានមុខរបរលក់ដូរនៅតាមសាលារៀនលក់មិនដាច់មិនមានសិស្សសាលាមកទិញដូចកាលពីពេលមុនឡើយ។
ជាក់ស្តែងសម្រាប់អ្នកលក់សៀវភៅ ប៊ិច និងឧបកណ៍សិក្សាផ្សេងៗ អ្នកលក់ភេសជ្ជៈ ប្រហិតចៀន នំចំណីផ្សេងៗ នៅខាងមុខសាលាវិទ្យាល័យ ទួលទំពូង បានធ្វើការត្អូញត្អែថា «តាំងពីសាលារៀនបិទទ្វារផ្អាករៀន ដោយសារតែជំងឺកូវីដ ១៩ មកក្នុងរយៈពេលជាង៣ខែមកនេះ ការលក់ដូររបស់ពួកគាត់គ្មានអ្នកទិញ លក់មិនដាច់សោះ និងស្ទើរតែធ្លាក់ចុះដល់កំរិតសូន្យទៅហើយៗធ្វើអោយជីវភាពក៏កំពុងតែជួបការលំបាកយ៉ាងខ្លាំង»ផងដែរ។
ស្ត្រីវ័យ ៥៧ឆ្នាំ ជាអ្នកលក់ភេសជ្ជៈម្នាក់បានប្រាប់ឱ្យដឹងថា ចាប់តាំងពីសាលាបិទទ្វារផ្អាករៀនមកនេះ ដោយសារតែភ័យខ្លាចរឿងជំងឺកូវីដ ១៩នោះ ឃើញថា ការលក់ដូររបស់គាត់មានការធ្លាក់ចុះយ៉ាងខ្លាំង ដោយកាលពីមុនធ្លាប់លក់បានលុយក្នុងមួយថ្ងៃចាប់ពី ១០ ទៅ ២០ម៉ឺមនរៀល តែមួយយរយៈនេះក្នុងមួយថ្ងៃមានការធ្លាក់ចុះខ្លាំង មកនៅត្រឹមតែមួយថ្ងៃពី ២ ទៅ ៣ម៉ឺនរៀលប៉ុណ្ណោះ។
កាលពីសាលារៀននៅបើកសិស្សនៅរៀន គឺការលក់ដូរមានការលក់ដាច់ខ្លាំងទាំងខ្ញុំ និងអ្នកលក់ដូរដទៃផ្សេងៗទៀត លុះដល់ក្នុងមួយរយៈនេះខុសប្លែកពីពេលមុនៗឆ្ងាយណាស់ តាំងពីកើតមានជំងឺនេះកើតឡើងមកនោះ ។
កញ្ញា ស៊ុយ ស្រីខួច ជាអ្នកលក់សៀវភៅបានរៀនរាប់ប្រាប់ឱ្យដឹងថា ក្នុងអំឡុងពេលដែលផ្ទុះកើតមាននូវជំងឺកូវីដ ១៩ នេះ សាលាបានបិទទ្វារផ្អាកអត់រៀន ហើយក៏គ្មានកូនសិស្សមករកទិញសៀវភៅ ប៊ិច ឬក៏ឧបករណ៍រៀនសូត្រផ្សេងៗ ទៀត ដូចមុនដែរ ដោយមានតែអ្នកដំណើរតាមផ្លូវរកទិញនេះទិញនោះបន្តិចបន្ទួចប៉ុណ្ណោះ។
ការលក់ដូរឧបករណ៍សិក្សារបស់នាងពេលនេះដែរ គឺសង្ឃឹមលក់ដូរទៅលើតែកូនសិស្សមកទិញ តែបើមិនមានសិស្សមកទិញ តើមានអ្នកណា មកទិញរបស់របររបស់នាងទៀត? កញ្ញាក៏បានប្រាប់បន្តទៀតថា ក្រុមគ្រួសាររបស់នាងបានចាប់យកមុខរបរលក់សៀវភៅ ប៊ិច និង ឧបករណ៍ សិក្សាផ្សេងៗទៀតនៅខាងមុខសាលាវិទ្យាល័យទទួលទំពូងនេះអស់រយះពេលជាង ២០ឆ្នាំមក ពោលគឺតាំងពីម្តាយរបស់ នាងមកម្លេះ គឺអាចរកកម្រៃបានគ្រាន់ដោះស្រាយក្នុងជីវភាពបាន៕
ចែករំលែកព័តមាននេះ