រាជធានីភ្នំពេញ ៖ នាពេលថ្មីៗនេះតារាសម្តែងស្រីវ័យក្មេង សាឡាត់ ស្រីឡាង តាមរយៈការថតខ្សែភាពយន្តនានា បង្កើតកម្រងរូបភាពស្អាតៗ និងផ្អែមល្ហែមយ៉ាងរ៉ូមែនទិកជាមួយនឹងគូស្នេហ៍នៅលើកោះយ៉ាងមានក្តីសុខ ។
តារាសម្តែងស្រីរាងខ្ពស់ស្រឡះរូបនេះ បានបង្កើតក្តីស្រលាញ់ជាមួយនឹងបុរសម្នាក់ដែលធ្លាប់ល្បីជាសកម្មជន ជួយសង្គមមួយរូបគឺលោក សាន ដារ៉ាវីត ឬហៅក្រៅថា «ក្រុមយុវជនសំរាម» បានធ្វើឱ្យមហាជនងាកមកចាប់អារម្មណ៍ជាខ្លាំងទៅលើសកម្មភាពគូស្នេហ៍វ័យក្មេងមូយនេះ នាំឱ្យលប់បាត់នួវពាក្យចចាមអារ៉ាម ដែលនាងធ្លាប់មានស្នេហាកាលពីមុន ។
តាមរយៈរូបភាពផ្អែមល្អែមនៅលើកោះនោះ នាំឱ្យតារាស្រីវ័យ ២៥ឆ្នាំរូបនេះហាក់បានជួបនូវមនុស្សដែលខ្លួនស្រលាញ់យ៉ាងពិតប្រាកដ និងបានឃើញនូវស្នាមញញឹមជាច្រើន ដោយនាងបានបង្ហោះរូបភាព និងសរសេរសារយ៉ាងមានអត្តន័យនៅក្នុងបណ្តាញសង្គម Instagram ថា «ការជ្រើសរើស គឺសំខាន់ពីមុន ខ្ញុំបានជ្រើសរើសប្រគល់ស្ទើរគ្រប់យ៉ាងដែលជាក្ដីសុខរបស់ខ្ញុំឲ្យទៅមនុស្សផ្សេងក្រៅពីខ្លួនឯង….តែអ្វីដែលត្រឡប់មកវិញ គឺរបួសដែលឈឺ ទឹកភ្នែកដែលស្រក់ តែសម្រាប់ពេលនេះអ្វីដែលខ្ញុំរើសយក គឺក្ដីសុខរបស់ខ្លួនឯងស្រឡាញ់ខ្លួនឯងជាងអ្នកដទៃ…… បើសូម្បីតែខ្លួនយើង យើងមិនស្រឡាញ់ផង តើឲ្យអ្នកណាមកស្រឡាញ់យើង តែពេលនេះ ជីវិតពិតជាមានន័យ ទោះធ្វើការច្រើន តែក៏មានក្ដីសុខ ព្រោះបានឃើញស្នាមញញឹមពីមនុស្ស ដែលស្រឡាញ់ខ្ញុំ…» ។
យ៉ាងណាមិញ បន្ទាប់មានទំនាក់ទំនងស្នេហ៍ជាមួយលោក សាន ដារ៉ាវីត ដែលជាសកម្មជនរបស់ «ក្រុមយុវជនសំរាម» សាឡាត់ ស្រីឡាង ហាក់ដូចជាស្ងាត់នៅក្នុងទីផ្សារសិល្បៈមួយរយៈធំ ប៉ុន្តែបែរជាឃើញនាងមានសកម្មភាពជាច្រើនតាមរយៈការជួយសង្គម និងចូលរួមការអភិវឌ្ឍន៏សម្បត្តិធម្មជាតិនានា ដូចការចែកអំណោយ ដាំដើមឈើ និងការធ្វើជាវីដេអូអប់រំនៅក្នុងសង្គមផងដែរ ។
គួរបញ្ចាក់ផងដែរថា សាឡាត់ ស្រីឡាង មានឈ្មោះសំឡេងតាមរយៈផលិតកម្ម LD និងបានចូលរួមថតខ្សែភាពយន្តខ្នាតខ្លី និងខ្នាតវែងនានា ធ្វើឱ្យនាងទទួលបានការគាំទ្រជាច្រើនតាំងពីស្នាដៃលើកដំបូង និងការថតផ្សព្វផ្សាយផលិតផលជាដើម ៕
ចែករំលែកព័តមាននេះ