រាជធានីភ្នំពេញ៖ ជាថ្មីម្តងទៀតនាយករដ្ឋមន្ត្រីកម្ពុជាសម្តេចតេជោ ហ៊ុន សែន នៅព្រឹកថ្ងៃទី២៦ ខែមេសា ឆ្នាំ២០២០នេះ បានក្រើនរម្លឹកពលរដ្ឋកម្ពុជាថា ទោះបីជាកម្ពុជាពុំមានករណីឆ្លងជំងឺកូវីដ-១៩ ថ្មី…
រាជធានីភ្នំពេញ៖ ជាថ្មីម្តងទៀតនាយករដ្ឋមន្ត្រីកម្ពុជាសម្តេចតេជោ ហ៊ុន សែន នៅព្រឹកថ្ងៃទី២៦ ខែមេសា ឆ្នាំ២០២០នេះ បានក្រើនរម្លឹកពលរដ្ឋកម្ពុជាថា ទោះបីជាកម្ពុជាពុំមានករណីឆ្លងជំងឺកូវីដ-១៩ ថ្មី ហើយទោះបីជាកម្ពុជាយើងបានទទួលជំនួយវិជ្ជសាស្ត្រជាច្រើនពីប្រទេសចិនយ៉ាងណាក្តី តែមិនត្រូវធ្វេសប្រហែសឡើយ មិនអញ្ចឹងនឹងអាចប្រឈមមុខគ្រោះថ្នាក់ធ្ងន់ធ្ងរ ។
សម្តេចតេជោ ហ៊ុន សែន បានបង្ហោះសារនៅហ្វេសប៊ុកសម្តេចថា យើងត្រូវតែប្រុងប្រយ័ត្នជាមួយនឹងជំងឺឆ្លងកូវីដ-១៩គ្រប់ពេលជានិច្ច ។
សម្តេចបានបញ្ជាក់ថា «សូមបងប្អូនប្រជាពលរដ្ឋ ជាពិសេសយុវជន និងកូនក្មួយកម្មករ កម្មការិនី ត្រូវមានការប្រុងប្រយ័ត្នជាប់ជានិច្ចជាមួយនឹងជំងឺឆ្លងកូវីដ-១៩ ដ៏កាចសាហាវនេះ បើ់ទោះកម្ពុជាយើងបានទទួលជំនួយវិជ្ជសាស្ត្រជាច្រើនពីប្រទេសចិនយ៉ាងណាក្តី ហើយម្យ៉ាងវិញទៀត បើទោះបីមកទល់ថ្ងៃទី ២៦ មេសា នេះ មិនមានអ្នកកើតរោគកូវីដ-១៩ថ្មីទៀត ហើយចំនួនអ្នកព្យាបាលបានជាសះស្បើយបានកើនឡើងដល់ ១១៧នាក់ នៅសល់តែ៥នាក់ទៀតក្តី គឺបងប្អូនមិនត្រូវមើលស្រាលចំពោះជំងឺកូវីដ-១៩នេះដាច់ខាត» ។
សម្តេចនាយករដ្ឋមន្ត្រី បានបន្ថែមថា «ការមើលស្រាលនឹងមិនយកចិត្តទុកដាក់អំពីជំងឺនេះ គឺអាចប្រឈមនឹងការឆ្លងរោគដ៏គ្រោះថ្នាក់ខ្លាំងបំផុត» ។ សម្តេចបានរម្លឹកថា ថ្ងៃចុងសប្តាហ៍ ទោះបីសម្រាកនៅផ្ទះ ឬធ្វើដំណើរទីជិតឆ្ងាយ គឺត្រូវពាក់ម៉ាស ហើយមានទឹកអាល់កុល និងជែលសម្រាប់ដុសលាងសម្អាតដៃកម្ចាត់មេរោគអោយបានស្អាតល្អគ្រប់ពេល ដើម្បីចៀសវាងការចម្លងរោគកូរ៉ូណាពីម្នាក់ទៅម្នាក់ទៀត។
ទន្ទឹមនឹងនេះ គ្រប់គ្នាត្រូវតែមានអនាម័យល្អក្នុងការរស់នៅ ហើយចូលរួមអនុវត្តន៍តាមការណែនាំរបស់ក្រសួងសុខាភិបាល ដើម្បីបង្ការទប់ស្កាត់កុំអោយឆ្លងជំងឺកូវីដ-១៩នៅក្នុងសហគម និងក្នុងប្រទេសជាតិយើងទាំងមូល៕ (កែសម្រួលដោយ ៖ បុប្ផា)
ចែករំលែកព័តមាននេះ