រាជធានីភ្នំពេញ ៖ គម្រោងបោះផ្សាយលក់មូលបត្ររបស់ធនាគារអេស៊ីលីដានៅតែមានដំណើរជាធម្មតា មិនមានការប្រែប្រួលអ្វីឡើយ ទោះបីជាមានរាតត្បាតពីជំងឺកូវីដ១៩ក្ដី ។ រហូតមកដល់ពេលនេះ ធនាគារអេស៊ីលីដា ភីអិលស៊ី បានបញ្ចប់ដំណើរការកំណត់ថ្លៃភាគហ៊ុនហើយ…
រាជធានីភ្នំពេញ ៖ គម្រោងបោះផ្សាយលក់មូលបត្ររបស់ធនាគារអេស៊ីលីដានៅតែមានដំណើរជាធម្មតា មិនមានការប្រែប្រួលអ្វីឡើយ ទោះបីជាមានរាតត្បាតពីជំងឺកូវីដ១៩ក្ដី ។
រហូតមកដល់ពេលនេះ ធនាគារអេស៊ីលីដា ភីអិលស៊ី បានបញ្ចប់ដំណើរការកំណត់ថ្លៃភាគហ៊ុនហើយ ឬហៅថា ប៊ុកបៀលឌីង ។ ជំហ៊ានបន្ទាប់ធនាគារអេស៊ីលីដា កំពុងសហការជាមួយក្រុមហ៊ុនយាន់តា ស៊ីឃ្យួរីធី (ខេមបូឌា ) ភីអិលស៊ី ក្នុងការរៀបចំបែកចែកភាគហ៊ុន និងកំណត់ថ្លៃចុងក្រោយនៃភាគហ៊ុនរបស់ធនាគារដោយផ្អែកតាមនីតិវិធីស្ដីពីការធ្វើប៊ុកបៀលឌីង និងការធ្វើបរិវិសកម្ម ។ យ៉ាងណាលទ្ធផលផ្លូវការនៃការកំណត់ថ្លៃភាគហ៊ុននឹងត្រូវផ្សព្វផ្សាយជូនសាធារណជន បន្ទាប់ពីទទួលបានការអនុម័តពីគណៈកម្មការមូលបត្រកម្ពុជា ។
យោងតាមប្រសាសន៍លោក បណ្ឌិត អុិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី ថា វិនិយោគិនរូបវ័ន្តបុគ្គលជាង ២០០០ នាក់ បានចូលរួមនៅក្នុងដំណើរការកំណត់ថ្លៃភាគហ៊ុន (ប៊ុកបៀលឌីង) របស់ធនាគារអេស៊ីលីដា ។ នេះគឺជាជោគជ័យមួយរបស់ធនាគារ អេស៊ីលីដា ភីអិលស៊ី ដែលជាប្រជាធនាគារដែលលោកអ្នកជឿទុកចិត្ត និងជាធនាគារពាណិជ្ជទីមួយ ដែលនឹងចុះបញ្ជីនៅក្នុងក្រុមហ៊ុនផ្សារមូលបត្រកម្ពុជា។
នៅពេលដែលវិនិយោគិនរូបវ័ន្តបុគ្គលក្លាយជាភាគហ៊ុនិករបស់ធនាគារ រឹតតែធ្វើឲ្យយើងបង្កើនទំនាក់ទំនងយ៉ាងជិតស្និត និងកាន់តែរឹងមាំថែមទៀតជាមួយនឹងអតិថិជនប្រកប ដោយវិសាលភាពទូលំទូលាយ។ យើងខ្ញុំសូមថ្លែងអំណរគុណដល់វិនិយោគិនសក្តានុពលរបស់ធនាគារទាំងអស់ដែលបានចំណាយពេលវេលាដ៏ មានតម្លៃចូលរួមក្នុងដំណើរការកំណត់ថ្លៃភាគហ៊ុន (ប៊ុកបៀលឌីង) និងទិញភាគហ៊ុនរបស់ធនាគារ ។
លោក Han Kyung Tae អគ្គនាយកក្រុមហ៊ុន យាន់តា ស៊ីឃ្យួរឹធី (ខេមបូឌា) ភីអិលស៊ី បានមានប្រសាសន៍ថា ទោះបីជាមានកង្វល់អំពីជំងឺ Covid-19 និងការកើនឡើងនៃភាពមិនប្រាកដ នៅលើទីផ្សារហិរញ្ញវត្ថុសកលក៏ដោយ ក៏តម្រូវការចូលរួមដាក់សំណើរទិញ និងកំណត់ថ្លៃភាគហ៊ុន (ប៊ុកបៀលឌីង) មានចំនួនច្រើនគួរឲ្យកត់សម្គាល់ ដោយតម្រូវការសរុបមានចំនួន ៣ដង លើស ចំនួនភាគហ៊ុនដែលបានបម្រុងទុកក្នុងដំណាក់កាលប៊ុកបៀលឌីង ។ លទ្ធផលនៃការកំណត់ថ្លៃភាគហ៊ុន (ប៊ុកបៀលឌីង) នាពេលនេះ ជាលទ្ធផលបណ្តោះអាសន្ននៅឡើយ ហើយនឹងត្រូវដាក់ជូនក្រុមហ៊ុនផ្សារមូលបត្រកម្ពុជា និងគណៈកម្មការមូលបត្រកម្ពុជាដើម្បីអនុម័តលើថ្លៃចុងក្រោយ ។
លោកថា ការជូនដំណឹងនេះ គឺក្នុងគោលបំណង ជូនព័ត៌មានខ្លះៗជាមុនដល់វិនិយោគិនដើម្បីអនុញ្ញាតឲ្យវិនិយោគិនរៀបចំខ្លួន និងត្រៀមខ្លួនចូលរួមដំណាក់កាលបរិវិសកម្ម ដែលគ្រោងនឹងចាប់ផ្តើមនាថ្ងៃទី២៤ ខែមីនា ឆ្នាំ២០២០ ខាងមុខនេះ ។ ការបោះផ្សាយលក់មូលបត្រកម្មសិទ្ធិជាសាធារណៈរបស់ធនាគារនេះ គឺជាឱកាសមាសរបស់វិនិយោគិនរូបវ័ន្តបុគ្គល ដើម្បីក្លាយជាភាគហ៊ុនិករបស់ប្រជាធនាគារដែលលោកអ្នកជឿទុកចិត្តបំផុត និងជាធនាគារមានស្ថានភាពហិរញ្ញវត្ថុរឹងមាំបំផុតនៅក្នុងព្រះរាជាណាចក្រកម្ពុជា ។
លោក Han Kyung Tae បានបន្ថែមទៀតថា ភាគហ៊ុនចំនួន ៤.៣៧៥.៦៩៦ ត្រូវបានបម្រុងទុកសម្រាប់វិនិយោគិនដែលទទួលបានជោគជ័យនៅក្នុងដំណាក់កាលកំណត់ថ្លៃភាគហ៊ុន ។ ដូច្នេះសូមអញ្ជើញវិនិយោគិនសាធារណៈ ទាំងអស់ចូលរួមក្នុងដំណាក់កាលបរិវិសកម្មដើម្បីទិញភាគហ៊ុនរបស់ធនាគារ អេស៊ីលីដា ភីអិលស៊ី ជាមួយនឹងតម្លៃចុងក្រោយដែលរំពឹងថា នឹងចាប់ផ្តើមពីថ្ងៃទី២៤ ខែមីនា ឆ្នាំ២០២០ ដល់ថ្ងៃទី០៤ ខែមេសា ឆ្នាំ២០២០ ។
វិនិយោគិនដែលទទួលបានជោគជ័យ និងវិនិយោគិនដែល មិនទទួលបានជោគជ័យនៅតែអាចទិញភាគហ៊ុនរបស់ធនាគារបន្ថែមទៀតបាននៅក្នុងដំណាក់ កាលបរិវិសកម្ម។ នៅក្នុងដំណាក់កាលបរិវិសកម្ម មានភាគហ៊ុនសរុបរហូតដល់ ២១.៨៧៨.៤៧៧ ភាគហ៊ុនសម្រាប់ដាក់លក់ជូនវិនិយោគគិនសាធារណៈនៅក្នុងតម្លៃចុងក្រោយ។
យោងតាមប្រសាសន៍ប្រធាននាយកប្រតិបត្តិធនាគារអេស៊ីលីដា លោកបណ្ឌិត អុិន ចាន់នី ថា អេស៊ីលីដា ភីអិលស៊ី រង់ចាំទទួលស្វាគមន៍ វិនិយោគិនទាំងអស់ដើម្បីចូលរួមទិញភាគហ៊ុន និងក្លាយជាភាគហ៊ុនិករបស់ធនាគារ នាពេល ឆាប់ៗខាងមុខនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ