ខេត្តបាត់ដំបង ៖ ក្រុមកីឡាបាល់ទាត់កម្ពុជារបស់ស្នងការដ្ឋាននគរបាលខេត្តបាត់ដំបងបានប្រកួតជាមិត្តភាព ជាមួយក្រុមកីឡាបាល់ទាត់នៃស្នងការដ្ឋាននគរបាលខេត្តច័ន្ទ បុរី ព្រះរាជាណាចក្រថៃ ធ្វើឡើងនារសៀលថ្ងៃទី០៧ កុម្ភៈ បន្ទាប់ពីបានបំពេញការងារពង្រឹងកិច្ចសហប្រតិបត្តការរួមគ្នាលើវិស័យសន្តិសុខជាមួយគ្នាពេញមួយព្រឹកនៅក្នុងស្នងការដ្ឋាននគរបាលខេត្តបាត់ដំបងរួចមក ។
លោកឧត្តមសេនីយ៍ទោ អ៊ុច សុខុន មេបញ្ជាការរងនគរបាលជាតិទិសភូមិភាគទី៥ ស្នងការនៃស្នងការដ្ឋាននគរបាលខេត្តបាត់ដំបង បានលើកឡើងថា នេះជាលើកទី៣បន្ទាប់ពីកីឡាបាល់ទាត់របស់នគរបាលកម្ពុជាបានទៅប្រកួតនៅខេត្តច័ន្ទបូរី ប្រទេសថៃ កាលពីឆ្នាំមុនរួចមក ហើយសំខាន់វិស័យកីឡា មិនត្រឹមតែបានផ្តល់នូវសុខភាពសម្រាប់យើងទាំងអស់គ្នានោះទេ កីឡាគឺជាស្ពានមិត្តភាព ដែលបាននាំយើងឲ្យទៅរកភាពស្និទ្ធស្នាល យល់ចិត្តគ្នា គោរពគ្នា ជួយគ្នាទៅវិញទៅមកនៅពេលមានអាសន្ន និងពេលជួបការលំបាក គឺយើងតែងតែជួយគ្នាជានិច្ចនៅពេលមានតម្រូវការ ។
លោក ឧត្តមសេនីយ៍ត្រី ថាណាស័ក្តិ រិទ្ធីដេតផៃប៊ូន មេបញ្ជាការរងនគរបាលភូមិភាគ២ នៃព្រះរាជាណាចក្រថៃ បានបន្ថែមទៀតថា យើងកំពុងតែបង្ហាញភាពជិតស្និទ្ធ ដូចបងដូចប្អូនកាន់តែច្រើនឡើងបន្ថែមទៀត គឺយើងមានគោលដៅដូចគ្នា ក្នុងការធានាការពារសន្តិសុខ ជូនប្រជាជនយើងកំពុងតែរស់នៅរកស៊ីជាមួយគ្នាតាមខ្សែបន្ទាត់ព្រំដែន ហើយយើងបានមកប្រកួតបាល់ទាត់ជាមួយគ្នាពេលនេះ គឺគ្មានគោលបំណងចង់ឈ្នះចាញ់អ្វីពីគ្នាឡើយ គឺយើងត្រូវការឈ្នះទាំងអស់គ្នា ឈ្នះផ្នែកសុខភាពល្អ ឈ្នះលើការរួបរួមគ្នាការពារសន្តិសុខ សណ្តាប់ធ្នាប់របស់ប្រជាជនយើងនៅតាមព្រំដែន ឲ្យមានក្តីសុខ ឈ្នះការខឹងស្អប់គ្នាដោយប្រយោល មកជួបស្រឡាញ់រាប់អានគ្នាដែលមានភូមិផងរបងផ្ទះជាប់គ្នា មានប្រពៃណីដូចគ្នា កាន់វិស័យព្រះពុទ្ធសាសនាដូចគ្នា មានជីវភាពដូចៗគ្នា ដូច្នោះកីឡាបាល់ទាល់ពេលនេះបានបង្ហាញឆន្ទះ ស្មារតីដែលយើងបានរត់រកគ្នានេះ គឺយើងមានដូចគ្នាទាំងអស់ ពិតមែនតែយើងមានសញ្ជាតិខុសគ្នាមែនតែយើងមាននិស្ស័យ និងអ្វីៗទាំងអស់ដូចៗគ្នា ។
ក្រោយពេលប្រកួតចប់ នៅវេលាម៉ោង០៦យប់ថ្ងៃដដែល ដោយទទួលបានពិន្ទុ៣ស្មើគ្នា ហើយកម្មវិធីប្រគល់ពានរង្វាន់បានធ្វើឡើង ដោយលោកស្នងការទាំងសងខាងបានបញ្ជាក់រួមគ្នាថា «ជ័យជំនះពិន្ទុ៣ទល់៣នេះ» គឺយើងបានឈ្នះទាំងអស់គ្នា ហើយភាគីកម្ពុជាក៏បានថ្លែងពីគំរោងឆ្នាំក្រោយ យើងបានជួបគ្នានៅក្នុងទឹកដីថៃ ដែលមានខេត្តច័ន្ទបូរី ធ្វើជាម្ចាស់ផ្ទះម្តង ។
មុនពេលប្រកួតកីឡាបាល់ទាត់មិត្តភាព ថ្នាក់ដឹកនាំទាំងពីរបានដឹកនាំគណៈប្រតិភូអញ្ជើញចូលជួបសម្តែងការគួរសម ជាមួយលោក ហឿង សុគន្ធ អភិបាលរងនៃគណៈអភិបាលខេត្តបាត់ដំបង តំណាងលោក ងួន រតនៈ អភិបាលនៃគណៈអភិបាលខេត្តបាត់ដំបង នៅក្នុងបរិវេណរដ្ឋបាលខេត្តបាត់ដំបង ដែលជំនួបសម្តែងការគួរសមនេះ ភាគីទាំងពីរបានជម្រាបជូនលោកអភិបាលរងខេត្ត អំពីលទ្ធផលជាផ្លែផ្កាដែលសម្រេចបាន នៅក្រោយជំនួបពិភាក្សាគ្នារយៈពេលពេញមួយព្រឹករួចមក ។
ចែករំលែកព័តមាននេះ