ខេត្តត្បូងឃ្មុំ៖ សំឡេងគ្រាប់បានផ្ទុះលាន់ឡើងកក្រើកដី និងបណ្ដាលឱ្យបុរសចំណាស់ម្នាក់បាត់ បង់ជីវិតភ្លាមៗ នៅវេលាម៉ោង១និង៣០នាទីរសៀលថ្ងៃទី៣០ មករា ស្ថិតនៅចំណុចភូមិបេងឃុំដារ ស្រុកមេមត់ ក្រោយកើតហេតុត្រូវបានកម្លាំងសមត្ថកិច្ចចុះទៅត្រួតពិនិត្យ ក្នុងនោះក៏មានប្រភេទគ្រាប់៦០ម.មមួយគ្រាប់ទៀត…
ខេត្តត្បូងឃ្មុំ៖ សំឡេងគ្រាប់បានផ្ទុះលាន់ឡើងកក្រើកដី និងបណ្ដាលឱ្យបុរសចំណាស់ម្នាក់បាត់ បង់ជីវិតភ្លាមៗ នៅវេលាម៉ោង១និង៣០នាទីរសៀលថ្ងៃទី៣០ មករា ស្ថិតនៅចំណុចភូមិបេងឃុំដារ ស្រុកមេមត់ ក្រោយកើតហេតុត្រូវបានកម្លាំងសមត្ថកិច្ចចុះទៅត្រួតពិនិត្យ ក្នុងនោះក៏មានប្រភេទគ្រាប់៦០ម.មមួយគ្រាប់ទៀត ដែលមិនទាន់ផ្ទុះនៅឡើយ ។
ជនរងគ្រោះឈ្មោះ ទួន វុិត ភេទប្រុស អាយុ៥៥ឆ្នាំ ។ បើតាមលោកវរសេនីយ៍ឯក ហុង គឹមហឿន អធិការនគរបាលស្រុកមេមត់ប្រាប់ឲ្យដឹងថា ដំបូងបុរសរងគ្រោះបានយកគ្រាប់៨២ចាស់ មកវាយយករំសេវនៅក្រោមដើមក្រខុបមុខផ្ទះរបស់គាត់នៅចំណុចភ្នំបុស្សតាកុក ស្ថិតនៅភូមិបេងបានតែបន្តិច ជាហេតុបណ្ដាលឲ្យផ្ទុះលាន់កក្រើកតែម្ដង និងបង្កឱ្យមានការភ្ញាក់ផ្អើលពីអ្នកជិតខាង។
អធិការនគរបាលស្រុកមេមត់ប្រាប់បន្តថា បុរសនេះត្រូវបានបំបែកគ្រាប់ចំត្រង់.កនិងជើងបណ្ដាលឲ្យស្លាប់មួយរំពេច ហើយបំបែកគ្រាប់មិនបានជះអំបែងទៅប៉ះអ្នកជិតខាងណាម្នាក់ បណ្ដាលឱ្យរងរបួសនោះទេ។ បន្ទាប់ពីហេតុការណ៍កើតឡើង លោកនាយប៉ុស្តិ៍រដ្ឋបាលដារបានរាយការណ៍មករូបលោក ហើយក៏បានចាត់ឱ្យកម្លាំងជំនាញចុះទៅធ្វើការត្រួតពិនិត្យជាបន្ទាន់នៅកន្លែងកើតហេតុ ។
ជាមួយនោះ សមត្ថកិច្ចបានរកឃើញគ្រាប់60mmមួយគ្រាប់ទៀត មិនទាន់ផ្ទុះនៅមិនឆ្ងាយប៉ុន្មានពីសាកសព។គ្រាប់នេះ ជនរងគ្រោះបានរើសយកមកក្នុងព្រៃជាប់ព្រំដែនកម្ពុជានិងវៀតណាម នៅក្នុងឃុំដាស្រុកមេមត់ ក្នុងពេលដែលដើរទៅរកឃ្មុំក្នុងព្រៃ ហើយបើតាមការសន្និដ្ឋានគ្រាប់នេះ ទំនងអាចបន្សល់ទុកតាំងពីសម័យសង្គ្រាមមកម្ល៉េះ។
គ្រាប់ដែលមិនទាន់ផ្ទុះមួយគ្រាប់នេះ មន្ត្រីជំនាញបានទាក់ទងទៅអង្គការស៊ីម៉ាក់ ឲ្យមកទទួលជាទៅរក្សា ទុក ឬក៏យកទៅកម្ទេចចោល ។ សូមបញ្ជាក់ថា ប្រទេសកម្ពុជាបានឆ្លងកាត់ភ្លើង សង្គ្រាមជាច្រើនឆ្នាំក្នុងនោះមានគ្រាប់យុទ្ធភ័ណ្ឌមិនទាន់ផ្ទុះជាច្រើនត្រូវបានជ្រុះរាយប៉ាយនៅលើដី និងក្រោមដីហើយបណ្ដាលឲ្យប្រជាពលរដ្ឋរងរបួស ពិការភាព ឬស្លាប់មានស្ទើររាល់ឆ្នាំ ។
ចែករំលែកព័តមាននេះ