រាជធានីភ្នំពេញ ៖ Starbucks កម្ពុជា បានប្រកាសនៅថ្ងៃទី៣១ ខែមករា ឆ្នាំ២០២០ នេះថា គ្រប់សាខាហាងទាំងអស់ បានលុបបំបាត់ការប្រើប្រាស់បំពង់បឺតជ័រដែលប្រើបានតែម្តង ហើយបោះចោល ដោយផ្តល់ឲ្យអតិថិជននូវជម្រើសថ្មី គឺបំពង់បឺតធ្វើពីក្រដាស។ ក្រុមហ៊ុនបានអនុវត្តគោលការណ៍នេះ តាំងពីខែវិច្ឆិកា ឆ្នាំ២០១៩ មកម្ល៉េះ ដោយស្របតាមការប្តេជ្ញាចិត្តជាសកលក្នុងការលុបបំបាត់បំពង់បឺតជ័រនៅត្រឹមចុងឆ្នាំ ២០២០។
បំពង់បឺតធ្វើពីក្រដាស ត្រូវបានផលិតឡើងពីផលិតផលក្រដាសដែលមានគុណភាពខ្ពស់ និងមិនធ្វើឲ្យប៉ះពាល់ដល់សុខភាព ដែលត្រូវបានធានាដោយក្រុមប្រឹក្សាគ្រប់គ្រងព្រៃឈើ (Forest Stewardship Council®)។ គួរបញ្ជាក់ផងដែរថា បំពង់បឺតក្រដាសរបស់យើង មានច្រើនប្រភេទ ទាំងសម្រាប់កែវដាក់់ភេសជ្ជៈទំហំស្តង់ដា និងសម្រាប់កែវធំ សម្រាប់ភេសជ្ជៈប្រភេទហ្វ្រាបពូឈីណូ។ បំពង់បឺតនេះ មានដាក់ឲ្យប្រើប្រាស់នៅគ្រប់សាខាហាង Starbucks ទាំងអស់នៅកម្ពុជា។
នាយកគ្រប់គ្រងទូទៅរបស់ក្រុមហ៊ុន Starbucks កម្ពុជា លោក ប៉ោ លីម មានប្រសាសន៍ថា៖ «Starbucks តែងតែព្យាយាមនាំយកបទពិសោធន៍ដែលថ្មីក្នុងការបំពេញតម្រូវការអតិថិជន ដើម្បីឲ្យពួកគាត់បន្តក្រេបភេសជ្ជៈដែលគាត់ចូលចិត្តដោយមិនប៉ះពាល់ដល់បរិស្ថាននៅហាងរបស់យើង»។
លោកបន្ថែមថា៖ «និរន្តរភាព គឺជាចំណុចចម្បងដែល Starbucks គិតដល់មុនគេ ហើយដៃគូឆុងកាហ្វេរបស់យើងតែងតែលើកទឹកចិត្តឲ្យអតិថិជនជាទីស្រលាញ់របស់យើង ចូលរួមចំណែកជួយបរិស្ថានទាំងអស់គ្នា ដោយការដាក់ភេសជ្ជៈសម្រាប់ទទួលទានក្នុងកែវរបស់ហាងផ្ទាល់ ក៏ដូចជាបញ្ចុះតម្លៃជូនអតិថិជនចំនួន ១៣០០៛ ($0.30) សម្រាប់អ្នកដែលប្រើប្រាស់កែវផ្ទាល់ខ្លួនរបស់ពួកគេសម្រាប់ច្រកភេសជ្ជៈទៀតផង»។
លើសពីនេះទៀត កាលពីខែមេសា ឆ្នាំ២០១៩ កន្លងទៅ ដែលជាខែដែលក្រុមហ៊ុន Starbucks ទូទាំងសកលលោក នាំគ្នាធ្វើអំពើសប្បុរសធម៌ជួយដល់សង្គម ក្រុមហ៊ុន Starbucks កម្ពុជា ដែលមានការគាំទ្រពីអង្គការ Asia Foundation Cambodia បានរួមគ្នាធ្វើសិក្ខាសាលាមួយក្នុងគោលបំណងបង្កើនការយល់ដឹងពីបរិស្ថាន ទៅកាន់សិស្សានុសិស្សថ្នាក់បឋមសិក្សានៅក្នុងខេត្តកណ្តាល ដែលបានធ្វើឡើងក្នុងគោលបំណងបង្កើនការយល់ដឹងរបស់សិស្សានុសិស្សអំពីឥទ្ធិពលអាក្រក់នៃសម្រាមចំពោះពួកគេផ្ទាល់ និងសង្គមជាតិទាំងមូល និងណែនាំពីដំណោះស្រាយមួយចំនួនទៅនឹងបញ្ហានេះផងដែរ ដែលមានដូចជា ចូលរួមកាត់បន្ថយការបង្កើតសម្រាម កែច្នៃសម្រាមឡើងវិញ ព្រមទាំងការដាំដើមឈើទៀតផង។
នាយកប្រតិបត្តិរបស់ក្រុមហ៊ុន Starbucks ជាសកល លោក Kevin Johnson បានប្រកាសកាលពីថ្ងៃទី ២១ ខែមករា ឆ្នាំ២០២០ នូវការប្តេជ្ញាចិត្តជាច្រើនទសវត្សរបស់ Starbucks ក្នុងការក្លាយខ្លួនជា ក្រុមហ៊ុនដែលផ្តល់ជូននូវធនធានវិជ្ជមានដោយការធ្វើជាចំណែកមួយជួយដល់ផែនដី ជាជាងការទាញយកប្រយោជន៍តែពីផែនដី។ លោកក៏បានលើកឡើងពី គោលដៅបឋមដែលផ្អែកលើវិទ្យាសាស្ត្រ ក្នុងការកាត់បន្ថយការបញ្ចេញកាបូន ការប្រើប្រាស់ទឹក និងការគ្រប់គ្រងកាកសំណល់ត្រឹមឆ្នាំ ២០៣០។ លើសពីនេះ លោកក៏បានគូសបញ្ជាក់នូវយុទ្ធសាស្ត្រចំនួន ៥ ដែលក្រុមហ៊ុនបានកំណត់ ដើម្បីសម្រេចបានផងដែរ។
Starbucks លើកទឹកចិត្តឲ្យអ្នកទាំងអស់គ្នាស្វែងយល់បន្ថែមពីបញ្ហានេះ ដោយចូលទៅកាន់គេហទំព័រ http://stories.starbucks.com/stories/sustainability
អំពី Starbucks ៖
ចាប់តាំងពីឆ្នាំ ១៩៧១ ក្រុមហ៊ុន Starbucks Coffee បានប្តេជ្ញាចិត្តរកប្រភព និងលីងគ្រាប់កាហ្វេអារ៉ាប៊ីកា ដែលមានគុណភាពខ្ពស់។ សព្វថ្ងៃនេះ ដោយមានហាងទូទាំងពិភពលោកជាង ៣,០០០០ សាខា ក្រុមហ៊ុនគឺជាអ្នកលក់ និងចែកចាយកាហ្វេដែលមានគុណភាពខ្ពស់ពិសេសជុំវិញពិភពលោក។
តាមរយៈការប្តេជ្ញាចិត្តដ៏រឹងមាំចំពោះភាពល្អឥតខ្ចោះ និងគោលការណ៍ណែនាំរបស់យើង យើងនាំមកនូវបទពិសោធន៍ដ៏ពិសេសរបស់ Starbucks ទៅឲ្យអតិថិជនគ្រប់គ្នាតាមកែវកាហ្វេនីមួយៗ។ ដើម្បីចូលរួមទទួលយកបទពិសោធន៍នេះ សូមមកកាន់ហាងរបស់យើងផ្ទាល់ ឬស្វែងរកនៅលើវេបសាយ Starbucks.com និង Starbucks Stories ។ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ