រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនរងគ្រោះជាស្ត្រីជនជាតិបរទេសម្នាក់កំពុងតែដើរតាមផ្លូវជាមួយមិត្តភក្តិមួយក្រុមដោយមិនបានប្រយ័ត្ន ក៏លេចមុខជនសង្ស័យ២នាក់ ជិះម៉ូតូហុងដាស្តុបពីស៊េរី2020 ធ្វើសកម្មភាពឆក់កាបូបស្ពាយបានសម្រេច ប៉ុន្តែត្រូវកម្លាំងព្រហ្មទណ្ឌកំរិតស្រាលនៃស្នងការរាជធានីភ្នំពេញ ធ្វើការឃាត់ខ្លួនបាន បង្កឱ្យមានការភ្ញាក់ផ្អើលកាលពីម៉ោង9និង30នាទីយប់ ថ្ងៃទី22 ខែមករា ឆ្នាំ2020 តាមបណ្តោយផ្លូវ R6 នៅចំណុចបឹងកក់ ស្ថិតក្នុងសង្កាត់ស្រះចក ខណ្ឌដូនពេញ ។
សេចក្តីរាយការណ៍បន្តថា ជនសង្ស័យខាងលើឈ្មោះ ពូន សុធី ភេទប្រុស អាយុ17ឆ្នាំ មានមុខរបរបើករថយន្តដឹកសិស្ស ស្នាក់នៅខណ្ឌសែសុខ និងឈ្មោះហែម ចំរើន ភេទប្រុស អាយុ17ឆ្នាំ ស្នាក់នៅមិនពិតប្រាកដ ។
តាមប្រភពពីសមត្ថកិច្ចបានឱ្យដឹងថា មុនពេលកើតហេតុ កម្លាំងព្រហ្មទណ្ឌកំរិតស្រាលនៃស្នងការរាជធានីភ្នំពេញបានល្បាតនៅម្តុំផ្លូវព្រះមុនីវង្ស សង្កាត់អូរឬស្សី៤ ខណ្ឌ៧មករា ខណៈពេលបើកមកដល់ចំណុចកើតហេតុខាងលើនេះ ក៏ឃើញជនរងគ្រោះជាស្ត្រីជនជាតិបរទេសដើរមួយក្រុមតាមបណ្តោយផ្លូវព្រះមុនីវង្ស មួយសន្ទុះក្រោយមកក៏ស្រាប់តែមានលេចមុខជនសង្ស័យ២នាក់ជិះម៉ូតូមួយគ្រឿងម៉ាកហុងដាស្តុបពី ពណ៌ខ្មៅ ស៊េរី2020 ពាក់ស្លាកលេខភ្នំពេញ 1IB5580 បើកតាមបណ្តោយផ្លូវព្រះមុនីវង្ស មកធ្វើសកម្មភាពឆក់កាបូបពីជនរងគ្រោះដែលកំពុងតែដើរនោះបានសម្រេចហើយបើករត់គេច។
ប្រភពដដែលបន្តថា ប៉ុន្តែជនសង្ស័យទាំង២នាក់សំណាងអាក្រក់ ក៏ជួបនឹងកម្លាំងល្បាតព្រហ្មទណ្ឌកំរិតស្រាលនៃស្នងការរាជធានីភ្នំពេញ ក៏ធ្វើការប្រដេញពីចំណុចកើតហេតុខាងលើ រហូតទៅក្នុងផ្លូវរ៉ារទះភ្លើងបឹងកក់ក្តាន់ពី ហើយក៏ត្រូវឃាត់ទាំង២នាក់តែម្តង យកទៅសួរនាំនៅការិយាល័យព្រហ្មកំរិតស្រាល។ ហើយជនសង្ស័យខាងលើនេះ ក៏បានឆ្លើយសារភាពប្រាប់សមត្ថកិច្ចថា ខ្លួនពិតជាបានធ្វើសកម្មភាពឆក់ពិតមែន ចំណែកឯជនរងគ្រោះក៏បានទៅដាក់ពាក្យបណ្តឹង ដើម្បីឱ្យសមត្ថកិច្ចចាត់ការទៅតាមនិតិវិធី ។
ក្រោយពេលកើតហេតុ ជនសង្ស័យត្រូវកម្លាំងជំនាញធ្វើការកសាងសំណុំរឿង ដើម្បីបញ្ជូនខ្លួនទៅកាន់តុលាការ ដើម្បីចាត់ការទៅតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ