ខេត្តបាត់ដំបង ៖ សេចក្តីរាយការណ៍ឱ្យដឹងថា កម្មករខ្វៃជ្រូកម្នាក់បានបង់ជីវិតហើយត្រូវគេប្រទះឃើញ នៅក្បែរជណ្ដើរ ដែលមានស្នាមរបួសក្បាលផង កាលពីវេលាម៉ោង៧យប់ថ្ងៃទី១៤ មករា នៅកន្លែងខ្វៃជ្រូកមួយកន្លែង នៅក្នុងភូមិចំការសំរោង១…
ខេត្តបាត់ដំបង ៖ សេចក្តីរាយការណ៍ឱ្យដឹងថា កម្មករខ្វៃជ្រូកម្នាក់បានបង់ជីវិតហើយត្រូវគេប្រទះឃើញ នៅក្បែរជណ្ដើរ ដែលមានស្នាមរបួសក្បាលផង កាលពីវេលាម៉ោង៧យប់ថ្ងៃទី១៤ មករា នៅកន្លែងខ្វៃជ្រូកមួយកន្លែង នៅក្នុងភូមិចំការសំរោង១ សង្កាត់ចំការសំរោង ក្រុងបាត់ដំបង តែសមត្ថកិច្ចហាក់មិនទាន់ហ៊ានវាយតម្លៃបែបណានៅឡើយទេ។
មន្ត្រីមូលដ្ឋានបានឲ្យដឹងថា ជនរងគ្រោះឈ្មោះរិទ្ធ ហ្វីណា ភេទប្រុស អាយុ៣៨ឆ្នាំ ជាកម្មករខ្វៃជ្រូក ស្នាក់នៅកន្លែងកើតហេតុខាងលើ ។ មន្ត្រីបាននិយាយថា ជនរងគ្រោះត្រូវបានអ្នកធ្វើការជាមួយគ្នា ប្រទះឃើញដំបូងដេកស្ដូកស្ដឹងនៅក្នុងក្បែរជណ្ដើរថ្ម នៅក្នុងផ្ទះដែលជោគជាំទៅដោយឈាម តែនៅមានដង្ហើម លុះបន្តិច ក្រោយមកគាត់ក៏ដាច់ខ្យល់ភ្លាមៗដែរ។
បើតាមសាក្សីបានផ្ដល់ព័ត៌មានបឋមដល់សមត្ថកិច្ចថា មុនពេលកើតហេតុបន្តិច ជនរងគ្រោះបានពោលថា មិនសូវស្រួលខ្លួន ហើយពេលនោះអ្នកនៅជាមួយ ក៏បានកោសខ្យល់ឲ្យតែទើបកោសបានបន្តិច ក៏ឈប់វិញ។ ប្រភពដដែលបាននិយាយទៀតថា ក្រោយពីកោសខ្យល់ គាត់បានសម្ងំដេកនៅលើផ្ទះម្នាក់ឯង ប៉ុន្តែបន្តិចក្រោយ មកពេលគេដើរចូលទៅវិញ ស្រាប់តែឃើញជនរងគ្រោះដេកស្ដូកនៅក្បែរជណ្ដើរមានឈាម និងមានស្នាមរបួសក្បាលផង ទើបមានការភ្ញាក់ផ្អើលតែម្ដង ។ បើតាមសាក្សីដដែលបានបញ្ជាក់ថា ពេលនោះជនរងគ្រោះនៅមានដង្ហើម ហើយគេក៏លើកចេញមកក្រៅ ដើម្បីជួយសង្គ្រោះ តែគាត់បានស្លាប់ភ្លាមៗតែម្ដង។
លោកឧត្តមសេនីយ៍ត្រី ជេត វណ្ណនី ស្នងការរងខេត្ត បានមានប្រសាសន៍ថា បើតាមការពិនិត្យជាបឋម ជនរងគ្រោះមានស្នាមរបួសធ្ងន់លើចិញ្ចើមខាងស្ដាំ តែយើងមិនទាន់ហ៊ានសន្និដ្ឋានបែបណានៅឡើយទេ ព្រោះពេលនេះមន្ត្រីផ្នែកកោសល្យវិច័យកំពុងធ្វើការពិនិត្យនៅឡើយ។
លោកស្នងការរងបានបញ្ជាក់ថា ជាមួយនិងការត្រូតពិនិត្យនេះ មន្ត្រីជំនាញក៏កំពុងសាកសួរមនុស្សមួយចំនួនផងដែរ ដែលពាក់ព័ន្ធក្នុងរឿងនេះ។ ប៉ុន្តែយើងនឹងដឹងមូលហេតុ ក្រោយពេលមន្ត្រីជំនាញពិនិត្យ និងវាយតំលៃ ៕
ចែករំលែកព័តមាននេះ