ខេត្តកំពង់ស្ពឺ ៖ នរណាមិនស្គាល់អតីតតារាកំប្លែងដ៏មានប្រជាប្រិយភាព ជាពិសេសមានសម្រែកបានខ្ពស់ក្នុងបទចម្រៀង គឺនាយ ចឺម ដែលកំពុងតែល្បីល្បាញទាំងវ័យក្មេង។ ថ្វីត្បិតតែឈានជើងចូលសិល្បៈមិនបានប៉ុន្មានផង លោកអាចរកចំណូលបានយ៉ាងច្រើនសន្ធឹកសន្ធាប់ រហូតសាងសង់ផ្ទះវីឡាធំថ្មីជូនអ្នកមានគុណ និងទើបតែរៀបចំធ្វើពិធីឡើងផ្ទះយ៉ាងធំដុំ កាលពីថ្ងៃទី៩ ខែមករា ឆ្នាំ២០២០ នេះ។
វីឡាធំថ្មីដ៏ប្រណីតត្រូវបានពន្លកថ្មីវ័យក្មេងលោក សុខ មេសា ហៅ នាយចឺម សាងសង់ឡើងសម្រាប់តបស្នងសងគុណជូនលោកឪពុកអ្នកម្ដាយ ដែលមានទីតាំងនៅក្នុងភូមិត្រាចកុះ ស្រុកគងពិសី ខេត្តកំពង់ស្ពឺ ដែលជាទីកំណើតរបស់លោក។ បន្ទាប់ពីលេចចេញជារូបរាងជាស្ថាពរ លោកក៏បានជ្រើសយកថ្ងៃទី៩ ខែមករា ឆ្នាំ២០២០ ធ្វើពិធីសូត្រមន្ត និងជប់លៀងឡើងគេហដ្ឋានថ្មី ដើម្បីប្រគល់ជូនឪពុកម្ដាយរបស់លោកក្នុងថ្ងៃតែ១ផ្ទាល់តែម្ដង ដែលធ្វើឡើងដល់ទៅ១៥០តុឯណោះ។
ស្របពេលជាមួយគ្នានេះដែរ ភ្ញៀវកិត្តិយសដែលលោកបានអញ្ជើញភាគច្រើនជាសិល្បករទាំងចាស់ និងថ្មីល្បីៗ បានអញ្ជើញចូលរួមយ៉ាងច្រើនកុះករ ព្រមទាំងសាច់ញាតិក្រុមគ្រួសារទាំងជិត និងឆ្ងាយរបស់លោកផ្ទាល់តែម្ដង។
លោកបង្ហើបថា ផ្ទះថ្មីនេះ លោកបានចំណាយថវិកាទៅលើការសាងសង់ និងសម្ភារៈផ្សេងៗ គឺលើ ១០ ម៉ឺនដុល្លាឯណោះ។ ដែលជាថវិការរបស់លោកផ្ទាល់បានមកពីសិល្បៈ និងមួយផ្នែកទៀត លោកក៏បង់រំលោះជាមួយនឹងធនាគារខ្លះដែរ ដើម្បីឱ្យបានរួចរាល់ឆាប់រហ័ស។
លោកក៏បានថ្លែងអំណរគុណដល់ភ្ញៀវទាំងជិតទាំងឆ្ងាយដែលបានអញ្ជើញចូលរួមយ៉ាងច្រើនកកកុញ រហូតសឹងគ្មានកន្លែងទទួលត្រឹមត្រូវ។ មតិតារាសិល្បៈភាគច្រើនដែលបានចូលរួមបានសម្ដែងការរីករាយ និងកោតសរសើរដល់នាយចឺម ជាខ្លាំង។ ទោះបីលោកមានវ័យក្មេងក៏ពិតមែនក្ដី ប៉ុន្តែសមត្ថភាពរបស់លោកអាចរកចំណូលបានច្រើនមិនធម្មតា ពិសេសនោះគឺលោកចេះមានគំនិតទុកដាក់លុយកាក់ និងចេះគិតគូរដល់អ្នកមានគុណ។
អ្នកសិល្បៈរៀមច្បងជាច្រើនបានចាត់ទុកនាយចឺម គឺជាគម្រូដ៏ល្អ គួរឱ្យយកតម្រាប់តាម ពីព្រោះថា កម្រមានតារាវ័យក្មេងណាមានមហិច្ចតាខ្ពស់ដូចលោកនោះទេ។ (កែសម្រួលដោយ ៖ បុប្ផា)
ចែករំលែកព័តមាននេះ