រាជធានីភ្នំពេញ ៖ កាលពីរសៀលថ្ងៃទី១៦ ខែមិថុនា ឆ្នាំ២០១៩ តំណាងអយ្យការសួរសាលាដំបូងរាជធានីភ្នំពេញ លោក សេង ហៀង បានសម្រេចធ្វើការចោទប្រកាន់បុរសជនជាតិស្បែកខ្មៅម្នាក់ និងស្ត្រីខ្មែរម្នាក់ ក្រោមការចោទប្រកាន់ពីបទ.ឆ បោក តាមមាត្រា.៣៧៧ ៣៧៨ នៃក្រមព្រហ្មទណ្ឌ ។
ជនសង្ស័យឈ្មោះ NWOSU MARTINS ភេទប្រុស អាយុ៣១ឆ្នាំ ជាជនជាតិអាហ្វ្រិកខាងត្បូង និង ស្ត្រីជាគូស្នេហ៍ឈ្មោះ កាន ឡានីន ហៅស្រីអូន អាយុ៣៥ឆ្នាំ ជាជនជាតិខ្មែរ ។
ជនសង្ស័យត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញឃាត់ខ្លួនកាលពីថ្ងៃទី១១ ខែមិថុនា ឆ្នាំ២០១៩ ដោយជាប់ពាក់ព័ន្ធក្នុងការបង្កើតអាក់ខោនហ្វេសប៊ុកក្លែងក្លាយដើម្បីទំនាក់ទំនងទៅជនរងគ្រោះឲ្យទុកចិត្ត និងសន្យាផ្ញើលុយឲ្យជនរងគ្រោះ ។ បន្ទាប់មកប្រើល្បិចឲ្យជនរងគ្រោះចេញថ្លៃសេវានិងពន្ធផ្សេងៗ ដោយតម្រូវឱ្យជនរងគ្រោះផ្ញើលុយតាមវីងជាបន្តបន្ទាប់ចំនួន៣លើក ក្នុងនោះលើកទី១ចំនួន៥៥០ដុល្លារ លើកទី២ចំនួន៥.៣០០ដុល្លារ និងលើកទី៣ចំនួន៤.៧០០ដុល្លារអាមេរិក (នេះបើតាមពាក្យបណ្តឹងរបស់ជនរងគ្រោះ) ។
ក្រោយពីចោទប្រកាន់ សំណុំរឿងនេះបានចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ