រាជធានីភ្នំពេញ ៖ ក្រុមហ៊ុន Pernod Ricard ជាក្រុមហ៊ុនស្រាលំដាប់ទី ២ លើពិភពលោកបានរៀបចំកម្មវិធីបរិស្ថានមួយដែលហៅថា ទិវាថ្ងៃទំនួលខុសត្រូវ (Responsib’All Day) ដោយកម្មវិធីនេះ ត្រូវបានធ្វើឡើងនៅថ្ងៃទី០៦ ខែមិថុនា ឆ្នាំ២០១៩ ។
នៅក្នុងឆ្នាំនេះដែរ ទិវាថ្ងៃទំនួលខុសត្រូវ បានប្រារព្ធឡើងក្រោមប្រធានបទ «ការផលិត និងប្រើប្រាស់ដោយការទទួលខុសត្រូវ» ដោយផ្សាភ្ជាប់គោលការទី១២ របស់អង្គការសហប្រជាជាតិដែលហៅថា ការអភិវឌ្ឍន៍ប្រកបដោយចីរភាព ដែលក្នុងនោះមានក្រុមហ៊ុនបុត្រសម្ព័ន្ធ ៨៦ ទូទាំងពិភពលោក ព្រមទាំងបុគ្គលិកទាំងអស់ប្រមាណជាង ១៩០០០ នាក់ ចូលរួមចំណែក និងចែករំលែកចំណេះដឹង បរិស្ថាន ក៏ដូចជាសកម្មភាព និងការងារសង្គមនានាទៅដល់មូលដ្ឋានសហគមន៍របស់ពួកគេជាដើម ។
ទន្ទឹមនឹងនេះដែរ នៅប្រទេសកម្ពុជា ក្រុមហ៊ុន Pernod Ricard Cambodge Co Ltd បានរៀបចំសិក្ខាសាលាទិវាថ្ងៃទំនួលខុសត្រូវមួយក្រោមប្រធានបទ «ការគ្រប់គ្រងសំរាមតាមរយៈធុងសំរាមកែច្នៃ» នៅថ្ងៃ០៦ ខែមិថុនា ឆ្នាំ ២០១៩ នៅសណ្ឋាគារ Rosewood ដោយមានវត្តមាន និងការគាំទ្រពីដៃគូពាណិជ្ជកម្ម ។
យើងដឹងហើយថា ទោះបីជាប្រជាជនមានការយល់ដឹងច្រើនចំពោះបញ្ហាបរិស្ថានបើប្រៀបធៀបពីឆ្នាំមុនៗ ជាពិសេសការចោលសំរាម ការគ្រប់គ្រង់សំរាម និងការបែងចែកសំរាមជាដើមក៏ដោយ ក៏មានការចោលសំរាមនៅតាមកន្លែងសាធារណៈមួយចំនួននៅតែកើតមានឡើង ដូច្នេះហើយយើងត្រូវតែពង្រឹងបន្ថែមនូវចំណេះដឹងបរិស្ថានទៅលើបញ្ហាកាកសំណល់ជាដើមនេះសំដៅដល់មូលដ្ឋានរបស់យើង ។
ក្រុមហ៊ុន Pernod Ricard Cambodge បានសហការជាមួយសិប្បកម្មធុងសំរាមកែច្នៃ (Eco-Bin) ក្នុងការចែកជូនធុងបរិស្ថានចំនួន ៣ ប្រភេទ ដោយធុងសំរាមប្រភេទទី ១សម្រាប់សំរាមដបជ័រ និងកំបុ័ង ធុងសំរាមប្រភេទទី២ សម្រាប់កែវ និងធុងសំរាមទី ៣ សម្រាប់សំរាមទូទៅ ។
សូមបញ្ជាក់ផងដែរថា ធុងសំរាមបរិស្ថានទាំងនោះ ធ្វើអំពីកង់ឡានចាស់ៗដែលឈប់ប្រើប្រាស់ ហើយយកមកកែច្នៃជាវត្ថុធាតុដើមក្នុងការផលិត ។ ក្រុមហ៊ុនបានចែកជូនទៅដល់២០ទីតាំងដែលជាដៃគូសហការណ៍ពាណិជ្ជកម្មរបស់ខ្លួននៅក្នុងក្រុងភ្នំពេញ ដែលទីតាំងទាំងនោះ សិ្ថតនៅតាមតំបន់ដូចជា ទួលគោក កោះពេជ្រ ផ្សាររាត្រី និងបឹងកេងកងជា ដើម ។
ក្រុមហ៊ុន Pernod Ricard Cambodge សង្ឃឹមយ៉ាងខ្ពស់ថា ប្រជាជនកម្ពុជានឹងយល់ដឹងបន្ថែមមួយកម្រិតទៀត ពីចំណេះដឹងបរិស្ថាន ក៏ដូចជាការចូលរួមថែរក្សាបរិស្ថានរបស់យើងទាំងអស់គ្នា ហើយជាពិសេសក៏លើកទឹកចិត្តទៅដល់ការប្រើប្រាស់ផលិតផលកែច្នៃឱ្យបានច្រើនបន្ថែមទៀតស្របតាមគោលការ ការកាត់បន្ថយការប្រើប្រាស់ឡើងវិញ និងការកែច្នៃឡើងវិញ ។
លោក Marc Rosales នាយកគ្រប់គ្រងទូទៅរបស់ក្រុមហ៊ុន Pernod Ricard Cambodge មានប្រសាសន៍នៅក្នុងសិក្ខាសាលានេះថា៖ «បុគ្គលម្នាក់ៗមិនថាមានតួនាទីជាអី្វ គឺអាចរួមចំណែកជាវិជ្ជមានចំពោះការកាត់បន្ថយប្រើប្រាស់វត្ថុធាតុដើម និងជំរុញការកែច្នៃ ។ ជាមធ្យមកាកសំណល់នៅទូទាំងពិភពលោកមានចំនួន ០,៧៤ គីឡូក្រាមមកពីការប្រើប្រាស់របស់បុគ្គលម្នាក់ៗក្នុងមួយថ្ងៃ ហើយប្រទេសខ្លះមានទៅដល់ ៤ គីឡូក្រាមពីការប្រើប្រាស់របស់មនុស្សម្នាក់ក្នុងមួយថ្ងៃ។
លោក Alexandre RICARD ដែលជាប្រធាន និងនាយកប្រតិបត្តិរបស់ក្រុមហ៊ុន Pernod Ricard ប្រចាំនៅការិយាល័យកណ្តាលនៅទីក្រុងប៉ារីសប្រទេសបារាំងបាននិយាយថា «យើងមានបុគ្គលិកចំនួន ១៩០០០ នាក់ដែលជាអ្នកគាំទ្រយ៉ាងស្មោះស្ម័គ្រ និងជាភ្ញៀវកិត្តិយសនៅលើភពផែនដីរបស់យើង ។ ការចែករំលែកដ៏មានតម្លៃ ការគោរពសិទ្ធិរស់នៅ និងការលើកកម្ពស់ការប្រើប្រាស់ដោយទំនួលខុសត្រូវ នេះជាលក្ខខណ្ឌទាំងអស់ដែលប្រកបដោយចីរភាព ។ ម្សិលមិញថ្ងៃនេះ និងថ្ងៃស្អែក យើងនឹងបង្កើតនិរន្តរភាពរយៈពេលវែង» ។
ដោយឡែកទាក់ទងទៅនឹងការគ្រប់គ្រងកាកសំណល់នៅប្រទេសកម្ពុជាវិញអ្នកស្រី សឿង សុថារី ដែលជាម្ចាស់សិប្បកម្មធុងបរិស្ថាន ហើយដែលបានចូលរួមនៅក្នុងសិក្ខាសាលនេះបានឱ្យដឹងថា មនុស្សភាគច្រើនជាអ្នកបង្កើតកាកសំណល់ ហើយមិនបានគិតគូពីផលប៉ះពាល់នោះទេ ។ កាកសំណល់ថង់ប្លាស្ទិកប៉ះពាល់ខ្លាំងណាស់ដែលគ្រប់គ្នាតែងតែមើលរំលង ។ អ្នកស្រីបានឱ្យដឹងទៀតថា កាកសំណល់ទាំងអស់រួមមាន ៖ កាកសំណល់សរីរាង្គ, កាកសំណល់កែឆ្នៃ, កាកសំណល់ជាតិពុល និងកាកសំណល់ពេទ្យ ។
ទោះជាយ៉ាងណាក៏ដោយ អ្នកស្រីបានឱ្យដឹងពីគោលការណ៍ដើម្បីទប់ស្កាត់កាកសំណល់ផងដែរ ដែលក្នុងនោះរួមមាន៖ ផ្ទះមួយធុងសំរាមមួយ, ប្រើសំរាមដើម្បីកាត់បន្ថយសំរាម, បង្កើតការយល់ដឹងអំពីសារសំខាន់នៃការគ្រប់គ្រងកាកសំណល់ឱ្យបានត្រឹមត្រូវ, បង្កើតក្រុមស្ម័គ្រចិត្តក្នុងការប្រមូលសំរាម, សហការជាមួយអាជ្ញាធរ ដើម្បីធ្វើយុទ្ធនាការអប់រំការគ្រប់គ្រងសំរាម, បង្កើតច្បាប់ផាកពិន័យចំពោះបុគ្គលដែលចោលសំរាមដោយគ្មានសណ្តាប់ធ្នាប់នៅទីសាធារណៈ និងបង្កើនប្រាក់ចំណូលសម្រាប់កម្មករប្រមូលសំរាមក្នុងស្រុកជាដើម ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ