ប្រកាសសាលក្រមផ្ដន្ទាទោសអតីតឧកញ៉ា ហូរ ចំរើន ដាក់ពន្ធនាគារ១៨ខែ
- ភ្នំពេញ
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី៤ តុលា ២០១៨នេះ បានប្រកាសសាលក្រមសម្រេច ផ្ដន្ទាទោសអតីតឧកញ៉ា ហូរ ចំរើន…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី៤ តុលា ២០១៨នេះ បានប្រកាសសាលក្រមសម្រេច ផ្ដន្ទាទោសអតីតឧកញ៉ា ហូរ ចំរើន ដាក់ពន្ធនាគារ១៨ខែ ក្រោមការចោទប្រកាន់ពីបទ គំរាមកំហែងថានឹងសម្លាប់ តាមមាត្រា២៣៣ នៃក្រមព្រហ្មទណ្ឌ ពាក់ព័ន្ធករណីផ្ទុះអាវុធ នាល្ងាចថ្ងៃទី២១ មេសា នៅក្នុងផ្ទះលេខ២៧៣ សង្កាត់ព្រៃស ខណ្ឌដង្កោ រាជធានីភ្នំពេញ សាលក្រមបានបើកផ្លូវទុកឲ្យជនជាប់ចោទប្ដឹងឧទ្ធរណ៍តាមកំណត់ច្បាប់។ ក្រោយសាលក្រមនេះ បានប្រកាសចប់ ចៅក្រមជំនុំជម្រះបានបង្គាប់ទៅអនុរក្សពន្ធនាគារនាំខ្លួនលោក ហូរ ចំរើន ទៅឃុំខ្លួននៅពន្ធនាគារព្រៃសវិញ ដោយរង់ចាំអនុវត្តទោសតាមសាលក្រមនេះ បើសិនគ្មានបណ្តឹងឧទ្ធរណ៍នោះទេ។
គួររំឮកថា អតីតឧកញ៉ា ហូរ ចំរើន ជាប់ចោទពីបទគំរាមកំហែងថានឹងសម្លាប់ ពាក់ព័ន្ធនឹង ការផ្ទុះអាវុធកាលពីថ្ងៃទី២១ មេសា ឆ្នាំ២០១៨ ប៉ុន្តែក្នុងសវនាការ លោក ហូរ ចំរើន បានបដិសេធថាខ្លួនមិនបានផ្ទុះនោះទេ ហើយថាថ្ងៃកើតហេតុក៏ខ្លួនមិនបានដឹងដែរ។ នៅវេលាម៉ោងប្រហែល៣ រសៀល ពេលលោកមកដល់ផ្ទះ ក៏មិនឃើញមានរឿងអីដែរ ស្រាប់តែបន្តិចក្រោយមក បានឃើញព័ត៌មានចុះផ្សាយ ក្នុងសង្គមហ្វេសប៊ុកថា លោកបានប្រើប្រាស់កាំភ្លើងខ្លីបាញ់គំរាមម្ដាយក្មេក និងប្រពន្ធកូន ឃើញដូច្នោះលោកក៏បានយកកាំភ្លើងខ្លីនោះ ទៅប្រគល់ឲ្យអង្គភាពវិញ ហើយក៏បានបកស្រាយតាមទូរទស្សន៍ក្នុងស្រុក បញ្ជាក់ថា ពុំមានករណីផ្ទុះអាវុធនៅក្នុងផ្ទះរបស់លោកទេ។
គួររំឮកទៀតថា រាល់ពេលសវនាការ គេតែងបានឃើញប្រពន្ធ និង ម្ដាយក្មេកលោកឧកញ៉ា ហូរ ចំរើន ចូលរួមធ្វើជាសាក្សីដោះបន្ទុកជនជាប់ចោទ រួមទាំងនាយនគរបាលប៉ុស្តិ៍រដ្ឋបាលសង្កាត់ ព្រៃសផងដែរ។ សាក្សីដោះបន្ទុកទាំងនោះ បានបញ្ជាក់ចម្លើយប្រហាក់ប្រហែលគ្នាថា នៅថ្ងៃដែលថាកើតហេតុនោះ គឺគេមិនបានឮស្នូរផ្ទុះអាវុធដូចដែលព័ត៌មានចុះផ្សាយនោះទេ ហើយនៅផ្ទះនោះក៏គ្មានហេតុការណ៍អ្វីកើតឡើងដែរ។ បើទោះបីជនជាប់ចោទ និងសាក្សីបានបដិសេធ នៅក្នុងសវនាការយ៉ាងណាក្តី តាមពាក្យបណ្ដឹងរបស់ស្នងការដ្ឋានស្រាវជ្រាវ សន្តិសុខ នៃកងអង្គរក្សបានបង្ហាញថា លោក ហូរ ចំរើន ពិតជាបានផ្ទុះអាវុធបង្កសំឡេងឲ្យមានការភ្ញាក់ផ្អើល និង ថែមទាំងគេចវេសមិនចូលអង្គភាពទៀតផង។
ពាក្យបណ្តឹងឲ្យដឹងទៀតថា អតីតឧកញ៉ា ហូរ ចំរើន មានបញ្ហាវិវាទក្នុងការ រកស៊ីទិញលក់ដីធ្លី ជាមួយក្រុមហ៊ុនក្នុងស្រុក និងក្រៅស្រុកទៀត ដែលនោះជាបញ្ហារបស់បុគ្គល និង បុគ្គលត្រូវដោះស្រាយតាមផ្លូវតុលាការទេ។ ក្រោយចប់ការសាកសួរដេញដោល លើជនជាប់ចោទ និង សាក្សីដាក់បន្ទុកដោះបន្ទុករួចហើយ លោក ស៊ិន វិរៈ ព្រះរាជអាជ្ញារង និងជាតំណាងអយ្យការក្នុងសំណុំរឿងក្តីនេះ បានធ្វើសេចក្ដីសន្និដ្ឋាន និងបញ្ជាក់ថា ពិតជាមានការផ្ទុះអាវុធនៅក្នុងផ្ទះលោក ហូរ ចំរើន ដោយផ្ដើមចេញពីជម្លោះប្ដីប្រពន្ធនោះមែន ហើយតំណាងអយ្យការ នៅតែស្នើឲ្យសុំទៅចៅក្រមជំនុំជម្រះឲ្យសម្រេចតាមផ្លូវច្បាប់។
ដោយយោងលើពាក្យបណ្តឹង និងការសន្និដ្ឋានចោទពីសំណាក់តំណាងអយ្យការ លោក លាង សំណាត់ ចៅក្រមជំនុំជម្រះបានបានផ្អាកសវនាការ ថយទៅពិចារណារយៈពេល១៥ នាទី បន្ទាប់មកបានប្រកាសសាលក្រមសម្រេចផ្ដន្ទាទោស លើជនជាប់ចោទអតីតឧកញ៉ា ហូរ ចំរើន ដាក់ពន្ធនាគារកំណត់១៨ខែ (១ឆ្នាំកន្លះ) ពីបទគំរាមកំហែងថា និងសម្លាប់ តាមមាត្រា២៣៣ នៃក្រមព្រហ្មទណ្ឌ៕
ចែករំលែកព័តមាននេះ