រាជធានីភ្នំពេញ ៖ យុវសិស្សជាជនសជនសង្ស័យម្នាក់ ត្រូវបានកម្លាំងមានសមត្ថកិច្ចខណ្ឌចម្ការមន ធ្វើការចាប់ឃាត់ខ្លួន ក្រោយពីរូបគេបានជិះ ម៉ូតូមួយគ្រឿងតែម្នាក់ឯង ធ្វើសកម្មភាពឆក់យកទូរស័ព្ទដៃ ម៉ាក Iphone7 plus មួយគ្រឿង ពីបុរសម្នាក់ដែលកំពុងតែដើរហាត់ប្រាណតាមផ្លូវបណ្តើរ ដៃម្ខាងនិយាយបណ្តើរ ហើយព្យាយាមជិះម៉ូតូ រត់ក៏ត្រូវបានកម្លាំងល្បាតធ្វើការដេញរហូតដល់ម្តុំ មុខព្រះបរមរាជវាំងទើបចាប់បាន។ ករណីចោរឆក់នេះដែរបាន កើតឡើងកាលពីវេលាម៉ោង ៣ និង១៥នាទីរសៀល ថ្ងៃទី២៥ ខែកញ្ញា ឆ្នាំ២០១៨ នៅចំណុចមុខផ្ទះលេខ ៥៩ ផ្លូវលេខ១០៥ (ផ្លូវមាត់លូទឹកស្អុយ) ក្នុងសង្កាត់បឹងកេងកងទី៣ ខណ្ឌចម្ការមន។
តាមប្រភពព័ត៌មាន ពីនគរបាលបានប្រាប់ឱ្យដឹងថា យុវជនជាជនសង្ស័យមានឈ្មោះ នង ពៀក អាយុ១៧ឆ្នាំ ជាសិស្ស រៀនថ្នាក់ទី១០ នៃសាលាវិទ្យាល័យព្រះយុគន្ធរ ស្នាក់នៅផ្ទះលេខ១៣៣ ផ្លូវលេខ១៤៣ ក្នុងសង្កាត់បឹងកេងកងទី៣ ខណ្ឌចម្កការមន។ ចំណែកឯជនរងគ្រោះមានឈ្មោះ សៀង សំណាង ភេទប្រុស អាយុ៤១ឆ្នាំ មានទីលំនៅក្នុងសង្កាត់បឹងកេងកងទី៣ ខណ្ឌចម្ការមន។ មុនពេលកើតហេតុ បុរសរងគ្រោះបានចេញពីផ្ទះដើរហាត់ប្រាណនៅតាមបណ្តោយផ្លូវលេខ១០៥ តែម្នាក់ឯង ដោយបានដើរបណ្តើរ និងដៃម្ខាងកាន់ទូរស័ព្ទដៃម៉ាក Iphone 7plus ព៌ណខ្មៅ មួយគ្រឿងនិយាយបណ្តើរ។
តាមប្រភពដដែលបានប្រាប់បន្តទៀតថា លុះពេលដែលបុរសជាជនរងគ្រោះដើរហាត់ប្រាណមកដល់ចំណុចមុខផ្ទះខាងលើ ក៏ស្រាប់តែ លេចមុខយុវជនជាជនសង្ស័យម្នាក់ខាងលើជិះម៉ូតូម៉ាក YAMAHA SIRIUS ពណ៌ខ្មៅ ពាក់ស្លាកលេខ ប.មានជ័យ ១Q-៤៨៧២ មកអែបក្បែរ និងធ្វើសកម្មភាពឆក់យកទូរស័ព្ទដៃម៉ាក Iphone 7plus មួយគ្រឿងនោះពីជនរងគ្រោះ បានហើយជិះម៉ូតូរត់គេចខ្លួនតែម្តង។ ភ្លាមនោះបុរសជាជនរងគ្រោះបានរត់ដេញតាម និងស្រែកថា <<ចោរៗ>> ពីក្រោយ ទើបធ្វើឲ្យមានការភ្ញាក់ផ្អើលទៅដល់កម្លាំងអន្តរាគមន៍ ដែលកំពុងតែនាំគ្នាធ្វើការដើរល្បាតជួយជិះដេញតាមរហូតទៅដល់មុខព្រះបរមរាជវាំង ក្នុងភូមិសាស្ត្រខណ្ឌដូនពេញ ទើបតាមទាន់ និងចាប់ខ្លួនបានព្រមទាំងដកហូតយកទូរស័ព្ទដៃមួយ គ្រឿងយកមកវិញបានផងដែរ។
ក្រោយពេលកើតហេតុ កម្លាំងមានសមត្ថកិច្ចក៏បានធ្វើការប្រគល់ ទូរស័ព្ទដៃម៉ាក Iphone 7plus មួយគ្រឿងនោះទៅឲ្យបុរសជាអ្នកហាត់ប្រាណរងគ្រោះវិញ ចំណែកឯយុវជនជាជនសង្ស័យក៏បាននាំខ្លួនយកមកកាន់ប៉ុស្តិ៍នគរបាលបឹងកេងកងទី៣ ដើម្បីធ្វើការសាកសួរ និងកំណត់ហេតុបញ្ជូនទៅកាន់អធិការនគរបាលខណ្ឌចម្ការមន ចាត់ការទៅតាមផ្លូវច្បាប់ជាបន្តទៀត៕
https://youtu.be/sZMVjydvaYc
ចែករំលែកព័តមាននេះ