រាជធានីភ្នំពេញ ៖ ម្ចាស់ពាន Cambodian Idol រដូវកាលទី១លោកនី រតនា បានភ្ជាប់ពាក្យកាលពីព្រឹកថ្ងៃទី២៧ ខែមេសា ឆ្នាំ២០១៨ជាមួយកូនអ្នកជំនួញនាំចូលគ្រឿងសំអាងដ៏ធំមួយនៅរាជធានីភ្នំពេញ…
រាជធានីភ្នំពេញ ៖ ម្ចាស់ពាន Cambodian Idol រដូវកាលទី១លោកនី រតនា បានភ្ជាប់ពាក្យកាលពីព្រឹកថ្ងៃទី២៧ ខែមេសា ឆ្នាំ២០១៨ជាមួយកូនអ្នកជំនួញនាំចូលគ្រឿងសំអាងដ៏ធំមួយនៅរាជធានីភ្នំពេញ ។
ពិធីភ្ជាប់ពាក្យបានធ្វើឡើងនៅបុរីប៉េងហ៊ួត ស្ទឹងមានជ័យ ដោយមានការចូលរួមពីសាច់ញាតិទាំងសងខាង ជាពិសេសនោះមិត្តភក្តិសិល្បៈជាច្រើននាក់ ។
ពិធីភ្ជាប់ពាក្យរបស់លោកនី រតនា កើតឡើងបន្ទាប់ពីមានពាក្យចចាមអារ៉ាម ក៏ដូចជាការចុះផ្សាយពីសារព័ត៌មានក្នុងស្រុកនានា ស្តីពីចំណងស្នេហ៍របស់លោកជាមួយកូនស្រីម្ចាស់ហាងគ្រឿងសំអាងដែលលោកក៏ជាតំណាងនាំចូលផលិតផលដ៏ធំមួយនេះផងដែរ។
លោកនី រតនា ហាក់មិនសូវចាប់អារម្មណ៍ពីការលេចឮរឿងរ៉ាវនោះទេ បើទោះបីជាអ្នកទាំងពីរបានលួចបង្កាត់ភ្លើងស្នេហ៍យ៉ាងត្រជាក់ល្ហឹមជាមួយគ្នាប្រមាណជាង២ឆ្នាំនេះក៏ដោយ ។
ទីបំផុតពិធីភ្ជាប់ពាក្យរបស់លោកនី រតនា បានលេចចេញជាផ្លូវការដូចអ្វីដែលគេបានសន្និដ្ឋាននោះ ។
តារាចម្រៀងវ័យក្មេងប្រចាំផលិតកម្មរស្មីហង្សមាសលោកនី រតនា បានអះអាងថា អនាគតភរិយារបស់លោកឈ្មោះហេង សុវណ្ណភក្ដិណា បានមើលចិត្តថ្លើមគ្នារយៈពេល២ឆ្នាំមកហើយ ។ លោកបញ្ជាក់ថា «ពួកយើងបានមើលចិត្តគ្នា ស្គាល់គ្នាមុនដំបូងតាមរយៈការលេងហ្វេសប៊ុក ហើយលោកបានសម្រេចជ្រើសរើសគាត់មកធ្វើជាគូអនាគតគឺដោយសារគាត់ ជាមនុស្សគួរឲ្យស្រឡាញ់ ចេះគោរពចាស់ទុំ និងចេះឲ្យតម្លៃមនុស្សនៅជុំវិញខ្លួន »។
បើទោបីជាពិធីភ្ជាប់ពាក្យរបស់លោកនី រតនា បានធ្វើឡើងយ៉ាងឱឡារិកក៏ដោយ ប៉ុន្តែសាមីខ្លួនផ្ទាល់ហាក់នៅមិនទាន់បានបញ្ចេញពីគម្រោងចូលរោងការនៅពេលណាឡើយ ក្នុងពេលដែលអាជីពសិល្បៈរបស់លោកកំពុងមានសន្ទុះខ្លាំង ។
ដំណឹងពីការភ្ជាប់ពាក្យរបស់លោកនី រតនា នាពេលនេះបានទទួលការសាទរពីមិត្តភក្តិ និងប្រិយមិត្តគាំទ្ររបស់លោកជាច្រើន ក្នុងពេលដែលលោករកបានគូជីវិតសក្តិសមជាមួយលោកនាពេលនេះ ៕
ចែករំលែកព័តមាននេះ