ខេត្តសៀមរាប ៖ ផ្ទះប្រជាពលរដ្ឋលក់ចាប់ហួយនៅជាន់ទី២ សម្រាប់ទុកអីវ៉ាន់ ក្នុងបុរីសៀងណាំ ខាងកើតផ្សារលើធំថ្មី ចម្ងាយជាង២គីឡូម៉ែត្រ បង្កឱ្យមានការភ្ញាក់ផ្អើលទាំងព្រឹក ដោយត្រូវបាន អគ្គិភ័យមួយលេបត្របាក់…
ខេត្តសៀមរាប ៖ ផ្ទះប្រជាពលរដ្ឋលក់ចាប់ហួយនៅជាន់ទី២ សម្រាប់ទុកអីវ៉ាន់ ក្នុងបុរីសៀងណាំ ខាងកើតផ្សារលើធំថ្មី ចម្ងាយជាង២គីឡូម៉ែត្រ បង្កឱ្យមានការភ្ញាក់ផ្អើលទាំងព្រឹក ដោយត្រូវបាន អគ្គិភ័យមួយលេបត្របាក់ អស់ស្ទើរទាំងស្រុង សំណាងល្អបានអ្នកជិតខាង និងភ្នាក់ងារពន្លត់ អគ្គិភ័យរបស់ស្នងការនគរបាលខេត្ត និង ភ្នាក់ងារពន្លត់អគ្គិភ័យរបស់កងរាជអាវុធហត្ថខេត្តជួយទាន់ កុំអីអស់រលីងគ្មានសល់ ហើយប្រហែលសងគេជុំវិញទៀតផង ខណៈនោះពុំមាននរណាម្នាក់ រងរបួស ឬ ស្លាប់នោះឡើយ។ ក្នុងហេតុការណ៍ឆេះផ្ទះលក់ចាប់ហួយនោះបានកើតឡើងនៅក្នុងបរិវេណបុរីសៀងណាំ ទល់មុខផ្សារបុរីសៀងណាំ កាលពីវេលាម៉ោង១០ និង១៥នាទីព្រឹក ថ្ងៃទី២ កុម្ភៈ ឆ្នាំ២០១៨នេះ ស្ថិតនៅក្នុងភូមិខ្នារ សង្កាត់ជ្រាវ ក្រុង/ខេត្តសៀមរាប។
លោកវរសេនីយ៍ទោ អ៊ុន ភិរម្យ នាយរង ការិយាល័យបង្ការពន្លត់អគ្គិភ័យ និងសង្គ្រោះបានប្រាប់នៅរសៀលថ្ងៃទី២ ខែកុម្ភៈ ឆ្នាំ២០១៨នេះថា ក្រោយពីបានទទួលបានព័ត៌មានភ្លាម ទើបកម្លាំងជំនាញ បានចុះជួយអនរ្តរាគមន៍ទៅដល់កន្លែង កើតហេតុពន្លត់ភ្លាមៗ ដឹកនាំកម្លាំងពន្លត់ ដោយលោកវរសេនីយ៍ឯក ភឹង សម្បត្តិ ស្នងការរង ទទួលការិយាល័យបង្ការ និងពន្លត់អគ្គិភ័យ។ លោកបានបន្តថា ក្នុងការចេញជួយសង្គ្រោះអគ្គិភ័យ នាពេលនោះ គឺកម្លាំងជំនាញបានប្រើប្រាស់រថយន្តពន្លត់អគ្គិភ័យអស់ចំនួន៥គ្រឿង ក្នុងនោះមាន រថយន្តអគ្គិភ័យរបស់ស្នងការដ្ឋាន នគរបាលខេត្តចំនួន៤គ្រឿង និងរថយន្តពន្លត់អគ្គិភ័យ របស់ កងរាជអាវុធហត្ថខេត្តចំនួន១គ្រឿង ដោយប្រើប្រាស់ទឹកអស់៥ គ្រឿង ទើបបានរលត់ទៅបាត់ទាំងស្រុង នៅវេលាម៉ោង១១ និង២០នាទី ថ្ងៃត្រង់ថ្ងៃខែឆ្នាំដដែល។
លោកបានបញ្ជាក់ថា ជនរងគ្រោះជាម្ចាស់ផ្ទះមាន ឈ្មោះ គីម ហៀក ភេទស្រី អាយុ៥០ឆ្នាំ មុខរបរលក់ដូរ មានស្រុកកំណើតនៅភូមិ ស្ទឹងសែន ឃុំស្ទឹងសែន ស្រុកស្ទឹងសែន ខេត្តកំពង់ធំ បច្ចុប្បន្នរស់នៅក្នុងបុរីសៀងណាំ ក្នុងភូមិខ្នា សង្កាត់ជ្រាវ ក្រុងសៀមរាប។ សម្ភារដែលខូចខាតមួយចំនួនដូចជា៖ ខោទឹកនោម៥០បេ -ក្រដាស់៥០បេ-ពូក១-កង្ហារ១ និងផ្ទះល្វែងឆេះអស់មួយចំនួន។ ផ្ទះនោះធ្វើអំពីថ្មប្រក់សង្ក័សីកម្ពស់៣ជាន់(ឆេះជាន់ទី២)ទំហំ៤,៥០ម×១០ម។ មូលហេតុបណ្តាលមកពីទុស្សេខ្សែភ្លើង អគ្គិភ័យខាងលើនេះមិនបណ្តាលឱ្យមានគ្រោះថ្នាក់ដល់មនុស្សទេ៕
ចែករំលែកព័តមាននេះ