ផ្អើលរថយន្តវៀតណាម ចូលដឹកគ្រញូងដល់ឃ្លាំង នៅកណ្តាលក្រុងស្វាយរៀង
ខេត្តស្វាយរៀង ៖ លោក អ៊ីវ ឯកសាវតី មន្ត្រីរដ្ឋបាលព្រៃឈើថ្នាក់កណ្តាល សហការជាមួយមន្ត្រីនៃមន្ទីរកសិកម្មខេត្ត បានស្ទាក់ចាប់រថយន្ត១គ្រឿងពាក់ផ្លាកលេខ
ខេត្តស្វាយរៀង ៖ លោក អ៊ីវ ឯកសាវតី មន្ត្រីរដ្ឋបាលព្រៃឈើថ្នាក់កណ្តាល សហការជាមួយមន្ត្រីនៃមន្ទីរកសិកម្មខេត្ត បានស្ទាក់ចាប់រថយន្ត១គ្រឿងពាក់ផ្លាកលេខវៀតណាម ចំណុះ៨តោនដែលដឹកឈើគ្រញូងពេញទ្រុង និងឃាត់ខ្លួនអ្នកបើកបរម្នាក់នៅភូមិគយត្របែក សង្កាត់គយត្របែក ក្រុងស្វាយរៀង កាលពីវេលាម៉ោង១រំលងអធ្រាត្រថ្ងៃទី១៤ កុម្ភៈ និងដកហូតរថយន្តនិងឈើគ្រញូងប្រមាណជា១០ម៉ែត្រគូប ។
តាមមន្ត្រីខណ្ឌរដ្ឋបាលព្រៃឈើស្វាយរៀងបានបង្ហើបឲ្យដឹងថា រថយន្តដឹកគ្រញូងនេះម៉ាកហ៊ីយ៉ាន់ដាយ ពាក់ផ្លាកលេខវៀតណាម៦៧L ៣៧០៦ ចំណុះ៨តោន បានបើកចូលមកដឹកឈើគ្រញូងចេញពីផ្ទះ ឈ្មោះ ពេជ្រ យីុ ជាមន្ត្រីយោធា អនុប្រធានប៉ុស្តិ៍វរៈការពារព្រំដែនសំយោង មានទីលំនៅភូមិឡ សង្កាត់ពោធិ៍តាហោ ក្រុងស្វាយរៀង ខេត្តស្វាយរៀង ។
ប្រភពដដែលបន្តថា រថយន្តដឹកឈើគ្រញូងមួយគ្រឿងនេះប្រុងដឹកឆ្លងដែនទៅប្រទេសវៀតណាមវិញ តាមច្រករបៀងសំយោង ស្ថិតនៅឃុំសំយោង ស្រុកកំពង់រោទ៍ ក៏ប៉ុន្តែត្រូវកម្លាំងសមត្ថកិច្ចចុះស្ទាក់បង្ក្រាបបានពេលជនល្មើសដឹកចេញពីផ្ទះរបស់ឈ្មោះ ពេជ្រ យី បានប្រមាណជា៣គីឡូម៉ែត្រ ។
បច្ចុប្បន្នព្រះរាជអាជ្ញាអមសាលាដំបូងខេត្តស្វាយរៀង បាននិងកំពុងដឹកនាំកម្លាំងព័ទ្ធផ្ទះឈ្មោះ ពេជ្រ យី ដើម្បីប្រមូលវត្ថុតាងបន្ថែមទៀត និងបានបញ្ជូនរថយន្តនិងឈើគ្រញូង មកកាន់ខណ្ឌរដ្ឋបាលព្រៃឈើស្វាយរៀងដើម្បីធ្វើការថ្លឹងនៅវេលាព្រឹកថ្ងៃដដែល ៕
ចែករំលែកព័តមាននេះ