ឆក់ខ្សែកប៉ះចំជើងចាស់ មានអីតាដេញតាមឥតសំចៃវ៉ៃគ្មានប្រណី
រាជធានីភ្នំពេញ ៖ ក្មេងស្ទាវឈាមរាវស្ទើរភ្លើងបីនាក់ឃើញអ៊ុំប្រុសម្នាក់ពាក់ខ្សែកធំៗក៏រមាស់ដៃបែកគំនិតដេញឆក់ តែមិនបានសម្រេចត្រូវម្ចាស់ដេញតាមទាន់ស្រែកចោរៗ
រាជធានីភ្នំពេញ ៖ ក្មេងស្ទាវឈាមរាវស្ទើរភ្លើងបីនាក់ឃើញអ៊ុំប្រុសម្នាក់ពាក់ខ្សែកធំៗក៏រមាស់ដៃបែកគំនិតដេញឆក់ តែមិនបានសម្រេចត្រូវម្ចាស់ដេញតាមទាន់ស្រែកចោរៗ ពេលនោះប្រជាពលរដ្ឋជូនកាដូរថ្ងៃបុណ្យសេចក្ដីស្រលាញ់ម្នាក់មួយដៃមួយជើងទើបប្រគល់ឲ្យសមត្ថកិច្ចដាក់កងដៃអាល័យស្នេហ៍យកទៅសាកសួរ។ ហេតុការណ៍នេះបានកើតឡើងកាលពីវេលាម៉ោង ៧និង០០នាទីយប់ ថ្ងៃទី១៤ ខែកុម្ភ ឆ្នាំ២០១៦ ត្រង់ចំណុចមុខសាកលវិទ្យាល័យ មេគង្គ ស្ថិតតាមបណ្ដោយផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ ហើយឃាត់ខ្លួនបានត្រង់ចំណុចខាងកើតឃ្លាំងដឹកជញ្ជូនហាក់ម៉ៅ ប្រមាណ៥០មែត្រ ស្ថិតតាមបណ្ដោយផ្លូវ២០០២ ស្ថិតក្នុងសង្កាត់ទឹកថ្លា ខណ្ឌសែនសុខ។
តាមប្រភពព័ត៌មានពីជនរងគ្រោះមានឈ្មោះ ហួន ជា ភេទប្រុស អាយុ៧២ឆ្នាំ មុខរបរលក់ដូរ ស្នាក់នៅផ្ទះលេខ២២៩ សង្កាត់ក្រាំធ្នង់ ខណ្ឌសែនសុខ បានឲ្យដឹងថា មុនពេលកើតហេតុរូបគាត់បានជិះម៉ូតូមួយគ្រឿងម៉ាក Zoomer-X ពណ៌ក្រហម ពាក់ស្លាកលេខ ភ្នំពេញ1GB-7168 បើកបរតាមផ្លូវ២៧១ ក្នុងទិសដៅពីជើងទៅត្បូងលុះមកដល់ចំណុចមុខកន្លែងកើតហេតុស្រាប់តែមានជនសង្ស័យបីនាក់ជិះម៉ូតូមួយគ្រឿងម៉ាកហុងដាឌ្រីមសេរ៊ីឆ្នាំ២០១៣ ពណ៌ខ្មៅពាក់ស្លាកលេខ ភ្នំពេញ 1CF-5953 បានជិះមកពីក្រោយហើយវ៉ាពីខាងស្ដាំ និងបានធ្វើសកម្មភាពឆក់ខ្សែកប្លាទីនដែលជនរងគ្រោះពាក់នៅនឹងកមានទម្ងន់២តម្លឹងកន្លះ។
តែជាសំណាងរបស់ជនរងគ្រោះដោយជនសង្ស័យឆក់មិនបានសម្រេច ហើយភ្លាមនោះជនរងគ្រោះដែលជាជើងចាស់មួយរូបនោះបានជិះម៉ូតូដេញតាមពីក្រោយហើយស្រែកថាចោរៗរហូតដល់ចំណុចកើតហេតុទើបដេញទាន់ហើយស្រែកឆោឡោផ្អើលប្រជាពលរដ្ឋនៅម្ដុំនោះរត់មកជូនកាដូដល់ជនសង្ស័យម្នាក់មួយដៃមួយជើងទើបប្រគល់ឲ្យសមត្ថកិច្ចចាប់វាយខ្នោះដឹកបញ្ជូនយកទៅប៉ុស្ដិ៍នគរបាលរដ្ឋបាលទឹកថ្លាដើម្បីធ្វើការសាកសួរ។
បើតាមប្រភពពីសមត្ថកិច្ចបានឲ្យដឹងថា ជនសង្ស័យខាងលើ មានឈ្មោះ ចន្ទ សុបញ្ញា ភេទប្រុស អាយុ១៧ មុខរបរសិក្សថ្នាក់ទី១០ សាលាសាមគ្គី ស្នាក់នៅផ្សារត្រពាំងឈូក សង្កាត់ទឹកថ្លា ខណ្ឌសែនសុខ មានស្រុកកំណើតក្នុងភូមិស្រុកត្រាំកក់ ខេត្តតាកែវ ជាអ្នកជិះកណ្ដាល រីឯឈ្មោះ ណូត ថាន់ណាហ្វី អាយុ១៧ រៀននៅថ្នាក់ទី៥ សាលាអូរបែកក្អម ស្នាក់នៅផ្ទះជួល ភូមិផ្សារបឹងឈូក សង្កាត់ទឹកថ្លា ខណ្ឌសែនសុខ ជាអ្នកកាន់ចង្កូត និងឈ្មោះ ម៉ៅ រ៉ា ភេទប្រុស អាយុ១៧ឆ្នាំ មុខរបរនៅរៀន ឯខេត្ត ស្នាក់ម្ដុំបាក់ទូក សង្កាត់វាលវង់ ខណ្ឌ៧មករា មានស្រុកកំណើតភូមិស្អំ ឃុំក្រែក ស្រុកក្រែក ខេត្តត្បូងឃ្មុំ ជាអ្នកជិះពីក្រោយ និងជាជនដៃដល់ផងដែរ។ ក្រោយពេលកើតហេតុអ្នកទាំងបីនាក់ត្រូវបានកសាងសំណុំរឿង និងបញ្ជូនបន្តទៅកាន់អធិការដ្ឋានខណ្ឌសែនសុខ រង់ចាំការចាត់ការទៅតាមនីតិវិធី៕
ចែករំលែកព័តមាននេះ