ខេត្តកណ្ដាល ៖ អគ្គីភ័យមួយបានឆាបឆេះឃ្លាំងដាក់សម្ភារនៅក្នុងរោងចក្រកាត់ដេរ《QMI》ទាំងយប់ដែលសង្ស័យបណ្ដាលមកពីទុស្សេខ្សែភ្លើង ហើយបានបណ្ដាលឲ្យរងការខូចខាតឃ្លាំង និងសម្ភារនៅក្នុងនោះទាំងស្រុង។ ប៉ុន្តែមិនបានបណ្ដាលឲ្យឆេះរាលដាលដល់ អាគារផ្សេងនៅរោងចក្រនោះទៀតទេ ដោយសារតែ នគរបាលស្រុកអង្គស្នួលបាននាំយករថយន្តពន្លត់អគ្គីភ័យចំនួន២គ្រឿងដែលប្រចាំការនៅ អធិការដ្ឋានស្រុក ទៅបាញ់ពន្លត់ទាន់ពេលវេលា និងប្រើប្រាស់ទឹកអស់ចំនួន៤ស៊ីទែន។
ហេតុការណ៍នោះបានកើតឡើង កាលពីវេលាម៉ោង៨និង៤៥នាទីយប់ ថ្ងៃទី១៩ ខែមករា ឆ្នាំ២០១៧ នៅក្នុងរោងចក្រកាត់ដេរ《QMI》ដែលមានទីតាំងស្ថិតនៅក្នុងភូមិត្រយឹង ឃុំពើក ស្រុកអង្គស្នួល ខេត្តកណ្ដាល។ នគរបាលស្រុកអង្គស្នួលបានឲ្យដឹងថា មូលហេតុដែលបណ្តាលឲ្យមានការឆាបឆេះនោះ គឺសង្ស័យមកពីទុស្សេខ្សែភ្លើង ហើយឃ្លាំងនោះសាងសង់ពីបេតុង ដំបូលប្រក់សង្ក័សី មានកម្ពស់៣ម៉ែត្រ បណ្តោយ៦ម៉ែត្រ និងទទឹង៤ម៉ែត្រ ក្រោយពេលឆេះមានស្នាមប្រេះជាច្រើនកន្លែង។
ដោយឡែកសម្ភារ នៅក្នុងឃ្លាំងនោះ ត្រូវបានភ្លើងឆេះដែរមានដូចជា ទូរឈើចំនួន៣ ម៉ាស៊ីនបោកខោអាវ ចំនួន២គ្រឿង,សាឡុង និងពូកចំនួន៣ , ធុងបាស់ចំនួន២គ្រឿង,ធុងថ្នាំអូសាវ៉ែលលាងបន្ទប់ទឹកចំនួន១០ធុង,ធ្នើរដែកសម្រាប់ក្រាលក្តារឈើចំនួន៤, អំភ្លី១គ្រឿង,សំបកដបទឹកសុទ្ធ(ថ្មី)មិនទាន់ប្រើចំនួន៤៦០០សំបកដប ,និងសម្ភារបន្ទាប់បន្សំមួយចំនួនទៀត។ ប្រភពដដែលបានបន្តទៀតថា នៅមុនពេលកើតហេតុ អ្នកស្នាក់នៅក្នុងរោងចក្រនោះ បានឮសំឡេងផ្ទុះប្រាវៗ លុះមួយសន្ទុះក្រោយមកស្រាប់តែមាន អណ្ដាតភ្លើង និងផ្សែងហុយចេញពីក្នុងទីតាំងឃ្លាំងមួយនោះយ៉ាងឆាប់រហ័ស ទើបគេដឹងថាឃ្លាំងនោះត្រូវបានភ្លើងឆេះ ហើយនៅក្នុងខណៈនោះ មិនមានមនុស្សស្នាក់នៅក្នុងនោះឡើយ។
ភ្លាមៗនោះកម្លាំងនគរបាលស្រុកអង្គស្នួល បានចេញអន្តរាគមន៍ដោយនាំយករថយន្តពន្លត់អគ្គិភ័យដែលប្រចាំការនៅអធិការដ្ឋានស្រុកអង្គស្នួល ចំនួន២គ្រឿងទៅបាញ់ពន្លត់ ដោយប្រើប្រាស់ទឹកអស់ ចំនួន៤ស៊ីទែន រួមនឹងបំពង់ពន្លត់អគ្គីភ័យរបស់រោងចក្រអស់ចំនួន៥៣បំពង់ទៀត ទើបភ្លើងរលត់ទៅវិញទាំងស្រុងនៅមោង៩និង៣០នាទីយប់ និងមិនបានឆេះរាលដាលដល់អាគារផ្សេងទៀតរបស់រោងចក្រឡើយ៕
ចែករំលែកព័តមាននេះ