ខេត្តកំពង់ស្ពឺ ៖ នគរបាលស្រុកភ្នំស្រួចបានរងការរិះគន់យ៉ាងចាស់ដៃពីសំណាក់ប្រជាពលរដ្ឋយ៉ាងចាស់ដៃ បន្ទាប់ពីចាប់ខ្លួនស្ត្រីអ្នករើសអេតចាយម្នាក់ដោយចោទប្រកាន់ថា …
ខេត្តកំពង់ស្ពឺ ៖ នគរបាលស្រុកភ្នំស្រួចបានរងការរិះគន់យ៉ាងចាស់ដៃពីសំណាក់ប្រជាពលរដ្ឋយ៉ាងចាស់ដៃ បន្ទាប់ពីចាប់ខ្លួនស្ត្រីអ្នករើសអេតចាយម្នាក់ដោយចោទប្រកាន់ថា បានបានលួចដែករបស់ក្រុមហ៊ុនឯកជនមួយ ដែលតាមធាតុពិតស្ត្រីសង្ស័យគ្រាន់តែជាន់ដានចោរសោះ ក៏កសាងសំណុំរឿងបញ្ជូនទៅចាត់ការតាមច្បាប់ដែរ ។
មន្ត្រីនគរបាលព្រហ្មទណ្ឌខេត្តកំពង់ស្ពឺ បានឲ្យដឹងថា ស្ត្រីសង្ស័យឈ្មោះ សោម សុខ ហៅ នី សុខ អាយុ២៥ឆ្នាំ ជាអ្នករើសអេតចាយ រស់នៅក្នុងភូមិពាមអន្ទង់ ឃុំតាំងសំរោង ស្រុកភ្នំស្រួច ខេត្តកំពង់ស្ពឺ ត្រូវបានសមត្ថកិច្ចប៉ុស្តិ៍រដ្ឋបាលឃុំត្រែងត្រយឹងចាប់ខ្លួនកាលពីល្ងាចថ្ងៃទី១៩ ខែមករា ឆ្នាំ២០១៧ នៅចំណុចភូមិទី១ ឃុំត្រែងត្រយឹង តាមពាក្យបណ្តឹងរបស់ឈ្មោះ ជៀន គីមយ៉ូ រស់នៅរាជធានីភ្នំពេញ ដែលប្តឹងចោទប្រកាន់ពីបទលួចដែក ។
ជួបជាមួយអ្នកយកព័ត៌មាន ស្ត្រីសង្ស័យបានរៀបរាប់ទាំងទឹកភ្នែកថា នាងគឺជាស្ត្រីមេម៉ាយកូន២នាក់ កូនស្រីបងអាយុ៨ឆ្នាំ កូនប្រុសប្អូនអាយុ៥ឆ្នាំ ហើយម្តាយឈ្មោះ យឹម ហេង អាយុ៥២ឆ្នាំ មានជំងឺប្រចាំកាយទៀតផង ។ តាំងពីចែកផ្លូវជាមួយប្តីរួចមក នាងបានប្រកបរបរដើររើសអេតចាយលក់យកប្រាក់ដើម្បីទិញអង្ករ និងម្ហូប ព្រមទាំងថ្នាំព្យាបាលម្តាយទៀត ។ រហូតដល់ថ្ងៃទី១៩ ខែមករា នាងបានទៅរើសកម្ទេចដែកក្នុងដីឡូត៍មួយកន្លែង គោលបំណងយកទៅលក់ដើម្បីទិញបាយឱ្យកូន និងម្តាយបានហូប ពេលកំពុងរើសក៏ស្រាប់តែត្រូវម្ចាស់គេមកចាប់ខ្លួនប្រគល់ឱ្យនគរបាល ដោយចោទថា ជាចោរលួចដែកទៅវិញ ។
ស្ត្រីសង្ស័យរៀបរាប់ទាំងទឹកភ្នែកបន្តទៀតថា បើសមត្ថកិច្ចចោទប្រកាន់ថា នាងជាចោរទៅហើយ ហើយនាងមិនមានពាក្យអ្វីប្រកែកនោះទេ មានតែទទួលផលតាមយថាកម្ម តែអ្វីដែលនាងព្រួយបារម្ភ គឺកូនៗរបស់នាងនៅតូចៗ ត្រូវការភាពកក់ក្តៅពីម្តាយនៅមើលបីបាច់ថែរក្សា បញ្ចុកនំចំណី តើពេលនាងជាប់គុកទៅមានអ្នកណាមើលថែកូនៗ ហើយម្យ៉ាងវិញទៀត អ្វីដែលធ្វើឱ្យនាងរឹតតែខ្លោចផ្សាក្នុងចិត្តទៀតនោះ គឺនាងមានម្តាយជរា ដែលមានជំងឺប្រចាំកាយទៀតផង ។
មហាជនដែលដឹងរឿងបាននាំគ្នារិះគន់ថា សមត្ថកិច្ចបង្ក្រាបបានតែចោរតូចតាចប៉ុណ្ណោះ ចំណែកករណីចោរកម្មធំៗ គេមិនដែលឃើញអស់លោកបង្ក្រាបបានម្តងណាឡើយ ។
មហាជនបាននាំគ្នាសំណូមពរដល់ស្ថាប័នសមត្ថកិច្ច ជាពិសេសស្ថាប័នអយ្យការតែម្តង សូមមេត្តាប្រោសប្រណីដល់ស្ត្រីខាងលើឱ្យមានសេរីភាព ដើម្បីត្រឡប់ទៅប្រកបរបរចិញ្ចឹមជីវិតកូនតូចៗ និងម្តាយជរាវិញផង ។
ស្ត្រីឈ្មោះ យឹម ហេង អាយុ៥២ឆ្នាំ ម្តាយស្ត្រីសង្ស័យ បានលើកដៃសំពះ និងសំណូមពរដល់តុលាការ សូមមេត្តាផ្តល់ក្តីអាណិតដល់រូបគាត់ ជួយសម្រួលឱ្យកូនស្រីរបស់គាត់រួចផុតពីការចោទប្រកាន់ ដើម្បីវិលមកផ្ទះប្រកបរបរចិញ្ចឹមកូនៗ និងរូបគាត់ជាម្តាយផង សព្វថ្ងៃគាត់រស់នៅបានអាស្រ័យលើកូនស្រីម្នាក់នេះដើររើសអេតចាយយកមកលក់ទិញថ្នាំសង្កូវព្យាបាលជំងឺគាត់ ដើម្បីមានជីវិតរស់នៅមើលឃើញមុខចៅៗ បើកូនត្រូវជាប់គុក ជីវិតគាត់ និងចៅមិនដឹងថារំពឹងលើអ្វីទៀតទេ ។
ដោយមើលឃើញពីទុក្ខលំបាកក្រុមគ្រួសារស្ត្រីជាប់ចោទខាងលើ លោក វង្ស សន អ្នកយកព័ត៌មាន«កោះសន្តិភាព»ប្រចាំខេត្តកំពង់ស្ពឺ បានបរិច្ចាគថវិកាផ្ទាល់ខ្លួនចំនួន១០ម៉ឺនរៀល ព្រមទាំងបាយទឹក នំចំណីដល់កូន និងស្ត្រីជាប់សង្ស័យ ជូនដល់ស្ត្រីជាម្តាយទុកដោះស្រាយបញ្ហាប្រឈមចំពោះមុខផងដែរ ៕
ចែករំលែកព័តមាននេះ