ខេត្តតាកែវ ៖ ជនស្ទាវម្នាក់ត្រូវប៉ូលិសឃាត់ខ្លួនទៅតាមពាក្យបណ្តឹងរបស់ឪពុក ម្តាយកុមារីរងគ្រោះអាយុ៨ឆ្នាំដោយចោទប្រកាន់ពីបទចាប់រំលោភសេពសន្ថវៈ ខណៈពេលឪពុកម្តាយមិននៅផ្ទះ ។ ជនសង្ស័យត្រូវប៉ូលិសឃាត់ខ្លួនកាលពីថ្ងៃទី៧ កក្កដា វេលាម៉ោង៨ និង៥០នាទីព្រឹក នៅសង្កាត់រកាក្រៅ ក្រុងដូនកែវ ។
មន្ត្រីប៉ូលិសក្រុងដូនកែវឱ្យដឹងថា ជនសង្ស័យឈ្មោះប៊ន ឌុន អាយុ១៧ឆ្នាំ បានចូលទៅក្នុងផ្ទះចាប់រំលោភក្មេងស្រីអាយុ៨ឆ្នាំ កាលពីថ្ងៃទី៥ កក្កដា វេលាម៉ោង៤ និង៣០នាទីរសៀល។ តាមប្រភពព័ត៌មានថា ជនសង្ស័យបានទៅផ្លាស់គោនៅក្បែរផ្ទះកុមារីរងគ្រោះ ខណៈនាងនៅតែ២នាក់បងប្អូន ។ ដោយឃើញប្អូនស្រីដេកលក់ ជាឱកាសល្អជនសង្ស័យចូលទៅចាប់រំលោភកុមារីបងទាំងកំរោលរហូតបានសំរេច។ បន្ទាប់ពីចាប់រំលោភរួច ជនសង្ស័យចាប់ឆ្កែ១ក្បាលបោកងាប់ ហើយយកដាក់ក្នុងស្បោងយួរទៅផ្ទះរបស់គេធ្វើគ្រឿងក្លែមសីុផឹកយ៉ាងសប្បាយទៀតផង។
ឪពុកម្តាយកុមារីរងគ្រោះនិយាយប្រាប់ប៉ូលិសថា ដោយមានជីវភាពខ្វះខាតពួកគាត់បានទៅលក់នំនៅរោងចក្រ លុះដល់ម៉ោង៥ល្ងាចទើបបានជួបកូនស្រី ។ ពេលទៅដល់ផ្ទះកូនស្រីរងគ្រោះបាននិយាយប្រាប់រឿងដែលកើតឡើង និងប្រាប់ពីឈ្មោះអ្នកដែលចាប់រំលោភនាង។ ពេលម្តាយពិនិត្យមើលឃើញមានឈាមធ្លាក់ពួកគាត់យកកូនទៅឱ្យគ្រូពេទ្យពិនិត្យឃើញថា កូនរបស់ពួកគាត់ត្រូវគេចាប់រំលោភមែន។
នៅចំពោះមុខប៉ូលិស ជនសង្ស័យសារភាពថា រូបគេពិតជាបានចាប់រំលោភក្មេងស្រីនោះមែន ហើយត្រូវប៉ូលិសខេត្តបញ្ជូនខ្លួនទៅសាលាដំបូងខេត្តកាលពីថ្ងៃទី៨ កក្កដា និងឃុំខ្លួននៅពន្ធនាគាររង់ចាំកាត់ទោស ៕
ចែករំលែកព័តមាននេះ