រាជធានីភ្នំពេញ ៖ កម្លាំងសមត្ថកិច្ចកងរាជអាវុធហត្ថរាជធានីភ្នំពេញ កាលពីព្រឹកថ្ងៃទី២៩ កក្កដានេះ បានបញ្ជូនជនសង្ស័យប្រុសស្រី ២នាក់ ពាក់ពន្ធករណីជួញដូរគ្រឿងញៀន និងអាវុធខ្លីចំនួន២ដើម រួមទាំងថ្នាំញៀនមួយចំនួនធំ ទៅកាន់សាលាដំបូងរាជធានីភ្នំពេញ ដើម្បីចាត់ការតាមនិតិវិធី ។
ជនសង្ស័យ២នាក់នោះ ត្រូវបានកម្លាំងកងរាជអាវុធហត្ថរាជធានី សហការណ៍ជាមួយកម្លាំងកងរាជអាវុធហត្ថខណ្ឌទួលគោក ចុះបង្ក្រាបកាលពីវេលាម៉ោង៤និង៣០នាទីរសៀលថ្ងៃទី២៦ ខែកក្កដា ឆ្នាំ២០១៦ នៅ Apartment លេខ៣៧z ផ្លូវ២៦១ ភូមិ៣ សង្កាត់បឹងសាឡាង ខណ្ឌទួលគោក ដែលកិច្ចប្រតិបត្តិការនោះ ដឹកនាំដោយលោកវរ:សេនីយ៍ត្រី ប៉ាន់ សុភាព នាយការិយាល័យប្រឆាំងបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ ក្រោមការសម្របសម្រួលពីសំណាក់លោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញផងដែរ ។
លោក ប៉ាន់ សុភាព បានឲ្យដឹងថា មុនឈានដល់ការចុះឆែកឆេរ និងឃាត់ខ្លួនរួមទាំងវត្ថុតាងខាងលើគឺ កម្លាំងកងរាជអាវុធ ហត្ថខណ្ឌមានជ័យ បានធ្វើការឃាត់ខ្លួនបក្ខពួកជនសង្ស័យម្នាក់ កាលពីថ្ងៃទី២៥ ខែកក្កដា ឆ្នាំ២០១៦ នៅវេលាម៉ោង៩ទៅ ១០យប់ ហើយនាំយកសាកសួរអស់រយ:ពេលជិត២០ម៉ោង ទើបជនសង្ស័យបានឆ្លើយសារភាព ហើយកម្លាំងជំនាញស្នើសុំបទបញ្ជាមេបញ្ជាការកងរាជអាវុធហត្ថរាជធានីភ្នំពេញ ចុះបង្ក្រាបជាក់ស្តែងតែម្តង។
ជនសង្ស័យដែលឃាត់ខ្លួនម្នាក់ឈ្មោះ ចាន់ វិចិត្រ ភេទប្រុស អាយុ៣២ឆ្នាំ មុខរបរ ឌីចេ នៅលីកាស៊ី មានស្រុកកំណើតភូមិកកណ្ដៀង ឃុំកណ្ដៀង ស្រុកកណ្ដៀង ខេត្តពោធិ៍សាត់ និងម្នាក់ទៀតឈ្មោះ សំ សូនីតា ភេទស្រី អាយុ១៦ឆ្នាំ មុខរបរសិស្សថ្នាក់ទី១០ នៃអនុវិទ្យាល័យសន្ធរម៉ុក ស្នាក់នៅក្នុងបូរីលឹមឈាងហាក់ ខណ្ឌដង្កោ រាជធានីភ្នំពេញ ។ វត្ថុតាងដកហូតមានរថយន្ត Lexus GS៣០០ ពណ៌ស ស្លាកលេខភ្នំពេញ ២AC- ៥៥១៥ មួយគ្រឿង អាវុធខ្លីចំនួន ២ដើម និងគ្រឿងញៀនមួយចំនួនធំ ព្រមទាំងឧបករណ៍សម្រាប់ប្រើប្រាស់មួយចំនួនទៀត ។ ជនសង្ស័យទាំង២នាក់ ត្រូវបានកម្លាំងអាវុធហត្ថកំពុងធ្វើការសាកសួរ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមនីតិវិធី ៕
ចែករំលែកព័តមាននេះ