រាជធានីភ្នំពេញ ៖ តារាសម្តែងអ្នកនាងខៀវ សុខារ៉ាវី ដែលបាត់មុខអស់មួយរយៈធំនោះ បានសម្រេចចិត្តវិលចូលពិភពសិល្បៈវិញហើយ ។ សុខារ៉ាវី បានធ្វើសន្និសីទកាសែតប្រកាសវិលចាប់អាជីពចាស់វិញ កាលពីពេល ថ្មីៗនេះនៅសណ្ឋាគារឡឺរ៉ូយ៉ាល់ នៃរាជធានីភ្នំពេញ ។
រាជធានីភ្នំពេញ ៖ តារាសម្តែងអ្នកនាងខៀវ សុខារ៉ាវី ដែលបាត់មុខអស់មួយរយៈធំនោះ បានសម្រេចចិត្តវិលចូលពិភពសិល្បៈវិញហើយ ។ សុខារ៉ាវី បានធ្វើសន្និសីទកាសែតប្រកាសវិលចាប់អាជីពចាស់វិញ កាលពីពេល ថ្មីៗនេះនៅសណ្ឋាគារឡឺរ៉ូយ៉ាល់ នៃរាជធានីភ្នំពេញ ។
ខៀវ សុខារ៉ាវី ដែលគ្រងរ៉ូបពណ៌ខៀវខ្លីលើក្បាលជង្គង់ប្រកបដោយទឹកមុខញញឹមស្រស់នោះរៀបរាប់ថា ក្នុងអំឡុងពេលនាងបាត់មុខពីពិភពសិល្បៈអស់រយៈពេលជិត៤ឆ្នាំមកនេះនាងមានកូនប្រុសម្នាក់ ។ ពេលសម្រាលកូនហើយបានមួយឆ្នាំ ឬ២ឆ្នាំនាងអត់បានវិលចូលពិភពសិល្បៈវិញមកពីរវល់ប្រកបមុខរបរផ្ទាល់ខ្លួន គឺបើកកន្លែងស្ប៉ា និងភោជនីយដ្ឋាន «ផ្កាឈូក» នៅតាមជួរមាត់ទន្លេ ។
សុខារ៉ាវី បដិសេធបង្ហាញមុខ និងអត្តសញ្ញាណស្វាមី ខណៈមានការចោទសួរពីអ្នកសារព័ត៌មាន ។ អ្វីដែលនាងរា៉វីចង់ប្រកាសនោះ គឺការវិលត្រឡប់របស់នាងចូលពិភពសិល្បៈវិញ។ ទោះជាយ៉ាងណាក្តី តារាសម្តែងរូបនេះធ្លោយឱ្យដឹងថា ស្វាមីរបស់នាងពីមុនធ្លាប់មានភរិយា តែបានបែកបាក់គ្នា ។ ចំពោះការរួមរស់ជាប្តីប្រពន្ធជាមួយនាងមិនបានរៀបការទេ តែបានធ្វើសំបុត្រអាពាហ៍ពិពាហ៍ ។
ឃ្លាតឆ្ងាយពីពិភពសិល្បៈយូរបែបនេះ សុខារ៉ាវី និយាយថា នាងនឹកស្តាយណាស់ព្រោះបច្ចុប្បន្នវិស័យសិល្បៈភាពយន្តខ្មែរល្អប្រសើរជាងមុន ។ រា៉វី យល់ថា បើនាងមិនបោះបង់អាជីពទេ មកដល់បច្ចុប្បន្នប្រហែលជាមានកេរ្តិ៍ឈ្មោះល្បីល្បាញមិនខាន ។
តារាស្រីដែលមានស្វាមី ហើយស្រាប់តែវិលមកចាប់អាជីពសិល្បៈវិញ គេច្រើនតែយល់ថា មកពីបែកបាក់គ្នា តែចំពោះរូបនាងវិញ សុខារ៉ាវី បញ្ជាក់ថា ជីវិតប្តី-ប្រពន្ធរបស់នាងមិនមានបញ្ហាទេ មកពីនាងស្រលាញ់ចូលចិត្ត និងចង់កសាងកេរ្តិ៍ឈ្មោះឡើងវិញ ។ ម្យា៉ងទៀតស្វាមីរបស់នាងបានឯកភាពជាមួយរូបនាង មិនមែនរូបនាងត្រឡប់មកអាជីពចាស់ដោយចិត្តឯង ឬខ្វែងគំនិតគ្នាទេ ។
អ្នកនាងសុខារ៉ាវី គ្រោងបង្ហាញមុខតាមកញ្ចក់ទូរទស្សន៍ ព្រមទាំងសម្តែងនៅតាមកម្មវិធីប្រគំតន្ត្រីនានា ។ លើសពីនេះដើម្បីស្តារកេរ្តិ៍ឈ្មោះឡើងវិញ អ្នកនាងរ៉ាវី យល់ច្បាស់ថា មិនត្រូវមានជំងឺតួឯកទេ ។ ពីមុនបានតួលេខ១ តែពេលនេះរា៉វី សុខចិត្តទទួលយកតួលេខ២ ឬលេខ៣គឺអត់ប្រកែកទេ ។ ខណៈនៅឆ្ងាយពីពិភពសិល្បៈកន្លងមក តារាសម្តែងរូបនេះពិនិត្យស្នាដៃចាស់របស់ខ្លួនយល់ឃើញថា បានតែមួយបែប ដូច្នេះពេលនេះព្យាយាមឱ្យបានច្រើនបែបទើបប្រសើរ ។
អ្នកនាងខៀវ សុខារ៉ាវី សង្ឃឹមថា ពេលងាកចាប់អាជីពសិល្បៈវិញ នាងនឹងទទួលបានការគាំទ្រពីទស្សនិកជនមិនខាន ។ រ៉ាវី និយាយថា «នាងខ្ញុំសន្យាថា ពីពេលនេះទៅមិនឱ្យមានសុខារ៉ាវី ស្រគត់ស្រគំពេកទេ ជាសុខារ៉ាវី ថ្មី ធានាថាប្លែក» ៕
ចែករំលែកព័តមាននេះ