រាជធានីភ្នំពេញ ៖ កូនរបស់តារាកំប្លែងស្ងួតនាង វាំង ឌឺ គឺនាយ វាំង ដេត បច្ចុប្បន្នលោកកំពុងទទួលបានការចាប់អារម្មណ៍ពីសំណាក់ទស្សនិកជន ទៅលើការសម្តែងរបស់លោក…
រាជធានីភ្នំពេញ ៖ កូនរបស់តារាកំប្លែងស្ងួតនាង វាំង ឌឺ គឺនាយ វាំង ដេត បច្ចុប្បន្នលោកកំពុងទទួលបានការចាប់អារម្មណ៍ពីសំណាក់ទស្សនិកជន ទៅលើការសម្តែងរបស់លោក ខណៈពេលការសម្តែងបែបកំប្លែងរបស់លោកក៏កាន់តែជិតដូចឪពុករបស់លោក ។
តាមរយៈពេលខ្លី នាយ វាំង ដេត អាចឆ.ក់យកចិត្តអ្នកទស្សនារាប់ម៉ឺននាក់ តាមរយៈការសម្តែងឈុតកំប្លែងខ្លីៗបង្ហោះតាមបណ្តាញសង្គម បន្ទាប់ពីតារាកំប្លែងរូបនាងបានព្យាយាមហាត់ពុតលុតដុំ ពីរបៀបការសម្តែងអោយដូចទៅនឹងឪពុករបស់លោក ។
បើទោះបីជាមិនទាន់មានឱកាសសម្តែងតាមប៉ុស្តិ៍ទូរទស្សន៍ណាមួយនៅឡើយក្តី ប៉ុន្តែនាយ វាំង ដេត បានតាមរយៈការសម្តែងកំប្លែងនិយាយបែបខ្មែរកម្ពុជាក្រោម ឬវៀតណាមនិយាយខ្មែរ ពីតាមឪពុកលោកនោះបានអូសទាញអ្នកទស្សនារាប់ម៉ឺននាក់តាមបណ្តាញសង្គម ។ រហូតមកទល់នាពេលនេះ នាយ វាំង ដេត បានបង្ហាញវត្តមានសម្តែងតាមរយៈឃ្លីបវីដេអូ បានប្រមាណជាង១០រឿងហើយ ខណៈពេលលោកក៏មានគម្រោងសម្តែងជាបន្តបន្ទាប់ទៀតផងដែរ ។
យ៉ាងណាគេរំពឹងថា នាពេលអនាគត នាយ វាំង ដេត នឹងអាចឈានទៅរកការសម្តែងកំប្លែងដូចជា ឪពុករបស់លោក គឺនាយ វាំង ឌឺ ប្រសិនបើនាយកាន់តែពង្រឹងខ្លួនកាន់តែល្អលើការសម្តែងកំប្លែង និងទទួលយកការបង្ហាត់បង្ហាញបន្ថែមពីរៀមច្បងជើងចាស់ ។ ជាការកត់សម្គាល់កូនប្រុស តារាកំប្លែងនាយ វាំង ឌឺ បានបង្ហាញមហិច្ឆតាចង់ក្លាយជាតារាកំប្លែងស្នងពីឪពុករបស់ខ្លួនដែលធ្លាប់មានឈ្មោះល្បីល្បាញ បន្ទាប់ពីលោកត្រូវបានគេផ្តល់ឱកាសសាកល្បងសម្តែងជាលើកដំបូង នៅក្នុងវីដេឃ្លីបមួយ ដែលត្រូវគេផ្សព្វផ្សាយតាមបណ្តាញសង្គម ។
លោក យិន ភីដេត បច្ចុប្បន្នមានវ័យ២៨ឆ្នាំ ដែលត្រូវជាកូនប្រុសតែមួយក្នុងចំណោមកូន២នាក់ របស់តារាកំប្លែងនាយ វាំង ឌឺ កំពុងតែប្រឹងប្រែងបញ្ជ្រាបខ្លួនចូលក្នុងវិស័យសិល្បៈជាតារាកំប្លែង ក្នុងគោលដៅបន្តអាជីពមួយនេះពីឪពុករបស់លោក បន្ទាប់ពីឪពុករបស់លោកបានទទួលមរណភាពអស់រយៈពេលជាច្រើនឆ្នាំមកនេះ ។ លោក យិន ភីដេត ឬឈ្មោះក្នុងអាជីពសម្តែងហៅថា នាយ វាំង ដេត ហៅនាយ ៤២ ធ្លាប់បានអះអាងប្រាប់កោះសន្តិភាពឱ្យដឹងថា «កន្លងមកលោកត្រូវបានតារាកំប្លែង និងជាអ្នកថតម្នាក់បានហៅមកសាកល្បងសម្តែងជាមួយរៀមច្បងអ្នកសិល្បៈមួយចំនួនទៀតនៅក្នុងភាពយន្តមួយ» ។
លោកបញ្ជាក់ថា «ការថតលើកដំបូងនេះ លោកមានចិត្តត្រេកអរ និងលាយឡំដោយការភ័យផងដែរ ព្រោះនេះជាលើកដំបូង ដោយលោកមិនធ្លាប់មានបទពិសោធន៍លើការសម្តែងនេះពីមុនមកទេ» ។ លោកបញ្ជាក់បន្តថា «មិនធ្លាប់សម្តែងពីមុន លោកយល់ពីសមត្ថភាពខ្លួនឯងនៅស្ទើរច្រើន ដោយលោកធ្វើមិនសូវបានល្អ ដូចរៀមច្បងសិល្បៈចាស់ៗនោះឡើយ» ។
យ៉ាងណាបើតាមនាយ វាំងដេត «ប្រសិនបើទៅថ្ងៃអនាគត លោកអាចសម្តែងបានជាមួយរៀមច្បងចាស់ៗ បូករួមទាំងការជួយបង្ហាត់បង្ហាញពីពួកគាត់ផងនោះ លោកសង្ឃឹមថា នឹងអាចឈានដល់កម្រិតសម្តែងប្រមាណ៧០ទៅ៨០ភាគរយពីឪពុកលោក គឺនាយ វាំង ឌឺ» ។ លោកថា «លោកនឹងខិតខំហ្វឹកហាត់ខ្លួនឯងបន្ថែមទៀត ហើយសម្រាប់ថ្ងៃអនាគត លោកចង់ក្លាយជាតារាចម្រៀង និងតារាកំប្លែងដូចជា ឪពុករបស់លោកផងដែរ» ។
គួបញ្ជាក់ថា នាយ វាំង ឌឺ គឺជាតារាកំប្លែងដ៏ល្បីល្បាញមួយរូប ដោយសារស្ទីលសម្តែងកំប្លែងរបស់លោកប្លែកខុសគេ គឺការនិយាយត្រាប់តាមភាសាបងប្អូនខ្មែរកម្ពុជាក្រោម ។ លោកបានទទួលមរណភាពអំឡុង ឆ្នាំ២០០២ ដោយសារជំងឹរលាកសួត និងថ្លើមធ្ងន់ធ្ងរ ក្រោយពីលោកធ្លាក់ខ្លួនឈឺត្រឹមរយៈពេល៣ថ្ងៃតែប៉ុណ្ណោះ ខណៈពេលក្នុងជីវិតគ្រួសារលោក គឺមានកូនចំនួន២នាក់ គឺប្រុសម្នាក់ និងស្រីម្នាក់ ៕
ចែករំលែកព័តមាននេះ