ខេត្តមណ្ឌលគិរី ៖ ខណៈភ្លៀងបានបន្តធ្លាក់យ៉ាងជោកជាំនាចុងខែតុលានេះ ដោយសីតុណ្ហភាពនៅក្រុងសែនមនោរម្យ ក៏ចាប់ផ្តើមចុះត្រជាក់ចន្លោះ ១៨អង្សាសេ ទៅ ២៦អង្សាសេ ដែលបានទាក់ទាញភ្ញៀវទេសចរអាចទៅទស្សនាកម្សាន្តច្រើនជាងពាក់កណ្តាលឆ្នាំកន្លងទៅ។ ក្រៅពីអាកាសធាតុដ៏ត្រជាក់ប្លែកនេះ…
ខេត្តមណ្ឌលគិរី ៖ ខណៈភ្លៀងបានបន្តធ្លាក់យ៉ាងជោកជាំនាចុងខែតុលានេះ ដោយសីតុណ្ហភាពនៅក្រុងសែនមនោរម្យ ក៏ចាប់ផ្តើមចុះត្រជាក់ចន្លោះ ១៨អង្សាសេ ទៅ ២៦អង្សាសេ ដែលបានទាក់ទាញភ្ញៀវទេសចរអាចទៅទស្សនាកម្សាន្តច្រើនជាងពាក់កណ្តាលឆ្នាំកន្លងទៅ។
ក្រៅពីអាកាសធាតុដ៏ត្រជាក់ប្លែកនេះ ខេត្តមណ្ឌលគិរីនៅមានទេសភាពព្រៃភ្នំ និងវាលស្មៅធំល្វឹងល្វើយ និងជាទីរមណីយដ្ឋានធម្មជាតិរាប់សិបកន្លែង ដែលអន្ទងចិត្តមហាជនត្រូវចំណាយពេលដើរលេងក្នុងខេត្តមណ្ឌលគិរី។
ជាក់ស្តែង កាលពីសប្តាហ៍កន្លងទៅនេះ អ្នកទេសចរជិតពីរពាន់នាក់បានដង្ហែក្បួនរថយន្តរាប់រយគ្រឿង ទៅលេងកម្សាន្តតាមរមណីយដ្ឋាននានា និងបង្ហួសទៅទស្សនាសិក្សាស្វែងយល់តាមបន្ទាត់ព្រំដែនកម្ពុជាវៀតណាម និងបង្គោលព្រំដែនផងដែរ។
លោក ស៊ាង សឿន ប្រធានមន្ទីរទេសចរណ៍ខេត្តមណ្ឌលគិរី បានថ្លែងអំណរគុណក្រុមរថយន្តកម្ពុជា ឦសានOverland ទាំងអស់ដែលបានចូលរួមក្នុងដំណើរកម្សាន្តដើម្បីជ្សព្វផ្សាយតំបន់ទេសចរណ៍ វប្បធម៏ ធម្មជាតិ ក្នុងខេត្តមណ្ឌលគិរី ដូចពាក្យស្លោកថា «ប្រជាពលរដ្ឋម្នាក់ ជាអ្នកផ្សព្វផ្សាយទេសចរណ៍កម្ពុជាម្នាក់»។
លោក ឌឹម នី អភិបាលរងខេត្តមណ្ឌលគិរី បានស្វាគមន៍ចំពោះមហាគ្រួសាររថយន្តកម្ពុជា ដែលបានអញ្ជើញទៅទស្សនកិច្ចនៅទឹកដីនៃខេត្តមណ្ឌលគិរីនេះ ដើម្បីលើកស្ទួយវិស័យទេសចរណ៍ នៅទិសឦសាន ឲ្យមានការអភិវឌ្ឍរីកចម្រើន។
លោកអភិបាលរងខេត្តបញ្ជាក់ថា ខេត្តមណ្ឌលគិរីសម្បូរដោយធនធានធម្មជាតិ មានអាកាសធាតុល្អបរិសុទ្ធ មានវាលស្មៅដ៏ស្រស់ស្អាត និងមានតំបន់ទេសចរណ៍ជាច្រើនកន្លែង សម្រាប់ទស្សនាកម្សាន្តសប្បាយផងដែរ។ លោកបន្ថែមថា ក្រោមការដឹកនាំរបស់ឯកឧត្តម ថង សាវុន អភិបាល ខេត្តមណ្ឌលគិរី បានគិតគូរយកចិត្តទុកដាក់កសាងនូវហេដ្ឋារចនាសម្ព័ន្ធនានា ក៏ដូចជាតំបន់ទេសចរណ៍នៅក្នុងខេត្តមណ្ឌលគិរី ដើម្បីធ្វើយ៉ាងណា ទាក់ទាញភ្ញៀវទេសចរជាតិ អន្តរជាតិ មកទស្សនាកាន់តែច្រើនឡើង។
តាមការឲ្យដឹងពីលោក ទូច រស្មី ប្រធានក្រុមរថយន្ត OFF ROAD គោព្រៃមណ្ឌលគិរី បានបញ្ជាក់ថា ក្នុងដំណើរកសាន្ត របស់មហាគ្រួសាររថយន្តកម្ពុជា មកកាន់ខេត្តមណ្ឌលគិរី មានរថយន្តជាច្រើនប្រភេទសរុប ២៨៥គ្រឿង និងមានអ្នកចូលរួមសរុបជាង ១.០០០នាក់ ក្នុងនោះមានក្រុមរថយន្ត CPG TAC គោព្រៃ4×4 គោព្រៃមណ្ឌលគិរី Amsoil Cambodia VKH Motorsports និងHN Auto – រថយន្ត Pick-up – រថយន្ត SUV – រថយន្ត Sedan – រថយន្ត MPV រថយន្ត Hatchback – រថយន្តទេសចរណ៍ធម្មតា ក៏ដូចជារថយន្ត off road និងoverland ជាដើម។
លោក បន្ថែមថា ក្បួនរថយន្តរាប់រយគ្រឿងនេះ បានចុះទស្សនកិច្ចតាមបណ្តោយ និងបង្គោលព្រំដែនរវាងកម្ពុជា-វៀតណាម ក្នុងភូមិសាស្ត្រខេត្តមណ្ឌលគិរី ក្រៅពីនោះ ក៏ចុះទស្សនានៅតាមតំបន់ទេសចរណ៍ និងតំបន់វាលស្មៅដ៏ស្រស់ស្អាត ហើយក៏មានការការពារសន្តិសុខសណ្តាប់ធ្នាប់ជូនភ្ញៀវទេសចរផងដែរ៕
ចែករំលែកព័តមាននេះ