ខេត្តមណ្ឌលគិរី ៖ ភ្នំដោះក្រមុំបានក្លាយជាបូជនីយ៍ដ្ឋាន និងរមណីយដ្ឋានដ៏ល្អឯកមួយ សម្រាប់ការបន់ស្រន់របស់អ្នកស្រុក និងជាកន្លែងគយគន់ទេសភាពទីរួមខេត្តមណ្ឌលគិរីដ៏ស្រស់ស្អាត ហើយបច្ចុប្បន្នរាប់តាំងពីប្រជាពលរដ្ឋ ភ្ញៀវទេសចរ មន្ត្រីរាជការ និងថ្នាក់ដឹកនាំកំពូលៗ…
ខេត្តមណ្ឌលគិរី ៖ ភ្នំដោះក្រមុំបានក្លាយជាបូជនីយ៍ដ្ឋាន និងរមណីយដ្ឋានដ៏ល្អឯកមួយ សម្រាប់ការបន់ស្រន់របស់អ្នកស្រុក និងជាកន្លែងគយគន់ទេសភាពទីរួមខេត្តមណ្ឌលគិរីដ៏ស្រស់ស្អាត ហើយបច្ចុប្បន្នរាប់តាំងពីប្រជាពលរដ្ឋ ភ្ញៀវទេសចរ មន្ត្រីរាជការ និងថ្នាក់ដឹកនាំកំពូលៗ នៅពេលអញ្ជើញដល់ទឹកដីក្រុងសែនមនោមរ្យ គឺមិនរំលងការចូលបន់ស្រន់ឬថតរូបទុកជាអនុស្សាវរីយ៍ឡើយ។
ដូនជីដែលអង្គុយលក់ខ្សែអំបោះចង់ដៃនៅជិតអាស្រមលោកតាស្រុះភ្នំដោះក្រមុំបានឲ្យដឹងថា រាល់ថ្ងៃមានបងប្អូនអ្នកស្រុកនិងមកពីចម្ងាយ តែងយកគ្រឿងដង្វាយដូចជា ជ្រូកខ្វៃ ស្រាពាង ផ្លែឈើ ឬអ្នកខ្លះសន្យាថ្វាយ គោដុត កាប់ក្របីក៏មាន នាំយកទៅដុតធូបសែនជូនលោកតា គ្មានលោះមួយថ្ងៃណាទេ ។ មិនត្រឹមប៉ុណ្ណោះ ក៏មានអ្នកដើរលេងចូលទៅកម្សាន្តជាហូរហែផងដែរ។
ដូនជីបានបន្តថា មូលហេតុដែលអ្នកស្រុកតែងនាំយកគ្រឿងដង្វាយយកទៅសែនជូនលោកតា ដោយគ្មានខ្វល់ពីការចំណាយអស់ច្រើនឬតិច ព្រោះពួកគាត់តែងទៅបន់ស្រន់ប្រាថ្នាឲ្យសម្រេចបាននូវកិច្ចការជួញដូរ ឬមុខរបរនានាឡើងបុណ្យស័ក្តិ បានសមប្រកបដូចចិត្ត ទើបរៀបដង្វាយជូនលោកតាតាមក្រោយ។
ទាក់ទងនឹងអបិយជំនឿរបស់អ្នកស្រុក យោងតាមមន្ទីរវប្បធម៌ខេត្តមណ្ឌលគិរីបានឱ្យដឹងថា កាលពីដើមឡើយ មានបុរសម្នាក់ឈ្មោះ «ស្រុះ» បានទៅលេងនៅក្នុងពិធីមួយនៅលើភ្នំដោះក្រមុំ ហើយបានឃើញ និងចាប់ចិត្តស្រឡាញ់ នារីម្នាក់មានឈ្មោះ «ផ្លំ» ។ លុះក្រោយមក បុរសក្រមុំមួយគូនេះ បានក្លាយជាគូដណ្តឹងនឹងគ្នា ។
នៅថ្ងៃមួយ នារីឈ្មោះផ្លំ បានចូលទៅក្នុងព្រៃ នៅម្តុំភ្នំដោះក្រមុំដើម្បីដងទឹកប៉ុន្តែ មិនឃើញទៅផ្ទះវិញឡើយ ។ ហេតុការណ៍នេះ ធ្វើឱ្យអ្នកស្រុក និងបុរស ជាគូដណ្តឹងភ័យស្លន់ស្លោ នាំគ្នាដើររកប៉ុន្តែរកមិនឃើញឡើយ ។ លុះរំលងមកបន្តិចប្រមាណជា៣ខែ គឺនៅថ្ងៃមួយ បុរសជាគូដណ្តឹង ឈ្មោះស្រុះ បានចូលទៅកាន់ព្រៃ ម្តុំបាត់នារីឈ្មោះ ផ្លំ នោះហើយបានលេចចេញ រូបរាង និងសំឡេងរបស់នាង ផ្លំ នៅក្នុងជ្រោះក្បែរនោះ ដោយប្រាប់ ឱ្យដឹងថា នាងមិនទាន់ស្លាប់ទេ គឺអ្នកសច្ចំ នៅ ភ្នំដោះក្រមុំ សុំឱ្យនាងនៅចាំស្រូវ និងផលដំណាំអ្នកស្រុក ។
បន្ទាប់ពីប្រាប់បុរសជាគូដណ្ដឹងដូច្នេះហើយអ្នក សច្ចំ ក៏ប្រាប់ ឱ្យនារីជា គូដណ្ដឹង បបួលបុរស ឈ្មោះ ស្រុះ នៅចាំថែរក្សាជាមួយគ្នា ។ អ្នកស្រុកក្រោយពេលដឹងថា បាត់បុរស ឈ្មោះ ស្រុះ ម្នាក់ទៀតក៏បបួលគ្នា តាមស្វែងរកប៉ុន្តែ មិនឃើញដូចបំណងឡើយ ហើយក៏សន្មត ថា កំលោះ ក្រមុំ មួយគូនេះ បានស្លាប់ទៅហើយ ។
ក្រោយមក លោកតាស្រុះយាយផ្លំ តែងតែ បង្ហាញខ្លួនឱ្យអ្នក ស្រុកបានឃើញដោយប្រាប់ថា ពួកគាត់ទាំងពីរនាក់មិនទាន់ស្លាប់ទេ គឺពួកគាត់ត្រូវម្ចាស់ទឹកម្ចាស់ដីនៅលើភ្នំដោះក្រមុំ ឱ្យបន្តវេននៅចាំថែរក្សាផលដំណាំ និង ប្រជាជនក្នុងតំបន់ ។ ដូច្នេះ បើនៅថ្ងៃក្រោយមាន បងប្អូនណាចង់ជួប ឬ ក៏មានទុក្ខធុរៈឬជំងឺផ្សេងៗៗ ចូរនឹកដល់ពួកគាត់គឺពួកគាត់ នឹងជួយបានដូចប្រាថ្នា ។ តាំងពីពេលនោះមកជំនឿនេះ ក៏ត្រូវបានធ្វើតៗគ្នាសម្រាប់អ្នករស់ទីនោះរហូតមកដល់បច្ចុប្បន្ន ។
សូមបញ្ជាក់ថា ភ្នំដោះក្រមុំស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ មានចម្ងាយប្រមាណមួយពាន់ម៉ែត្រ ពីរង្វង់មូលគោព្រៃ ដែលជានិមិត្តរូបតំណាងខេត្តមណ្ឌលគិរី ។ ភ្នំដោះក្រមុំតែងទទួលបានភ្ញៀវទេសចររាប់ម៉ឺននាក់ក្នុងមួយឆ្នាំៗ ហើយអាជ្ញាធរនៅទីនោះជារៀងរាល់ឆ្នាំតែងប្រារព្ឋពិធីកាប់ក្របី និងសំណែនផ្សេងៗថ្វាយជូនលោកតាស្រុះ ដែលមានអាស្រមលើកំពូលភ្នំ ដើម្បីសុំសុខសប្បាយជូនប្រជាពលរដ្ឋទូទាំងខេត្ត៕
ចែករំលែកព័តមាននេះ