សហរដ្ឋអាមេរិក ៖ កំពូល​តារាចម្រៀង​ជនជាតិ​កា​ណា​ដា សេ​លី​ន ឌី​អន (Celine Dion) កាលពី​ថ្ងៃ​ទី​១១ ខែសីហា ឆ្នាំ​២០២៤ កន្លង​ទៅ សម្តែង​ការ​មិន​ពេញចិត្ត​យ៉ាង​ខ្លាំង ដោយ លើក​ឡើង​ថា ការ​យក​បទ​ចម្រៀង «My Heart Will Go On» ដ៏​ល្បីល្បាញ​របស់​លោកស្រី នៅ​ក្នុង​ខ្សែភាពយន្ត​ទី​តា​និ​ច (Titanic) ទៅ​ចាក់​នៅ​ក្នុង​ការ​ប្រមូលផ្តុំ​គ្នា​នៅ​ឯ​រដ្ឋ​ម៉ុ​នតា​ណា (Montana) ជា​កន្លែង​ឃោសនា​របស់​លោក ដូ​ណា​ល់ ត្រាំ (Donald Trump) បេក្ខជន​ប្រធានាធិបតី​មក​ពី​គណបក្ស​សាធារណរដ្ឋ កាលពី​យប់​ថ្ងៃ​ទី​១០ ខែសីហា កន្លង​ទៅ មិន​ទទួល​បានការ​អនុញ្ញាត​ពី​លោកស្រី​នោះ​ទេ​។

យោង​តាម​ប្រភព​ពី​ទីភ្នាក់ងារសារព័ត៌មាន Reuters កាលពី​ថ្ងៃ​ទី​១០ ខែសីហា ឆ្នាំ​២០២៤ បាន​រាយការណ៍​ថា បទ​ចម្រៀង និង​វី​ដេ​អូ​ឃ្លី​ប «My Heart Will Go On» ត្រូវ​បាន​ចាក់​ផ្សាយ​ក្នុង​កម្មវិធី​ឃោសនាការ​របស់​អតីត​ប្រធានាធិបតី​សហរដ្ឋអាមេរិក លោក ដូ​ណា​ល់ ត្រាំ ដែល​រៀបចំ​ឡើង​នៅ​ក្នុង​ទីក្រុង​បូ​សេ​មេន (Bozeman) រដ្ឋ​ម៉ុ​នតា​ណា កាលពី​ថ្ងៃ​សុក្រ​កន្លង​ទៅ នៅ​លើ​អេ​ក្រង់​ដ៏​ធំ​នៅ​ជិត​វេទិកា​។ ភ្លាម​ៗ ក្រោយ​ពី​ឃើញ​បែប​នេះ គណនី​បណ្ដាញ​សង្គម​ផ្លូវការ​របស់​លោកស្រី លោកស្រី សេ​លី​ន ឌី​អន បាន​បង្ហោះ​យ៉ាង​ដូច្នេះ​ថា «​ការ​ចាក់​បទ​នេះ មិន​ត្រូវ​បាន​អនុញ្ញាត​នោះ​ទេ ហើយ Celine Dion មិន​គាំទ្រ​ចំពោះ​ការ​ធ្វើ​បែប​នេះ​ឡើយ​»​។

ជាក់ស្តែង លោកស្រី សេ​លី​ន ឌី​អន ដែល​ឈ្នះ​ពានរង្វាន់​កំពូល Grammy រហូត​ដល់​៥​សម័យ​កាលនោះ ត្រូវ​បាន​ពិភពលោក​ទទួលស្គាល់​យ៉ាង​ច្បាស់ និង​អស្ចារ្យ​បំផុត​សម្រាប់​បទ​ចម្រៀង «My Heart Will Go On» នេះឯង​។ តួយ៉ាង​កន្លង​មក លោកស្រី​ត្រូវ​បាន​រាយការណ៍​ថា ធ្លាប់​បដិសេធ​មិន​ទទួល​ទៅ​សម្តែង នៅ​ក្នុង​កម្មវិធី​ដ៏​ធំ​របស់​លោក ដូ​ណា​ល់ ត្រាំ នៅ​ក្នុង​ឆ្នាំ ២០១៧ នៅ​ពេល​ដែល​អតីត​ប្រធានាធិបតី​រូប​នេះ​ចូល​កាន់​តំណែង ក្រោយ​ឈ្នះ​ការ​បោះ​ឆ្នោត​នៅ​ឆ្នាំ ២០១៦៕ (​ប្រភព ៖ Reuters)