សិលាចារឹកមានរូបព្រះឥសូរ និងនាងឧមា
- ភ្នំពេញ
ព្រះឥសូរ ជាទេពសំខាន់មួយក្នុងចំណោមទេព សំខាន់ៗទាំងបីក្នុងព្រហ្មញ្ញសាសនា តំណាងឱ្យការបង្កើតលោក និងបំផ្លាញលោកទាំងមូល ។ ព្រះអង្គមានព្រះមហេសីច្រើនអង្គ ដូចជា
រាជធានីភ្នំពេញ ៖ ព្រះឥសូរ ជាទេពសំខាន់មួយក្នុងចំណោមទេព សំខាន់ៗទាំងបីក្នុងព្រហ្មញ្ញសាសនា តំណាងឱ្យការបង្កើតលោក និងបំផ្លាញលោកទាំងមូល ។ ព្រះអង្គមានព្រះមហេសីច្រើនអង្គ ដូចជា ព្រះនាងឧមា ឬទុគ៌ាឬបវ៌តី ព្រះនាងគង្គា និងព្រះនាងកាលី… ។
បើតាមឯកសារសារមន្ទីរជាតិ វត្តមានរបស់ព្រះឥសូរ រួមជាមួយព្រះនាងឧមា បានបង្ហាញឡើងតាមរយៈវត្ថុសិល្បៈជាច្រើនប្រភេទដូចជា ចម្លាក់ទោល ក្បាច់ក្រឡោតទាប ផ្ទាំងសិលាចារឹក ថ្មគោល និងផ្តែរជាដើម ។
ជាក់ស្តែងផ្ទាំងថ្មដែលមានចារអក្សរ ព្រមទាំងឆ្លាក់រូប ព្រះឥសូររួមជាមួយព្រះនាងឧមា គង់នៅលើបល្ល័ង្កនេះ ស្ថិតនៅក្នុងរាជ្យព្រះបាទហស៌វម៌្ម ។ សិលាចារឹកនេះមានចារទាំងសងខាង ដោយផ្នែកខាងមុខមានភាសាខ្មែរបុរាណចំនួន ២បន្ទាត់ និងភាសាសំស្ក្រឹតចំនួន៣៦បន្ទាត់ ។ ចំណែកផ្នែកខាងក្រោយជាភាសាខ្មែរចំនួន ៧បន្ទាត់ និងភាសាសំស្ក្រឹតចំនួន ២៥បន្ទាត់ ។
ចំណុចដែលសំខាន់មួយទៀតនោះគឺ ការពោលពីលិង្គមួយកសាងនៅឆ្នាំ១០៦៩ ។ ក្រៅពីពាក្យកោតសរសើរអាទិទេព និងពាក្យព្រមានគំរាមដល់ជនណាដែលមិនគោរពទីតម្កល់លិង្គនេះ ក៏មានរាយនាមបុព្វការីជនអ្នកសាងលិង្គនោះ (ក្នុងនោះមានឈ្មោះ«សិវកៃវល្យ» ដែលជាអាចារ្យស្មឹងក្នុងរាជាភិសេកព្រះបាទជ័យវម៌្មទី២ ក្នុងឆ្នាំ៨០២) និងអំណោយដែលអ្នកទាំងនោះទទួលក្នុងរាជ្យ មុនៗ ។
ផ្ទាំងថ្មដែលមានឆ្លាក់រូបក្រឡោតដូចដែលបង្ហាញនេះ ពុំសូវមានឡើយ ។ រូបចម្លាក់នៅផ្ទាំងសិលាចារឹកនេះ មានលក្ខណៈសម្គាល់ជារចនាបថបាភួន ក្នុងសម័យអង្គរ ដោយលេចចេញមកច្បាស់ ដូចជាការឆ្លាក់តាមលំនាំធម្មជាតិ បបូរមាត់ក្រាស់ ផ្នួងសក់ក្រងពាត់ដោយអង្កាំជាដើម ។ ផ្ទាំងសិលាចារឹកនេះមានប្រភពមកពីខេត្តបាត់ដំបង ៕
ចែករំលែកព័តមាននេះ