ស្នាដៃរូបថតរបស់អ្នកសារព័ត៌មានកម្ពុជា ក្រោមប្រធានបទ ៖ «សម្រស់សហគមន៍យើង» ពិតជាមិនធម្មតាមែន !
- ភ្នំពេញ
រាជធានីភ្នំពេញ ៖ ថ្ងៃទី ១៩ ខែតុលា ឆ្នាំ ២០២៣ ក្លិបអ្នកកាសែតកម្ពុជា (ក.អ.ក) ដោយមានកិច្ចសហការពីក្រុមហ៊ុន…
រាជធានីភ្នំពេញ ៖ ថ្ងៃទី ១៩ ខែតុលា ឆ្នាំ ២០២៣ ក្លិបអ្នកកាសែតកម្ពុជា (ក.អ.ក) ដោយមានកិច្ចសហការពីក្រុមហ៊ុន ស៊ី ភី អល (ខេមបូឌា) ឯ.ក (CP ALL (Cambodia) Co., Ltd.) និងស្ថាប័នរដ្ឋចំនួន ៣ រួមមាន ៖ ក្រសួងប្រៃសណីយ៍ និងទូរគមនាគមន៍, ក្រសួងរៀបចំដែនដី នគរូបនីយកម្ម និងសំណង់ និងក្រសួងទេសចរណ៍ បានប្រកាសការប្រកួតប្រជែងរូបថតប្រចាំឆ្នាំ ២០២៣ លើប្រធានបទ «សម្រស់សហគមន៍យើង» នៅក្នុងយុគសម័យឌីជីថល ដើម្បីផ្តល់ឱកាសដល់អ្នកសារព័ត៌មាន និងអ្នកថតរូប គ្រប់ទម្រង់នៅកម្ពុជា បានបញ្ចេញស្នាដៃរូបថតផ្ទាល់ខ្លួនដណ្តើមពានរង្វាន់រហូត ៣ លានរៀល សម្រាប់ជ័យលាភីលេខ ១ និងពានជើងឯក ។
នៅក្នុងថ្ងៃប្រកាសលទ្ធផលនេះផងដែរ លោក ពុយ គា ជាប្រធានអ្នកឆ្លងឆ្លើយឱ្យទីភ្នាក់ងារព័ត៌មាន Kyodo News របស់ជប៉ុនជិត ៣០ ឆ្នាំ និងជាប្រធានក្លិបអ្នកកាសែតកម្ពុជា បានអោយដឹងថា ៖ «នៅក្នុងការប្រឡងរូបថតប្រចាំឆ្នាំ ២០២៣ នេះ យើងបានជ្រើសរើសគណៈកម្មការល្បីៗ និងជាអ្នកធ្វើការក្នុងវិស័យថតរូបជាច្រើនឆ្នាំ ។ មកដល់ថ្ងៃបិទការទទួលរូបថត សម្រាប់ការប្រកួតប្រជែង ក.អ.ក ទទួលបានស្នាដៃរូបថតពីបេក្ខជនចំនួន ២៩ រូប (៨៧ សន្លឹក) ដែលមកពីស្ថាប័នផ្សេងៗគ្នា ហើយរូបថតទាំងអស់ដែលដាក់មកចូលរួមបានបង្ហាញនូវស្នាដៃ និងទេពកោសល្យក្នុងការផ្តិតយករូបភាពដ៏ស្រស់ត្រកាល នៃតំបន់រមណីយដ្ឋាន ទេសចរណ៍, អេកូទេសចរណ៍, តំបន់ធនធានធម្មជាតិ, វប្បធម៌, បរិស្ថាន រួមទាំងការអភិវឌ្ឍនៅកម្ពុជា» ។
លោក លន ហ្សាឌីណា ជាអ្នកសារព័ត៌មានឯករាជ្យ ទទួលបានជ័យលាភីលេខ ១ ក្នុងការប្រកួតបានសម្តែងចំណាប់អារម្មណ៍ថា ៖ «ប្រសិនជាយើងឃើញរូបអង្គរភ្លាម នោះយើងនឹងដឹងថាវាមានន័យទូលំទូលាយ ដែលបង្ហាញពីកម្ពុជាហើយ មួយទៀតថា តើទឹកដីកម្ពុជានឹងឃើញមានភ្ញៀវទេសចរច្រើនមកលេង ចឹងបើនិយាយពីផលវិជ្ជមានវិញបញ្ជាក់ថា ទឹកដីរបស់យើងវាមានសន្តិភាព គួរឱ្យស្រឡាញ់ មនុស្សប្រមូលផ្តុំគ្នានៅតំបន់មួយ ទីកន្លែងមួយដែលគេយកដែលគេយកទូរស័ព្ទ ឬអ្វីមួយទៅថតនៅក្នុងនឹង ដូចនេះនៅស្រុកខ្មែរយើងបង្ហាញថាវាមិនខ្វះ ខ្វះតំបន់ទេសចរណ៍នានា នោះទេសំខាន់យើងជាអ្នកថតរូបនឹងត្រូវផលិតរូបបែបមិច បង្កើតរូបបែបមិច ធ្វើយ៉ាងណាឱ្យមានភាពទាក់ទាញ ក្នុងនាមខ្ញុំជាអ្នកថតរូបសារព័ត៌មាន ខ្ញុំតែងតែគិតថារាល់ការថតរូបរបស់ខ្ញុំ គឺមានសារឬមានអត្ថន័យមួយ ដែលខ្ញុំចង់បង្ហាញទៅដល់អ្នកមើល» ។
លោក លន ហ្សាឌីណា បានបន្តថា ៖ «ជាទូទៅរូបនេះខ្ញុំថតនៅពេលថ្ងៃរះ គឺក្នុងថ្ងៃទី ២១ ដល់ថ្ងៃទី ២៣ ខែមីនា ឆ្នាំ ២០២៣ ក្នុងថ្ងៃនឹងប្រជាពលរដ្ឋរួមទាំងភ្ញៀវទេសចរប្រមូលផ្តុំគ្នា នៅក្នុងមួយឆ្នាំភ្ញៀវដែរមកមើលអង្គរវត្ត គឺមានតែក្នុងខែមីនា និងខែកញ្ញា ជាពិសេសក្នុងព្រឹត្តិការណ៍សមរាត្រី ដូចនេះឱកាសល្អចង់ផ្សព្វផ្សាយអង្គរថា អស្ចារ្យប៉ុនណា គួរតែអ្នកថតរូបយើងគិត ពេលវេលានឹងរូបមួយសន្លឹកអាចធ្វើឱ្យមនុស្សផ្អើល» ។
សូមជម្រាបថា ដើម្បីធានាដល់ការពិនិត្យនិងវាយតម្លៃលើរូបថតទាំងអស់ឱ្យមានសុក្រិតភាព ក.អ.ក បានបង្កើតគណៈកម្មការ កំណែមួយដែលមានសមាសភាព ៣ រូប រួមមាន ៖ ១. លោក ហេង ស៊ីនិត្យ ជាអ្នកថតរូបអាជីពបម្រើក្នុងវិស័យសារព័ត៌មានជាតិ និងអន្តរជាតិជាង ៣០ ឆ្នាំមកហើយ ក្នុងនោះជិត ២០ ឆ្នាំជាមួយសារព័ត៌មានដ៏ល្បីរបស់អាម៉េរិក គឺ Associated Press ហើយក៏ជាគ្រូបង្រៀនផ្នែកថតរូបផងដែរ, ២. លោក ឡាម៉ូ (La Mo) ជាសិល្បករថតរូប និងជាស្ថាបនិក (Unseen Cambodia) ដ៏ល្បីដែលធ្លាប់ទទួលបានពានរង្វាន់ផ្នែកថតរូបថ្នាក់តំបន់ និងអន្តរជាតិចំនួនពីរលើកកាលពីឆ្នាំ ២០១៧ និង ២០១៨, និងទី ៣. លោក ពុយ គា ។
លោក ឡាម៉ូ (La Mo) ជាសិល្បករថតរូប និងជាស្ថាបនិក (Unseen Cambodia) បានបញ្ជាក់ថា ៖ «សម្រាប់បេក្ខជន ដែលបានដាក់រូបប្រកួតប្រជែង សំខាន់បំផុតគឺប្រធានបទ ធ្វើយ៉ាងណាកុំឱ្យចាកប្រធានបទ បន្ទាប់បានយើងគិតអំពីតិចនិកខលថា រូបនឹងគាត់ប្រើប្រាស់ Speed របស់គាត់បានល្អគ្រប់គ្រាន់អត់ បានច្បាស់ល្អអត់ ហើយពន្លឺដែលគាត់ប្រើប្រាស់នោះវាងងឹកខ្លាំងពេកឬភ្លឺខ្លាំងពេក ចឹងទាំងអស់នេះសុទ្ធតែអ្វីដែលគណៈកម្មការរបស់យើងរើសរូបអាស្រ័យទៅលើលក្ខខណ្ឌទាំងអស់នឹង ប៉ុន្តែដែលយើងផ្តោតសំខាន់នោះគឺភាពច្នៃប្រឌិតរបស់បេក្ខជន បេក្ខនារីនីមួយៗ ។ បើមើលទៅលើរូបដែលជាប់ជ័យលាភីលេខ ១ នេះ គឺពេលវេលាដែលគាត់រើសចំពេលវេលាល្អ និងរូបភាពមួយសន្លឹកមានព័ត៌មានច្រើនដែលបរិយាដែលមើលទៅគឺជាការទាក់ទាញភ្ញៀវទេសចរ ដូចនេះទាំងតិចនិកទាំងការរៀបចំផ្លង់ ហ្វ្រេម ល្អឥតខ្ចោះ» ។
គួរបញ្ជាក់ផងដែរថា ជ័យលាភីចំនួន ៥ រូប រួមមាន ៖ ១- ជ័យលាភីលេខ ១ លោក លន ហ្សាឌីណា ជាអ្នកសារព័ត៌មានឯករាជ្យ ទទួលបានថវិកាចំនួន ៣ លានរៀល និងពាន ១ ។
២- ជ័យលាភីលេខ ២ លោកគឹម បូរិន មកពីសារព័ត៌មានភ្នំពេញថ្មី ទទួលបានថវិកាចំនួន ២ លាន ៥សែនរៀលនិងពាន ១ ។
៣- ជ័យលាភីលេខ ៣ លោក តាំង ឈីនសុធី មកពីទីភ្នាក់ងារសារព័ត៌មាន AFP ទទួលបានថវិកាចំនួន ២ លានរៀល និងពាន ១ ។
៤- ជ័យលាភីលេខ ៤ លោក ហុង មិនា មកពីកាសែតភ្នំពេញប៉ុស្តិ៍ទទួលបានថវិកាចំនួន ១ លាន ៥សែនរៀល និងពាន ១ ។
៥- ជ័យលាភីលេខ ៥ លោក ប៉ាន់ បូនី មកពីទូរទស្សន៍បាយ័នទទួលបានថវិកាចំនួន ១ លានរៀលនិងពាន ១ ។
ក្រៅពីរង្វាន់ខាងលើ ជ័យលាភីម្នាក់ៗក៏នឹងទទួលបាននូវ សម្ភារមួយចំនួនបន្ថែមទៀត ។ ដោយឡែក ចំពោះបេក្ខជនចូលរួមប្រកួតប្រជែង តែមិនទទួលជ័យលាភីក៏ទទួលបានរង្វាន់លើកទឹកចិត្តផងដែរ ៕
ចែករំលែកព័តមាននេះ