ថៃបង្ហាញលទ្ធផលស្រាវជ្រាវជីវឱសថពីរុក្ខជាតិថ្នាំជក់ ទប់ស្កាត់កោសិកាមហារីក
ថៃ ៖ នេះជាលើកទី១ សម្រាប់ប្រទេសថៃ ដែលសាស្ត្រាចារ្យនៅមហាវិទ្យាល័យឱសថសាស្ត្រ នៃសាកល
ថៃ ៖ នេះជាលើកទី១ សម្រាប់ប្រទេសថៃ ដែលសាស្ត្រាចារ្យនៅមហាវិទ្យាល័យឱសថសាស្ត្រ នៃសាកលវិទ្យាល័យជូឡាឡុងកន (Chulalongkorn) ទទួលជោគជ័យក្នុងការអភិវឌ្ឍន៍បច្ចេកវិទ្យាផលិតអង្គបដិប្រាណចេញពីរុក្ខជាតិថ្នាំជក់ Tobacco ដែលមានប្រសិទ្ធិភាពលើការទប់ស្កាត់ និងរារាំងការលូតលាស់កោសិកាមហារីកក្នុងខ្លួនសត្វ នៅក្នុងមន្ទីរពិសោធន៍។ ក្តីសង្ឃឹមមួយក្នុងចំណោមក្តីសង្ឃឹមផ្សេងទៀត គឺការទទួលបានថ្នាំ និងការព្យាបាលជំងឺមហារីក ដែលមានប្រសិទ្ធភាពខ្ពស់ជាមួយនឹងការចំណាយទាប។
បន្ទាប់ពីជោគជ័យលំដាប់ថ្នាក់ពិភពលោក ក្នុងការស្រាវជ្រាវការផលិតវ៉ាក់សាំងប្រឆាំងជំងឺកូវីដ-១៩ ពីរុក្ខជាតិថ្នាំជក់ Tobacco ឥឡូវនេះ ក្រុមអ្នកស្រាវជ្រាវមកពី Baiya Phytofarm ដែលជាក្រុមហ៊ុនរបស់ប្រទេសថៃ ស្ថិតនៅក្រោមសាកលវិទ្យាល័យជូឡាឡុងកន បានបង្ហាញព្រឹត្តិការណ៍សំខាន់មួយទៀតក្នុងការស្រាវជ្រាវ និងអភិវឌ្ឍថ្នាំចេញពីថ្នាំជក់ ដើម្បីប្រឆាំងនឹងមេរោគមហារីក។
ការពិសោធន៍បង្ហាញថា រុក្ខជាតិថ្នាំជក់ Tobacco អាចកាត់បន្ថយទំហំ និងរារាំងការលូតលាស់កោសិកាមហារីកក្នុងខ្លួនសត្វ នៅក្នុងមន្ទីរពិសោធន៍ ហើយក្រុមអ្នកស្រាវជ្រាវបានបង្កើតបច្ចេកវិទ្យា និងប្រព័ន្ធដើម្បីផលិតប្រូតេអ៊ីនរុក្ខជាតិ ដើម្បីផលិតថ្នាំប្រឆាំងនឹងមេរោគ។ គោលបំណងគឺសង្ឃឹមថា នឹងជួយកាត់បន្ថយការចំណាយលើការផលិតថ្នាំ ដើម្បីឱ្យអ្នកជំងឺមហារីកក្នុងប្រទេសអាចទទួលបានថ្នាំកាន់តែងាយស្រួល និងទូលំទូលាយ ខណៈដែលការស្រាវជ្រាវនេះ ទើបតែទទួលបានពានរង្វាន់ស្រាវជ្រាវប្រចាំឆ្នាំ ២០២៣ ពីក្រុមប្រឹក្សាស្រាវជ្រាវជាតិនៃប្រទេសថៃ (NRCT)។
លោកស្រីវេជ្ជបណ្ឌិត Waranyoo Phoolcharoen សាស្ត្រាចារ្យនៅមហាវិទ្យាល័យឱសថសាស្ត្រ នៃសាកលវិទ្យាល័យជូឡាឡុងកន បានពន្យល់ពីវិធីសាស្ត្រក្នុងការព្យាបាលជំងឺមហារីកតាមរយៈការព្យាបាលដោយភាពស៊ាំថា «ជំងឺមហារីក» គឺបណ្តាលមកពីកោសិកាមហារីកភ្ជាប់ទៅនឹងកោសិកាក្នុងប្រព័ន្ធការពាររាងកាយ និងរារាំងដំណើរការនៃកោសិកាក្នុងរាងកាយ ហើយការព្យាបាលជាទូទៅដែលគេស្គាល់ថា ការព្យាបាលដោយប្រើគីមី ប្រើប្រាស់ថ្នាំ ដើម្បីសម្លាប់កោសិកាមហារីកក្នុងរាងកាយ។
ប៉ុន្តែសម្រាប់ការព្យាបាលដោយភាពស៊ាំ ឬការព្យាបាលដោយកោសិកា គ្មានបំណងបំផ្លាញកោសិកាមហារីកនោះទេ ផ្ទុយទៅវិញ ថ្នាំត្រូវបានប្រើប្រាស់ដើម្បីជំរុញកោសិកាភាពស៊ាំក្នុងប្រព័ន្ធការពាររបស់អ្នកជំងឺឱ្យកាន់តែរឹងមាំ រារាំងកោសិកាមហារីកពីការភ្ជាប់ទៅនឹងកោសិកាក្នុងប្រព័ន្ធភាពស៊ាំ ដើម្បីអនុញ្ញាតឱ្យប្រព័ន្ធភាពស៊ាំគ្រប់គ្រងកោសិកាមហារីកដោយខ្លួនឯង។
ការព្យាបាលដោយប្រើអង្គបដិប្រាណកាន់តែមានប្រជាប្រិយភាពខ្លាំង ប៉ុន្តែថ្នាំអង់ទីករដែលប្រើសម្រាប់ការព្យាបាលគឺមានតម្លៃថ្លៃខ្លាំងណាស់ ដូច្នេះហើយ ក្រុមស្រាវជ្រាវថៃសង្ឃឹមថា ជាមួយនឹងការរកឃើញថ្មីៗនេះ នឹងជួយប្រជាជនថៃក្នុងការកាត់បន្ថយថ្លៃដើមផលិតឱសថ និងផ្តល់លទ្ធភាពឱ្យអ្នកជំងឺទទួលបានថ្នាំកាន់តែទូលំទូលាយ៕ (ប្រភពពី Thailand Posts)
ចែករំលែកព័តមាននេះ