ខេត្តស្ទឹងត្រែង ៖ រមណីយដ្ឋានអន្លង់ឈើទាល ស្ថិតក្នុងឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង គឺនៅសល់តែរូបសំណាកនិងគ្រោងឆ្អឹង ដែលសហគមន៍រៀបចំដាក់ក្នុងទូកញ្ចក់តម្កល់គ្រោងឆ្អឹងផ្សោត និងមានជើងទម្រឱ្យខ្ពស់ផុតពីដីទុកជាកេរដំណែលនៅតំបន់នេះ ខណៈសត្វផ្សោតបានបាត់បង់ជីវិតគ្មានសល់…
ខេត្តស្ទឹងត្រែង ៖ រមណីយដ្ឋានអន្លង់ឈើទាល ស្ថិតក្នុងឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង គឺនៅសល់តែរូបសំណាកនិងគ្រោងឆ្អឹង ដែលសហគមន៍រៀបចំដាក់ក្នុងទូកញ្ចក់តម្កល់គ្រោងឆ្អឹងផ្សោត និងមានជើងទម្រឱ្យខ្ពស់ផុតពីដីទុកជាកេរដំណែលនៅតំបន់នេះ ខណៈសត្វផ្សោតបានបាត់បង់ជីវិតគ្មានសល់ ។
សហគមន៍អេកូទេសចរណ៍ព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង រៀបចំធ្វើទូកញ្ចក់ដាក់រូបសំណាកគ្រោងឆ្អឹងសត្វផ្សោតអភិរក្សទុកជាមរតក ។ តំបន់មួយនេះ លែងមានថនិកសត្វប្រភេទនេះទៀតហើយ តែនៅមានរូបសំណាកជំនួសវិញ ដើម្បីបញ្ជាក់ថា ជាកន្លែងដែលធ្លាប់មានសត្វផ្សោតរស់នៅ ។
បើតាមការបញ្ជាក់របស់លោកប្រធាននាយកដ្ឋានជលផលរដ្ឋបាលជលផល ។ ការបាត់បង់សត្វដ៏ពិសិដ្ឋនៃតំបន់អន្លងឈើទាលជាបញ្ហាបាត់ចំណូលដល់ប្រជាពលរដ្ឋសហគមន៍ផងដែរ ។ គ្រោងឆ្អឹងសត្វផ្សោតអភិរក្សទុកជាមរតក ដើម្បីបង្ហាញសត្វទឹកសាបមួយប្រភេទនេះ សម្រាប់ថ្ងៃអនាគតឱ្យកូនចៅ និងភ្ញៀវទេសចរ បានឃើញនិងបានស្គាល់ ។
លោក ស្រី វិចិត្រ នាយរដ្ឋបាលជនផលស្ទឹងត្រែងបានឱ្យដឹងនាព្រឹកថ្ងៃទី១៧ ខែកុម្ភៈ ឆ្នាំ២០២៣ នេះថា សត្វផ្សោតនៅចំណុចអន្លង់ឈើទាលបានងា.ប់អស់ហើយ ខណៈមុនឆ្នាំ២០១៩ មានចំនួន៣ក្បាល ហើយបានស្លា.ប់ជាបន្តបន្ទាប់ ដែលជាចុងក្រោយបានងា.ប់ នៅថ្ងៃទី១៥ កុម្ភៈ ឆ្នាំ២០២២។
លោកនាយរដ្ឋបាលជលផលបានឱ្យដឹងបន្តថា ចំពោះសត្វផ្សោតនៅអន្លង់ឈើទាល ជាប់ព្រំប្រទល់ប្រទេសឡាវ នៅដាច់ពីអន្លង់ផ្សោតនានា ដែលជាប់និងព្រំប្រទល់ខេត្តក្រចេះ ហើយជាសត្វផ្សោត លែងមានការបន្សាំខ្លួននៃការផ្លាស់ទីដូចសត្វផ្សោត នៅអន្លង់ត្បូងខ្លា អន្លង់ជ្រៅ ជាប់ខេត្តក្រចេះ ដែលមានការផ្លាស់ទីពីខេត្តក្រចេះ មកខេត្តស្ទឹងត្រែង ។ ការមិនបន្សាំខ្លួនរបស់សត្វផ្សោតនៅអន្លង់ឈើទាល ជាសញ្ញាមួយបង្ហាញថា គ្មានវត្តមាន សត្វ ផ្សោត សារជាថ្មីទៀតទេនៅអន្លង់ឈើទាលជាប់ប្រទេសឡាវ ។
លោកស្រី វិចិត្រ បានបញ្ជាក់ថា សត្វផ្សោតទន្លេមេគង្គត្រូវបានចាត់ថ្នាក់ ជាប្រភេទសត្វទទួលរងការគំរាមកំហែងជិតផុតពូជនៅក្នុងបញ្ជីក្រហមរបស់អង្គការ សហភាពអន្តរជាតិសម្រាប់អភិរក្សធម្មជាតិ ដែលហៅកាត់ថា IUCN ក្នុងឆ្នាំ២០០៤ (Smith & Beasley, 2004) និងជាប្រភេទសត្វជលផល កំពុងរងគ្រោះថ្នាក់មួយប្រភេទក្នុងចំណោមសត្វជលផលកំពុងរងគ្រោះថ្នាក់សរុបចំនួន៥៨ប្រភេទ ដែលមានកំណត់ ក្នុងអនុក្រឹត្យស្តីពី «ការកំណត់ប្រភេទផលនិងផលិតផលជលផលកំពុងរងគ្រោះថ្នាក់» លេខ ១២៣ អនក្រ.បក ចុះថ្ងៃទី១២ ខែសីហាឆ្នាំ២០០៩។
ក្រៅពីនេះ សត្វផ្សោតទន្លេមេគង្គត្រូវបាន ចាត់ថ្នាក់ក្នុង ឧបសម្ព័ន្ធ I នៃអនុសញ្ញាស្តីពី «ការធ្វើពាណិជ្ជកម្មលើប្រភេទសត្វនិងរុក្ខជាតិកំពុងទទួលរងគ្រោះថ្នាក់» ដែលហៅកាត់ថា CITES (Convention on International Trade in Endangered Species of Wild Fauna and Flora)។
លោក រឹទ្ធ ណារឿន ប្រធានប្រចាំតំបន់ ទន្លេមេគង្គលើ នៃអង្គការដៃគូ (WWF) អភិរក្ស សត្វ ផ្សោត ធ្លាប់ឱ្យដឹងការពីកន្លងទៅថា៖ លោកគាំទ្រលើការសាងសង់រូបសំណាក់ និងយកគ្រោងឆ្អឹង ដាក់ក្នុងទូកញ្ចក់ ដាក់តាំង នៅសហគមន៍ រមណីយដ្ឋាន ព្រះរំកិល ព្រោះវាជាយន្តការមួយបន្ថែម បានជួយ រក្សា និរន្តរភាពតំបន់ទេសចរណ៍ផ្សោតព្រះរំកិល នេះកុំឱ្យបាតបង់ទៅថ្ងៃអនាគត ។
លោកបន្តថា កិច្ចការអភិរក្សគ្រោងឆ្អឹងសត្វផ្សោតមេគង្គនេះ លោកនឹងពិគ្រោះយោបល់ ជាមួយ ផ្នែកពាក់ព័ន្ធ និងអង្គការដៃគូផ្សេងៗទៀត ដើម្បីរិះរកវិធីសាស្ត្រល្អៗ និងថវិកាដើម្បីជួយទំនុកបំរុងឱ្យ ដំណើរ ការអភិរក្សប្រព្រឹត្តទៅប្រកបដោយជោគជ័យ ។
សូមបញ្ជាក់ថា តំបន់រមណីយដ្ឋានអេកូទេសចរណ៍ធម្មជាតិសត្វផ្សោតអន្លង់កោះឈើទាល ព្រះរំកិលនេះ បានបើកដំណើរការជូនភ្ញៀវទស្សានាបានជិត២០ឆ្នាំមកហើយ ខណៈរមនីយដ្ឋានមួយនេះបានស្រូបទាញភ្ញៀវទេសចរមកទស្សនាកំសាន តាមរយៈមានថនិកសត្វផ្សោតរស់នៅ និងមានព្រំប្រទល់ ជាប់និងប្រទេសឡាវ ។
ចែករំលែកព័តមាននេះ