រាជធានីភ្នំពេញ៖ មជ្ឈមណ្ឌលពាណិជ្ជកម្ម និងឧស្សាហកម្ម បារាំង – កម្ពុជា ហៅកាត់ថា (CCIFC) និងគណៈកម្មាធិការទីប្រឹក្សាពាណិជ្ជកម្មបរទេសនៃប្រទេសបារាំងប្រចាំកម្ពុជា (CCE)…
រាជធានីភ្នំពេញ៖ មជ្ឈមណ្ឌលពាណិជ្ជកម្ម និងឧស្សាហកម្ម បារាំង – កម្ពុជា ហៅកាត់ថា (CCIFC) និងគណៈកម្មាធិការទីប្រឹក្សាពាណិជ្ជកម្មបរទេសនៃប្រទេសបារាំងប្រចាំកម្ពុជា (CCE) នឹងរៀបចំកម្មវិធី «វេទិកាធុរកិច្ចបារាំង-កម្ពុជា» ជាលើកដំបូងបង្អស់រយៈពេល ២ ថ្ងៃ គិតចាប់ពីថ្ងៃទី៩ និងទី១០ ខែមិថុនា ឆ្នាំ២០២២ នៅរាជធានីភ្នំពេញ ក្នុងគោលបំណងបង្ហាញពីបរិបទអំណោយផលរបស់កម្ពុជា សម្រាប់ធុរកិច្ច ហើយក៏ដូចជាបង្ហាញថា កម្ពុជា ជាច្រកដែលមានភាពងាយស្រួល មានភាពប្រកួតប្រជែងខ្ពស់ និងមានប្រសិទ្ធភាព សម្រាប់ក្រុមហ៊ុន ក្នុងការនាំចេញទៅកាន់ទីផ្សារអាស៊ី និងពិភពលោកផងដែរ ។
ក្នុងកម្មវិធីសន្និសីទសារព័ត៌មាន នៅថ្ងៃទី១ ខែមិថុនា ឆ្នាំ២០២២ នេះ លោក Arnaud Darc ប្រធានក្រុមប្រឹក្សាពាណិជ្ជកម្មបរទេសនៃប្រទេសបារាំង ប្រចាំកម្ពុជា បានឱ្យដឹងថា៖ «នៅក្នុងប្រទេសកម្ពុជា CCE មានគណៈកម្មាធិការ ទីប្រឹក្សាចំនួន ១៣ នាក់ដែលបានចាប់តាំងផ្ទាល់ដោយនាយករដ្ឋមន្ត្រីបារាំង និងធ្វើការជិតស្និទ្ធជាមួយនឹងស្ថានទូតបារាំងប្រចាំប្រទេសកម្ពុជា ។ CCE ដើរតួនាទីក្នុងការជម្រុញធុរកិច្ច ឬក៏ក្រុមហ៊ុនបារាំងអោយធ្វើការវិនិយោគនៅក្នុងប្រទេសកម្ពុជា ក៏ដូចជាការសហការនិងការអភិវឌ្ឍន៍ផ្សេងៗទៀតផងដែរ» ។
លោក Soreasmey KEBIN ប្រធានសភាពាណិជ្ជកម្ម និងឧស្សាហកម្ម បារាំង-កម្ពុជា បាននិយាយថា៖ «ប្រទេសកម្ពុជាគឺជាប្រទេសដំបូងគេបង្អស់ក្នុងតំបន់ ដែលចាប់ផ្តើមបើកធុរកិច្ចឡើងវិញ បន្ទាប់ពីបានផ្អាកមួយរយៈដោយសារជំងឺរាតត្បាតកូវីដ ១៩ ហើយគោលបំណងក្នុង «វេទិកាធុរកិច្ចបារាំង-កម្ពុជា» នេះក៏ចង់បង្ហាញឱ្យធុរកិច្ចនៃប្រទេសបារាំងបានដឹងថា កម្ពុជា មិនមានតម្រូវឯកសារផ្សេងៗ និងមិនចាំបាច់ធ្វើចត្តាឡីស័ក ឬតេស្ត នោះទេ ដូចនេះកម្ពុជាបាននិងកំពុងវិលរកសភាពធម្មតាឡើងវិញ ដែលនេះគឺជាឱកាសដើម្បីបង្កើតសក្តានុពលនៅប្រទេសកម្ពុជា»។
លោក Soreasmey KEBIN បានបន្តថា ជាមួយនឹងវេទិកានេះផងដែរ មានគោលដៅ ២ ដោយគោលដៅទី១ គឺជាការបង្ហាញសក្តានុពលប្រទេសកម្ពុជាក៏ដូចជាការទាក់ទាញ វិនិយោគិនមកប្រទេសបារាំងដើម្បីពិចារណា ឬក្នុងការចាប់អារម្មណ៍វិនិយោគក្នុងប្រទេសកម្ពុជា។ និងគោលដៅទី២ នឹងជួយរំលឹកដល់សាធារណជន និងធុរកិច្ចកម្ពុជា ថាវិស័យធុរកិច្ចបារាំងនៅតែមានវត្តមានរឹងមុំាំនៅក្នុងប្រទេសកម្ពុជា និងនៅតែបន្តចូលរួមចំណែកក្នុងការអភិវឌ្ឍន៍ ក៏ដូចជាលើកកម្ពស់សេដ្ឋកិច្ចកម្ពុជា ដោយវិស័យធុរកិច្ចនេះ ។
គួរបញ្ជាក់ផងដែរថា ក្រុមហ៊ុនជាង ២៥០ នឹងត្រូវបានរំពឹងថានឹងមកចូលរួមក្នុងព្រឹត្តិការណ៍នេះ ដោយជាង ១០០ ក្រុមហ៊ុន មកពីប្រទេសអាស៊ាន និងបារាំង ហើយ «វេទិកាធុរកិច្ចបារាំង-កម្ពុជា» ដែលមានរយៈពេល២ថ្ងៃនេះ នឹងធ្វើឡើងក្នុងទីតាំង ៦ កន្លែងផ្សេងៗក្នុងរាជធានីភ្នំពេញ ៕
ចែករំលែកព័តមាននេះ