ឆ្នាំ ២០២២ ជាឆ្នាំគោលនៃយុទ្ធនាការ «កម្ពុជា ៖គោលដៅទេសចរណ៍សុវត្ថិភាព និងបៃតង»
- ភ្នំពេញ
រាជធានីភ្នំពេញ ៖ កម្ពុជាសម្រេចយកឆ្នាំ ២០២២ ជាឆ្នាំគោលនៃការបើកយុទ្ធនាការ «កម្ពុជា ៖ គោលដៅទេសចរណ៍សុវត្ថិភាព និងបៃតង» ។…
រាជធានីភ្នំពេញ ៖ កម្ពុជាសម្រេចយកឆ្នាំ ២០២២ ជាឆ្នាំគោលនៃការបើកយុទ្ធនាការ «កម្ពុជា ៖ គោលដៅទេសចរណ៍សុវត្ថិភាព និងបៃតង» ។ លោកថោង ខុន រដ្ឋមន្ត្រីក្រសួងទេសចរណ៍បានលើកទ្បើងថា កម្ពុជាបានទទួលឥទ្ធិពលដែលមិនធ្លាប់មានពីវិបត្តិនៃជំងឺកូវីដ-១៩ ដោយវិស័យទេសចរណ៍ ដែលធ្លាប់តែជាចន្ទល់សេដ្ឋកិច្ចដ៏សំខាន់មួយ បានទទួលរងផលប៉ះពាល់ធ្ងន់ធ្ងរជាងគេ ។ ក្នុងកំលុងវិបត្តិនៃជំងឺកូវីដ-១៩ អាជីវកម្មទេសចរណ៍ជាច្រើនត្រូវបានផ្អាកដំណើរការ ដែលបណ្ដាលឱ្យបុគ្គលិករាប់ម៉ឺននាក់បានបាត់បង់ការងារ និងប៉ះពាល់ជាអវិជ្ជមានដល់ប្រជាជនជាច្រើនផ្សេងទៀត ដែលពឹងផ្អែកលើវិស័យទេសចរណ៍នេះ ។
ទោះយ៉ាងណាលោករដ្ឋមន្ត្រីបញ្ជាក់ថា ជាមួយស្មារតីបុរេសកម្ម និងចក្ខុវិស័យវែងឆ្ងាយ រាជរដ្ឋាភិបាលកម្ពុជា បានគ្រប់គ្រងការឆ្លងរាលដាលនៃជំងឺកូវីដ-១៩ ប្រកបដោយប្រសិទ្ធភាព និងអាចបើកប្រទេសឡើងវិញ កាលពីថ្ងៃទី ០១ ខែ វិច្ឆិកា ឆ្នាំ ២០២១ និងបានបើកទទួលស្វាគមន៍ទេសចរអន្តរជាតិ ដែលបានចាក់វ៉ាក់សាំងដូសមូលដ្ឋានពេញលេញ ដោយមិនតម្រូវឱ្យពួកគាត់ធ្វើចត្តាឡីស័កឡើយ កាលពីថ្ងៃទី ១៤ ខែ វិច្ឆិកា ឆ្នាំ ២០២១ ផងដែរ ។
ជាមួយគ្នាននេះ រាជរដ្ឋាភិបាលក៏បានសម្រេចដាក់ឱ្យប្រើប្រាស់នូវ ផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិ ជំងឺកូវីដ-១៩ នៅពីថ្ងៃទី ៣០ ខែ មីនា ឆ្នាំ ២០២១ និង ផែនការយុទ្ធសាស្ត្រស្តីពីការបើក ទទួលទេសចរណ៍វ៉ាក់សាំង និងវិធានការគោលនយោបាយជំរុញចលនាទេសចរណ៍ផ្ទៃក្នុង ឆ្នាំ ២០២១-២០២៣ នៅថ្ងៃទី ២៣ ខែ តុលា ឆ្នាំ ២០២១ ។
លោកបញ្ជាក់ថា ដើម្បីធានានូវជោគជ័យនៃការបើកទទួលទេសចរណ៍អន្តរជាតិឡើងវិញ គឺចាំបាច់ត្រូវធានាឱ្យបាននូវភាពជឿជាក់ និងទុកចិត្តថាជា «គោលដៅទេសចរណ៍សុវត្ថិភាព» ដោយឈរលើអត្រានៃការចាក់វ៉ាក់សាំងជាសូចនាករគោល។ ជាក់ស្តែង ក្នុងវេទិកាទេសចរណ៍អាស៊ាន ២០២២ (ATF 2022) ដែលបានរៀបចំឡើង កាលពីថ្ងៃទី ១៦ ដល់ ២២ ខែមករា ឆ្នាំ ២០២២ នៅក្រុងព្រះសីហនុ បានប្រព្រឹត្តទៅដោយជោគជ័យ និងល្អប្រសើរ ដោយភ្ញៀវអន្តរជាតិទាំងអស់ ចាកចេញពីកម្ពុជាប្រកបដោយសុវត្ថិភាព ជាមួយនឹងលទ្ធផលតេស្ត PCR អវិជ្ជមាន ។ ការណ៍នេះសបញ្ជាក់ថា កម្ពុជាពិតជាមានសមត្ថភាពក្នុងការបង្ការ និងគ្រប់គ្រងការឆ្លងរាលដាលនៃជំងឺកូវីដ-១៩ ប្រកបដោយប្រសិទ្ធភាពខ្ពស់ ។
«ភាពជោគជ័យនេះ គឺផ្សារភ្ជាប់ជាមួយភាពជោគជ័យនៃយុទ្ធនាការចាក់វ៉ាក់សាំងបង្ការជំងឺកូវីដ-១៩ របស់រាជរដ្ឋាភិបាលកម្ពុជា ។ ក្នុងន័យនេះ រាជរដ្ឋាភិបាលកម្ពុជាបានគាំទ្រនូវកម្មវិធី «ទេសចរណ៍វ៉ាក់សាំង» និងបានដាក់ចេញយុទ្ធនាការ «កម្ពុជា ៖ គោលដៅទេសចរណ៍ប្រកបដោយសុវត្ថិភាព និងបៃតង» នេះជាការបញ្ជាក់របស់លោក ថោង ខុន ។
លោករដ្ឋមន្ត្រីក្រសួងទេសចរណ៍បានស្នើផងដែរឱ្យក្រុមការងារលេខាធិការដ្ឋាននៃក្រុមការងាររាជរដ្ឋាភិបាល និងឯកជនដើម្បីស្តារ និងលើកស្ទួយវិស័យទេសចរណ៍កម្ពុជាបើកការបណ្តុះបណ្តាលជនបង្គោល តាមរាជធានីខេត្ត ទាំងកម្រិតអាជ្ញាធរ មូលដ្ឋាន និងកម្រិតឯកជន ។ លើសពីនេះ ស្នើឱ្យក្រុមការងារប្រតិបត្តិ ដើម្បីវាយតម្លៃ និងគ្រប់គ្រងគោលដៅទេសចរណ៍សុវត្ថិភាពរាជធានីភ្នំពេញ, ខេត្តសៀមរាប និងខេត្តព្រះសីហនុ ត្រូវបន្តតាមដាន វាយតម្លៃ និងត្រួតពិនិត្យការអនុវត្តវិធានសុវត្ថិភាព និងនីតិវិធីប្រតិបត្តិស្តង់ដាអប្បបរមា (SOP) របស់អាជីវកម្មទេសចរណ៍ឱ្យបានត្រឹមត្រូវ ក៏ដូចជាស្ថានភាពជំងឺកូវីដ-១៩ នៅតំបន់របស់ខ្លួនឱ្យបានខ្ជាប់ខ្ជួន ៕
ចែករំលែកព័តមាននេះ