បកទៅបកមក ! ចុងក្រោយកញ្ញា លីវ ជីលី ក្លាយជាម្ចាស់ម្កុដឆ្នាំ២០២០
- ភ្នំពេញ
រាជធានីភ្នំពេញ ៖ ពិធីផ្ទេរតំណែង Miss Grand Cambodia 2020 ត្រូវបានរៀបចំឡើងតាមការគ្រោងទុកយ៉ាងតក់ក្រហល់ ពោលគឺនៅថ្ងៃទី០១ ខែកុម្ភៈ…
រាជធានីភ្នំពេញ ៖ ពិធីផ្ទេរតំណែង Miss Grand Cambodia 2020 ត្រូវបានរៀបចំឡើងតាមការគ្រោងទុកយ៉ាងតក់ក្រហល់ ពោលគឺនៅថ្ងៃទី០១ ខែកុម្ភៈ ឆ្នាំ២០២១។ មហាជន និង អ្នកគាំទ្របានទន្ទឹងរង់ចាំ និងអ៊ុតមើលថា តើ Miss Grand មួយណា ដែលត្រូវគ្រងតំណែង ជំនួសកញ្ញា សេង រដ្ឋា Miss Grand Cambodia 2020 និងកញ្ញា លឹម សុធាវី ជ័យលាភីរងទី១ បន្ទាប់ពីកញ្ញាទាំង២ព្រមព្រៀងលាលែងពីតំណែង និងត្រូវបញ្ចប់កិច្ចសន្យាទាំងឡាយជាមួយស្ថាប័ន Miss Grand Cambodia កាលពីពេលថ្មីៗនេះ ខណៈការប្រកួតលើអន្តរជាតិខិតជិតមកដល់ នៅក្នុងខែមីនា ខាងមុខនៅឯប្រទេសថៃ ។
ភាពចម្រូងចម្រាស់មួយនេះ ពិតជាក្តៅគគុកដែលធ្វើឱ្យមហាជនទូទៅ ជាពិសេសអ្នក និយមគាំទ្រ និងតាមដាន Miss Grand តែម្តង។ ជាក់ស្តែងលទ្ធផលជាផ្លូវការនៃការជ្រើសរើសតំណែងជំនួសកញ្ញា សេង រដ្ឋា នោះ ហើយអ្នកដែលក្លាយជាម្ចាស់ម្កុដ Miss Grand Camdodia 2020 គឺកញ្ញា លីវ ជីលី បវរកញ្ញាជ័យលាភីរងទី២ មកពីខេត្តបន្ទាយមានជ័យ ខណៈជ័យលាភីលំដាប់រងទី៣ ត្រូវឡើងមកលំដាប់រងទី១ និងលំដាប់រងទី៤ ត្រូវឡើងមកលំដាប់រងទី២វិញ។
នៅក្នុងពិធីផ្ទេរតំណែង និងគ្រងម្កុដសារជាថ្មីនេះ កញ្ញាលីវ ជីលី បានបញ្ជាក់ថា រយៈពេល១ខែ គឺពិតជាខ្លី ហើយអ្វីដែលនាងប្រឹងប្រែងខ្លាំង គឺការហ្វឹកហាត់ដើរដើម្បីកាន់តែបន្ថែមទំនុកចិត្តដែលនាងមានស្រាប់ នាងស្នើឲ្យមហាជនពិសេសអ្នកគាំទ្រវិស័យកញ្ញាឯកជួយផ្តល់ជាកម្លាំងចិត្ត បញ្ចេញមតិក្នុងន័យកែលម្អ ជាជាងការរិះគន់បែបជាន់ពន្លិច និងបញ្ចប់ការគិតថា ត្រឹមតែជាការចេញទៅប្រកួត ដើម្បីជាការអមឆាក ខណៈដែលពេលនេះនាងក៏ត្រូវការកម្លាំងចិត្ត ដើម្បីបន្តពង្រឹងសមត្ថភាពឲ្យកាន់តែល្អប្រសើរតាមតែអាចធ្វើទៅបាន។
លោក អ៊ិន សុភិន វិញបានលើកឡើងថា ក្រុមហ៊ុនបានត្រៀមគ្រប់សព្វដើម្បីថែទាំ ហ្វឹកហាត់ទាំងការដើរបង្ហាញម៉ូដ ឆ្លើយសំណួរ និងសកម្មភាពផ្សេងៗ ដើម្បីប្រាកដថានឹងអាចក្លាយជាបេក្ខនារីតំណាងជាតិចេញទៅប្រកួតលើឆាកអន្តរជាតិបាន។ លោកថា បញ្ហាដែលកើតឡើងកន្លងមក នឹងក្លាយជាបទពិសោធន៍ថ្មីសម្រាប់ការផលិតកម្មវិធីលើកក្រោយ ហើយបើទោះបីជានៅសល់ពេលមិនច្រើនក្តី ប៉ុន្តែស្ថាប័ននឹងខិតខំពង្រឹងសមត្ថភាពកញ្ញាឯកតំណាងជាតិតាមលទ្ធភាព និងដើម្បីបញ្ចប់ការគិតថា ត្រឹមតែជាបេក្ខនារីអមឆាក ដែលសូម្បីតែឈុតតំណាងជាតិ ឈុតរាត្រីសមោសរសម្រាប់កញ្ញាឯកគ្រងក៏បានត្រៀមរួចជាស្រេចដែរ៕
ចែករំលែកព័តមាននេះ