រាជធានីភ្នំពេញ ៖ បុរសម្នាក់បើកម៉ូតូកង់បីឥណ្ឌាមួយគ្រឿងទើបត្រឡប់មកពីដឹកភ្ញៀវវិញ ជិះធ្លាក់ជង្ហុកហោះគ្រវីគ្រវ៉ាត់ បណ្តាលឲ្យខ្ទាតអ្នកបើកបរទៅចិញ្ចើមផ្លូវស្លា.ប់ ចំណែកម៉ូតូកង់បីរ៉េចង្កូតជ្រុលទៅផ្លូវម្ខាងទៀតត្រូវរថយន្តមួយគ្រឿងបុកពេញទំហឹង បណ្តាលឱ្យរងការខូចខាត។
ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង៩និង៣០នាទីយប់ថ្ងៃទី៨ ខែធ្នូ ឆ្នាំ២០២០ ត្រង់ចំណុចក្បែរយានដ្ឋានជួសជុលរថយន្តយីហោ អេផ្លឹស តាម
បណ្ដោយផ្លូវជាតិលេខ១ ស្ថិតក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។
ជនរងគ្រោះឈ្មោះ ស៊ុន ពិឈីម ភេទប្រុស អាយុ៣០ឆ្នាំ ស្នាក់នៅសង្កាត់ជ្រោយចង្វារ ខណ្ឌជ្រោយចង្វា រាជធានីភ្នំពេញ ជាអ្នកបើកបរម៉ូតូកង់បីឥណ្ឌាមួយគ្រឿងម៉ាក បាចា ពណ៌ស ពាក់ស្លាកលេខ ភ្នំពេញ 1HV-9755 ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញបុរសរងគ្រោះបានបើកម៉ូតូកង់បីមួយគ្រឿង ទើបតែត្រឡប់មកពីដឹកភ្ញៀវនៅខេត្តព្រៃវែង ក្នុងគោលបំណងទៅផ្ទះនៅឯជ្រោយចង្វារវិញ ដោយបានធ្វើដំណើរតាមបណ្ដោយផ្លូវជាតិលេខ១ ក្នុងទិសដៅពីកើតទៅលិចក្នុងល្បឿនលឿន។
តាមប្រភពព័័ត៌៌មានបានបន្តថា លុះមកដល់ចំណុចកើតហេតុ ម៉ូតូកង់បីក៏បានជ្រុលទៅធ្លាក់ចូលជង្ហុកមួយជម្រៅប្រមាណ១តឹក ដែលនៅក្បែរចិញ្ចើមផ្លូវ ធ្វើឲ្យម៉ូតូកង់បីហោះគ្រវីក្រវ៉ាត់ខ្ទាតបុរសរងគ្រោះចេញពីម៉ូតូកង់បីទៅចិញ្ចើមផ្លូវរងរបួសយ៉ាងធ្ងន់ធ្ងរ ។
តាមប្រភពព័័ត៌៌មានបានបន្តថា ដោយឡែកម៉ូតូកង់បីនៅតែមិនទាន់អស់ល្បឿន ក៏បានជ្រុលទៅមុខឆ្លងចូលផ្លូវម្ខាងទៀត ស្របពេលនោះក៏មានរថយន្តមួយគ្រឿងប្រភេទមួយបាំងកន្លះ មិនចាំស្លាកលេខ ដែលធ្វើដំណើរបញ្ច្រាសទិសដៅគ្នាបានមកបុកម៉ូតូកង់បីនោះចំពីមុខយ៉ាងពេញទំហឹង បណ្តាលឲ្យម៉ូតូកង់បីរងការខូចខាតយ៉ាងដំណំ។ ចំណែកឯរថយន្តបានបន្ថែមល្បឿនបើកគេចចេញពីកន្លែងកើតហេតុបាត់ស្រមោលភ្លាមៗតែម្ដង។
តាមប្រភពព័័ត៌មានបានបន្តទៀតថា បន្ទាប់មកក៏មានរថយន្តសង្គ្រោះបានមកដល់កន្លែងកើតហេតុដើម្បីដឹកជនរងគ្រោះយកទៅសង្គ្រោះដែរ តែជាអកុសល ពេលនោះជនរងគ្រោះគឺបានដាច់ខ្យល់ស្លា.ប់បាត់ទៅហើយ សមត្ថកិច្ចក៏បានចុះមកដល់កន្លែងកើតហេតុ ដើម្បីទំនាក់ទំនងទៅកាន់សាច់ញាតិរបស់ជនរងគ្រោះផងដែរ។
ក្រោយពេលកើត សាច់ញាតិរបស់ជនរងគ្រោះក៏បានមកដល់កើតហេតុស្រែកទ្រហោយំឱបសពជនរងគ្រោះគួរឱ្យសង្វែគ ។ បន្ទាប់មកសមត្ថកិច្ចក៏បានប្រគល់សពទៅឱ្យសាច់ញាតិដឹកយកទៅធ្វើបុណ្យទៅតាមប្រពៃណីនៅឯផ្ទះ។ ចំណែកឯម៉ូតូកង់បីត្រូវបានសមត្ថកិច្ចជំនាញធ្វើការវាស់វែងស្ទូចយកទៅរក្សាទុកនៅអធិការដ្ឋាននគរបាលខណ្ឌច្បារអំពៅរង់ចាំប្រគល់ទៅឲ្យសាច់ញាតិជនរងគ្រោះនៅពេលក្រោយជាបន្តទៀត៕ (កែសម្រួលដោយ ៖ ធីតា)
ចែករំលែកព័តមាននេះ