រាជធានីភ្នំពេញ ៖ បុរសម្នាក់ជាជាងបៀកថ្នាំតាមជញ្ជាំងដែលត្រូវក្រុមជនមិនស្គាល់មុខមួយក្រុមកាប់សុសសាច់បណ្តាលឱ្យរងរបួសធ្ងន់ត្រូវគេបញ្ជូនទៅសង្គ្រោះនៅមន្ទីរពេទ្យកាល់ម៉ែតកាលពីម្សិលមិញនោះ បានស្លាប់ហើយកាលពីវេលាម៉ោង១០ និង៥០នាទីយប់ថ្ងៃទី២២ មេសា ២០១៤ ។
គួររំលឹកផងដែរថា បុរសម្នាក់ជាជាងបៀកថ្នាំតាមជញ្ជាំងបានរងរបួសយ៉ាងធ្ងន់ដេកដួលក្នុងថ្លុកឈាម និងត្រូវបានបញ្ជូនទៅកាន់មន្ទីរពេទ្យកាល់ម៉ែត ដើម្បីសង្គ្រោះបន្ទាន់ ក្រោយពីជនមិនស្គាល់មុខមួយក្រុម មានគ្នាចំនួន៦នាក់ ប្រដាប់ដោយកាំបិតប៉័ងតោ គ្រប់ដៃ ជិះម៉ូតូចំនួន៣គ្រឿង បានធ្វើសកម្មភាពកាប់ប្រហារជាច្រើនកាំបិត ខណៈពេលរូបគេកំពុងឈរបៀកថ្នាំជញ្ជាំងផ្ទះល្វែងមួយកន្លែង ។
គេសង្ស័យថា អំពើហិង្សានេះ មានជាប់ពាក់ព័ន្ធនឹងរឿងស្នេហាត្រីកោណ គឺជនរងគ្រោះរូបនេះទៅស្រឡាញ់ស្ត្រីម្នាក់ ដែលលែងលះប្តីមិនទាន់ដាច់ស្រេច ហើយត្រូវបក្សពួកប្តីស្ត្រីរូបនោះ តាមទៅកាប់ប្រហារបែបនេះតែម្តង ។ ហេតុការណ៍នេះបង្កឱ្យមានការភ្ញាក់ផ្អើលឡើង កាលពីវេលាម៉ោង២ និង២០នាទីរសៀល ថ្ងៃទី២២ មេសា នៅការដ្ឋានសំណង់ផ្ទះល្វែងមួយកន្លែង ស្ថិតនៅក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ។
បុរសរងគ្រោះឈ្មោះ អ៊ុយ អាយ អាយុ២៧ឆ្នាំ ស្នាក់នៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតក្នុងភូមិក្រឡោង ឃុំទឹកថ្លា ស្រុកស្វាយអន្ទរ ខេត្តព្រៃវែង បានរងរបួសជិត៣០កំាំបិត គឺរបួសសុសសាច់ ខ្លួនប្រាណ ដៃជើង និងក្បាល ដួលសន្លប់ក្នុងថ្លុកឈាម ។ ដោយឡែក ក្រុមជនដៃដល់ មានគ្នាចំនួន៦នាក់ ប្រដាប់ដោយកាំបិតប៉័ងតោគ្រប់ដៃ និងជិះម៉ូតូចំនួន៣គ្រឿង ក្នុងនោះមានគេស្គាល់១គ្រឿងគឺ ឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ ៣២៦៧ ។ ក្រោយពេលកាប់ប្រហាររួចហើយ ក្រុមជនទាំងនោះក៏បាននាំគ្នាជិះម៉ូតូគេចខ្លួនបាត់ស្រមោល៕
ចែករំលែកព័តមាននេះ