ម៉ាទ្បេស៊ីបញ្ចុះតម្លៃទំនិញសំរាប់អ្នកទេសចររយៈពេល៨សបា្ដហ៍
ដោយ ៖ អប្សរា
ថ្ងៃចន្ទ ទី១២ ខែកក្កដា ឆ្នាំ២០១០ ម៉ោង ១៦:៥៨
រាជធានីភ្នំពេញ ៖ ថ្លែងក្នុងសន្និសីទសារព័ត៌មានកាលពីព្រឹកថ្ងៃទី១២ កក្កដា ឆ្នាំ ២០១០ នេះ មន្ដ្រីក្រុមប្រឹក្សាទេសចរណ៍នៃ ប្រទេសម៉ាឡេស៊ី បានឱ្យដឹងថា ដើម្បីទាក់ទាញភ្ញៀវទេសចរឱ្យមានកំណើនខ្ពស់នោះ ប្រទេសនេះនឹងរៀបចំពិធីបុណ្យលក់បញ្ចុះតម្លៃទំនិញដ៏ធំបំផុតរយៈពេល៨សបា្ដហ៍គិត ចាប់ពីថ្ងៃទី២៤ កក្កដា ឆ្នាំ២០១០ នេះតទៅ ។ កញ្ញាសៅ រដ្ឋា ប្រធានផ្នែកទីផ្សារនៃទេសចរណ៍ម៉ាឡេស៊ីប្រចាំកម្ពុជា បាននិយាយថា ចាប់ពីខែកក្កដា ដល់ខែកញ្ញា ឆ្នាំ២០១០ គឺជាពេលវេលាដ៏ល្អបំផុតសំរាប់ប្រជាជនកម្ពុជា ក្នុងការធ្វើដំណើរទៅកំសាន្ដនៅប្រទេសម៉ាឡេស៊ី ពីព្រោះនេះគឺជាពេលវេលាដែលមានការលក់បញ្ចុះតំលៃទំនិញស្ទើរតែគ្រប់មុខនៅប្រទេសម៉ាឡេស៊ី ។
ទន្ទឹមនោះដើម្បីផ្ដល់ឱកាសឱ្យកាន់តែច្រើនដល់ប្រជាជនកម្ពុជា ដែលបានចូលរួមក្នុងពិធីលក់បញ្ចុះ តំលៃទំនិញនេះ ទេសចរម៉ាឡេស៊ីបានសហការជាមួយក្រុមហ៊ុនម៉ាឡេស៊ីអ៊ែរឡាញ (Malaysia Airline) ដើម្បីរៀបចំកញ្ចប់ ទេសចរណ៍ដែលមានតំលៃត្រឹមតែចំនួន៣៣៥ដុល្លារប៉ុណ្ណោះ សំរាប់ការធ្វើដំណើរការស្នាក់នៅសណ្ឋាគារផ្កាយ៤ និងអាហារសំរាប់ការធ្វើដំណើរទេសចរណ៍ទៅកាន់ ទីក្រុងគូឡាឡាំពួរ ប្រទេសម៉ាឡេស៊ីរយៈ ពេលពីរយប់បីថ្ងៃ ដែលនៅចន្លោះពីថ្ងៃទី២៤ កក្កដា ដល់ថ្ងៃទី១៧ កញ្ញា ឆ្នាំ២០១០ នេះ ។
កញ្ញាសៅ រដ្ឋា បានរំពឹងថា រយៈពេល៨ សបា្ដហ៍នៃពិធីបុណ្យលក់បញ្ចុះតំលៃមុខ ទំនិញដ៏ច្រើននេះ ប្រទេសម៉ាឡេស៊ី និងទទួលបានភ្ញៀវទេសចរយ៉ាងច្រើនក្នុងពិភព លោកមិនខាន ។ ព័ត៌មានលំអិតនឹងផ្សាយ ជូននៅពេលក្រោយ និងនៅលើទំព័រកាសែត កោះសន្ដិភាព .
