ខេត្តព្រះសីហនុ ៖ សាកសពបុរសជនជាតិហូឡង់ម្នាក់ ប្រកបរបរបើកហាងលក់ម្ហូបអាហារ និងស្រាបៀរ សម្រាប់ជនជាតិបរទេស បានអង្គុយស្លាប់ក្នុងបន្ទប់ទឹកអស់រយៈពេល ៤ថ្ងៃ បន្ទាប់ពីជះក្លិនស្អុយចេញពីក្នុងហាងធុំក្លិនស្អុយយ៉ាងខ្លាំងមកខាងក្រៅទើបប្រជាពលរដ្ឋ ដែលមានលំនៅដ្ឋានក្បែរហាងរាយការណ៍ជូនសមត្ថិកិច្ចមូលដ្ឋានចុះមកធ្វើការត្រួតពិនិត្យអំពីក្លិនស្អុយដ៏អសោចទើបដឹងថា ជនបរទេសដែលទើបជួលកន្លែងបើកហាងថ្មីៗ បានអង្គុយស្លាប់នៅក្នុងបន្ទប់ទឹក (បង្គន់)។
លោក ខៀវ វណ្ណថា នាយប៉ុស្តិ៍រដ្ឋបាលសង្កាត់៣ ក្រុងព្រះសីហនុ បានឲ្យដឹងថា ជនជាតិបរទេសដែលអង្គុយស្លាប់នៅក្នុងបន្ទប់ទឹក (បង្គន់) ឈ្នោះ Brantas Vincent Menno ភេទប្រុស អាយុ ៥៥ឆ្នាំ ជនជាតិហូឡង់ កាន់លិខិតឆ្លងដែនលេខ៤៣៩ RCR៥ ចុះថ្ងៃទី១៥ ខែឧសភា ឆ្នាំ២០១២ ផុតកំណត់ថ្ងៃទី១៥ ខែឧសភា ឆ្នាំ២០១៧។
ជនរងគ្រោះខាងលើទើបតែបានមកជួលហាងពីម្ចាស់កម្មសិទ្ធិឈ្មោះ សឹម ស៊ីថា កាលពីថ្ងៃទី២៦ ខែកញ្ញា ឆ្នាំ២០១៣ ដែលមានទីតាំងស្ថិតនៅក្រុមទី២៨ ភូមិ៣ សង្កាត់លេខ៣ (ចំណុចឧតុនិយម ក្រុងព្រះសីហនុ) ដែលមានយីហោឈ្មោះ ផេតឌី ហ្វេសធី។
លោកបន្តទៀតថា បន្ទាប់ពីទទួលបានព័ត៌មានពីប្រជាពលរដ្ឋ នៅថ្ងៃទី១២ ខែធ្នួ ឆ្នាំ២០១៣ ដែលរស់នៅក្បែរទីតាំងហាងខាងលើថា មានធុំក្លិនស្អុយយ៉ាងខ្លាំងចេញពីក្នុងហាងខាងលើ លោកក៏បញ្ជាឲ្យកម្លាំងនគរបាលប៉ុស្តិ៍រដ្ឋបាលសង្កាត់លេខ៣ ចុះមកបើកទ្វារត្រួតពិនិត្យទើបដឹងថា ជនបរទេសដែលបើកហាងលក់ដូរទើបតែបានរយៈពេលប្រមាណជា ៣ខែ បានអង្គុយស្លាប់ក្នុងបន្ទប់ទឹកឡើងហើមស្ទើររលេះរលួយសាច់ចោលក្លិនអាសោចចេញមកខាងក្រៅស្ទើរទ្រាំមិនបាន។
លោក ខៀវ វណ្ណថា បានឲ្យដឹងទៀតថា ដោយសារតែសាកសពធុំក្លិនស្អុយខ្លាំងពេកធ្វើឲ្យគ្រូពេទ្យផ្នែកបច្ចេកទេសពិនិត្យសាកសព ក៏ដូចជាការិយាល័យបច្ចេកទេសពិនិត្យសាកសព នៃស្នងការដ្ឋាននគរបាលខេត្តព្រះសីហនុ មិនអាចធ្វើការពិនិត្យធ្វើកោសល្យវិច្ឆ័យឲ្យបានច្បាស់លាស់ទៅលើជនរងគ្រោះដោយមិនដឹងថា ស្លាប់ដោយសារមូលហេតុអ្វី គ្រាន់តែបានធ្វើការសន្និដ្ឋានក្រៅផ្លូវការថា ជនរងគ្រោះអាចបណ្ដាលមកពីជំងឺលើសឈាម ខណៈអង្គុយបត់ជើងធំក្នុងបង្គន់ ក៏ផ្ងារទៅក្រោយបោកក្បាលនឹងជញ្ចាំងបណ្ដាលឲ្យស្លាប់តែម្នាក់ឯងគ្នានអ្នកណាដឹង។
ប្រជាពលរដ្ឋដែលមានលំនៅដ្ឋានក្បែរហាងជនរងគ្រោះខាងលើ បានរិះគន់ទៅលើអាជ្ញាធរដែនដីសង្កាត់លេខ៣ ក្រុងព្រះសីហនុ នគរបាលប៉ុស្តិ៍រដ្ឋបាល ក៏ដូចជាគ្រូពេទ្យ ប្រធានការិយាល័យបច្ចេកទេសកោសល្យវិច្ឆ័យពិនិត្យសាកសព នៃស្នងការដ្ឋាននគរបាលខេត្តព្រះសីហនុ ថា មានភាពកំសោយយ៉ាងខ្លាំងក្នុងការគ្រប់គ្រងដែនសមត្ថិកិច្ចរបស់ខ្លួនទុកឲ្យជនរងគ្រោះស្លាប់នៅក្នុងហាងអស់រយៈពេល ៣ ទៅ ៤ថ្ងៃ (តាំងពីយប់ថ្ងៃទី០៩ មកម្ល៉េះ) មិនដឹងផង រហូតសាកសពជនរងគ្រោះធុំក្លិនស្អុយអាសោចដល់ផ្ទះប្រជាពលរដ្ឋនិមួយៗ ក្បែរទីតាំងខាងលើ ទើបនាំគ្នាបិទទ្វារផ្ទះរត់ចេញដោយសារតែអត់ទ្រាំមិនបាននឹងក្លិនដ៏អសោចនេះ។
ប្រជាពលរដ្ឋបានឲ្យដឹងទៀតថា នៅវេលាម៉ោង ១១ព្រឹក ថ្ងៃទី១៣ ធ្នូ ២០១៣ ទើបមានសមត្ថិកិច្ចជំនាញការិយាល័យបច្ចេកទេសកោសល្យវិច្ឆ័យពិនិត្យសាកសព គ្រូពេទ្យពិនិត្យសាកសព ចុះទៅដល់កន្លែងកើតហេតុ គ្រាន់តែបានអើតលើមៗ ហើយក៏ឲ្យគេវេចខ្ចប់សាកសពដឹកយកទៅប្រគល់ជូនស្ថានទូតប្រទេសហូឡង់ នៅវត្តក្រោម ស្ថិតនៅសង្កាត់លេខ៣ ក្រុងព្រះសីហនុ ដើម្បីចាត់ការបន្ត៕
ចែករំលែកព័តមាននេះ