ខេត្តកោះកុង ៖ រថយន្តដឹកឥដ្ឋប្រហោងមួយគ្រឿង ក្រឡាប់ផ្ងារពោះនៅលើទ្រូងផ្លូវជាតិលេខ៤៨ ត្រង់ចំណុចអន្ទង់អាំង ស្ថិតក្នុងភូមិជីមាល ឃុំអណ្តូងទឹក ស្រុកបុទុមសាគរ កាលពីវេលាម៉ោង១២ថ្ងៃត្រង់ ថ្ងៃទី៣០ មេសា ។ មន្ត្រីប៉ូលិសនៅកន្លែងកើតហេតុបញ្ជាក់ថា រថយន្តក្រឡាប់ផ្ងារជើងមា៉ក KAMA ផលិតនៅប្រទេសចិន ចំណុះ៤តោន ពណ៌ស ពាក់ស្លាកលេខភ្នំពេញ 3B-956 បើកបរដោយឈ្មោះ ប៉ុល សេង ភេទប្រុស អាយុ៥០ឆ្នាំ មានលំនៅភូមិព្រៃទទឹងឃុំត្រពាំងវែង ស្រុកកណ្តាលស្ទឹង ខេត្តកណ្តាល។
អ្នកបើកបរប្រាប់ថា រថយន្តរបស់គាត់ផ្ទុកឥដ្ឋប្រហោងចំនួន៨.០០០ដុំចេញពីភ្នំពេញ ឆ្ពោះមកកាន់ការដ្ឋានសាងសង់វារីអគ្គិសនីរបស់់ក្រុមហ៊ុនចិន ស្ថិតក្នុងស្រុកថ្មបាំង ពេលមកដល់ចំណុចចុះចំណោតនេះ គាត់មិនបានបន្ថយល្បឿន ទើបពេលរថយន្តបើកចុះលឿនគ្រប់គ្រងមិនបាន បណ្តាលឱ្យក្រឡាប់ផ្ងារជើងតែម្តង ឯអ្នកបើកបរអោបចង្កូតរថយន្តជាប់ របួសក្បាលបន្តិច ។ រថយន្តខាងលើមិនមានខូចខាតអ្វីធ្ងន់ធ្ងរទេហើយសមត្ថកិច្ចហៅរថយន្តស្ទូចមកដឹកយកទៅរក្សាទុកនៅក្នុងអធិការដ្ឋាននគរបាលស្រុកបទុមសាគរ ដើម្បីដោះស្រាយតាមផ្លូវច្បាប់ ៕
ចែករំលែកព័តមាននេះ