រាជធានីភ្នំពេញ ៖ បើតាមប្រធានកិត្តិយសគណបក្សហ្វុ៊នស៊ិនប៉ិច លោកកែវ ពុទ្ធរស្មី ដែលត្រូវជាបុត្រសុណិសាអតីតព្រះមហាក្សត្រព្រះបរមសពសម្តេចឪ ព្រះនរោត្តម សីហនុ បានឲ្យដឹងនៅរសៀលថ្ងៃទី៣ កុម្ភៈ ២០១៣នេះថា តាមកម្មវិធីដែលបានគ្រោងទុក ព្រះរាជពិធីថ្វាយព្រះភ្លើងដល់ព្រះបរមរតនកោដ្ឋ នឹងត្រូវធ្វើឡើងនៅវេលាម៉ោងជាង៦ល្ងាចថ្ងៃទី៤ កុម្ភៈ ស្អែកនេះ ។
គួររំលឹកថា វេលានៅព្រឹកថ្ងៃអាទិត្យ ៨រោច ខែបុស្ស ព.ស២៥៥៦ ត្រូវនឹងថ្ងៃទី៣ កុម្ភៈ ២០១៣ ដែលជាថ្ងៃទី៣ថ្ងៃកាន់មរណទុក្ខសម្តេចឪសម្តេចតា សម្តេចតាទួត ព្រះបរមរតនកោដ្ឋ ប្រជាពលរដ្ឋក្មេងចាស់ ប្រុសស្រីក្នុងសម្លៀកបំពាក់សំពត់ ខោខ្មៅ អាវ.ស មានពាក់បូប្រមាណជា២ម៉ឺននាក់ត្រូវបានបើកឱ្យចូលថ្វាយបង្គំ ព្រះបរមសពព្រះបរមរតនកោដ្ឋ បន្ទាប់ពីដង្ហែព្រះបរមសពចេញពីព្រះបរមរាជវាំងកាលពីថ្ងៃទី១ កុម្ភៈ ២០១៣ មកតម្កល់លើព្រះមហាបញ្ចាក្នុងទីលានព្រះបរមមេរុ ។
ប្រជាពលរដ្ឋដែលបានអនុញ្ញាតឱ្យចូលថ្វាយបង្គំព្រះបរមសព ព្រះបរមរតនកោដ្ឋនោះ គឺប្រជាពលរដ្ឋមកពីខណ្ឌដង្កោ មានជ័យ ពោធិ៍សែនជ័យ សែនសុខ និងឫស្សីកែវ ព្រមទាំងតាមបណ្តាខេត្តនានា ហើយប្រជាពលរដ្ឋទាំងនោះត្រូវបានតម្រង់ជួរចាប់ពីនាគបាញ់ទឹក តាមបណ្តោយវិថីសុធារសរហូតដល់កែងផ្លូវលេខ១៨៤ យ៉ាងណែនតាន់តាប់ ។ ចាប់ពីម៉ោង៧ព្រឹកត្រូវបានអនុញ្ញាតឱ្យចូលតាមលំដាប់លំដោយ លុះដល់ម៉ោងប្រហែលជា៨និង៣០នាទី ស្រាប់តែប្រជាពលរដ្ឋម្នាក់ៗបែរជានាំគ្នាប្រជ្រៀតបាត់សណ្តាប់ ធ្នាប់ បណ្តាលឱ្យកកស្ទះមនុស្សរាប់ពាន់នាក់នៅផ្លូវបំបែកចូលទីលាន ព្រះបរមមេរុផ្នែកខាងត្បូង ។
មន្ត្រីព្រះបរមរាជវាំងមួយរូបដែលមានភារកិច្ចមើលការ ខុសត្រូវចំពោះប្រជាពលរដ្ឋចូលទីលានព្រះបរមមេរុឱ្យដឹងថា នៅពេលព្រឹកម៉ោង៧ប្រជាពលរដ្ឋត្រូវបានឱ្យចូលថ្វាយបង្គំព្រះ បរមរតនកោដ្ឋ ហើយមានរបៀបរៀបរយជា២ជួរល្អប្រសើរ ក៏ប៉ុន្តែនៅវេលាម៉ោងជាង៨ ស្រាប់តែម្នាក់ៗយកឈ្នះរៀងខ្លួននាំគ្នាប្រជ្រៀតបាត់ សណ្តាប់ធ្នាប់រហូតដល់មានមនុស្សសន្លប់យ៉ាងតិច៣នាក់ តែសង្គ្រោះទាន់ពេលវេលា ។
មន្រ្តីព្រះបរមរាជវំាងបានឲ្យដឹងថា ការងារគ្រប់បែបយ៉ាងរាប់ទំាងការបោសសំអាត ការតាក់តែងលំអព្រះមេរុ និងការលាបគំនូសនៅតាមផ្លូវ និងជុំវិញវាលព្រះមេរុបានបញ្ចប់ ក៏ដូចជាការរៀបចំព្រះទីនំាងបុស្បុកសម្រាប់តម្កល់ព្រះបរមសពចប់សព្វគ្រប់ អស់ហើយកាលពីចុងខែមករាមកម្ល៉េះ ។
ជាមួយគ្នានេះដែរ អគ្គស្នងការដ្ឋាននគរបាលជាតិបានបើកកិច្ចប្រជុំ ដើម្បីត្រួតពិនិត្យផែនការការពារសន្តិសុខ និងសណ្ដាប់ធ្នាប់សម្រាប់ព្រះរាជពិធីដង្ហែ តម្កល់ និងថ្វាយព្រះភ្លើងព្រះបរមសពព្រះករុណាព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ក្រោមអធិបតីភាពលោកនេត សាវឿន អគ្គស្នងការនគរបាលជាតិ ។
តាមប្រសាសន៍របស់ លោកឧត្តមសេនីយ៍ឯកគៀត ច័ន្ទថារិទ្ធ ប្រធានសេនាធិការបានឲ្យដឹងថា មកដល់ពេលនេះទាំងកម្លាំងក៏ដូចជាមធ្យោបាយ សម្ភារ បានត្រៀមលក្ខណៈរួចរាល់ហើយ ពិសេសគឺកម្លាំងដែលត្រួវចូលរួមដង្ហែក្បូន គឺបានធ្វើការហ្វឹកហាត់ និងសាកល្បងបានល្អ ។
កម្លាំងអន្តរាគមន៍ កម្លាំងសង្គ្រោះក៏បានត្រៀមលក្ខណៈគ្រប់គ្រាន់ក្នុងការធ្វើអន្តរាគមន៍ នៅពេលដែលមានហេតុការណ៍កើតឡើងជាយថាហេតុ ។ ក្នុងកិច្ចប្រជុំនោះដែរ លោកនាយឧត្តមសេនីយ៍ នេត សាវឿន បានគាំទ្រ និងឯកភាពលើរបាយការណ៍ក្នុងការធ្វើរៀបចំសន្តិសុខ សណ្ដាប់ធ្នាប់ ចរាចរណ៍ដល់យានយន្តដែលត្រូវចូលរួមនៅក្នុងព្រះរាជពិធីបុណ្យ ។
ក្នុងនោះដែរ លោកអគ្គស្នងការនគរបាលជាតិក៏បានណែនាំឲ្យអ្នកដែលទទួលខុសត្រូវទាំងអស់ ត្រូវចុះត្រួតពិនិត្យដោយផ្ទាល់នៅតាមគោលដៅដែលទទួលខុសត្រូវ ។ ដោយឡែកមធ្យោបាយរបស់ប្រជាពលរដ្ឋដែលមកចូលរួម គឺត្រូវរៀបចំចំណតដែលបានកំណត់ និងត្រូវពន្យល់ដល់ប្រជាពលរដ្ឋឲ្យចូលរួមសហការ ដើម្បីឲ្យព្រះរាជពិធីបុណ្យប្រព្រឹត្តទៅប្រកបដោយជោគជ័យ ៕
ចែករំលែកព័តមាននេះ