រាជធានីភ្នំពេញ ៖ បុរសជនជាតិហ្សកដង់ម្នាក់ដេកបែកពពុះមាត់ក្នុងបន្ទប់លេខ៤០១ ជាន់ទី៤ នៅសណ្ឋាគារម៉ូឌែនស៊ីធី ដែលមានទីតាំងលេខ៦៨-០អឺ០ ផ្លូវលេខ១៣៦ សង្កាត់ផ្សារកណ្តាលទី១ ខណ្ឌដូនពេញ កាលពីវេលាម៉ោង១និង៣០នាទីរសៀលថ្ងៃទី១៩ ធ្នូ ២០១២ ហើយត្រូវបានអ្នកគ្រប់គ្រងសណ្ឋាគារដឹកតាមរថយន្តសាមុយបញ្ជូនទៅមន្ទីរពេទ្យកាល់ម៉ែត ដើម្បីសង្គ្រោះជីវិតតែគ្រូពេទ្យប្រាប់ថា ជនរងគ្រោះបានស្លាប់មុនពេលមកដល់មន្ទីរពេទ្យ ។
សមត្ថកិច្ចនិយាយថា បុរសជនជាតិហ្សកដង់ដែលស្លាប់នោះឈ្មោះ FIRASQASIM MJAGHBEER អាយុ២៩ឆ្នាំ កាន់លិខិតឆ្លងដែនលេខអិល៦៦២៨៦០ ជាអ្នកទេសចរចូលមកកម្ពុជាតាមអាកាសយានដ្ឋានអន្តរជាតិភ្នំពេញ ហើយមកស្នាក់នៅសណ្ឋាគារម៉ូឌែនស៊ីធី កាលពីថ្ងៃទី២៨ វិច្ឆិកា ២០១២ ។
មន្ត្រីនគរបាលមួយរូបបានឱ្យដឹងថា នៅវេលាម៉ោង១និង៣០នាទីរសៀលថ្ងៃទី១៩ ធ្នូ ២០១២ មិនឃើញបុរសជនជាតិហ្សកដង់ ចុះមកក្រោមដូចសព្វដងទើបអ្នកបោសសំអាតបន្ទប់យកសោឡើងទៅមើលរួចចាក់សោបន្ទប់លេខ៤០១ជាន់ទី៤ ចូលទៅឃើញបុរសនោះដេកចំហៀង បែរមុខទៅជញ្ជាំង និងមានបែកពពុះមាត់ ។ ភ្លាមៗអ្នកបោសសំអាតបានប្រាប់អ្នកគ្រប់គ្រងសណ្ឋាគារ ហើយត្រូវបានគេទូរស័ព្ទហៅរថយន្តសាមុយមកដឹកបុរសនោះទៅកាន់មន្ទីរពេទ្យកាល់ម៉ែត ដើម្បីសង្គ្រោះជីវិត ក៏ប៉ុន្តែគ្រូពេទ្យប្រចាំនៅមន្ទីរពេទ្យកាល់ម៉ែត បានអះអាងថា បុរសជនជាតិហ្សកដង់នេះបានស្លាប់មុនពេលមកដល់មន្ទីរពេទ្យទៅហើយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ