ខេត្តពោធិ៍សាត់ ៖ ក្មេងប្រុសជំទង់ម្នាក់បានត្រូវប៉ូលិសឃាត់ខ្លួនពីបទចាប់រំលោភកុមារីអាយុ១៣ឆ្នាំបានសម្រេចចំនួន២លើក ។ ករណីនេះបានកើតឡើងកាលពីថ្ងៃទី៦ តុលា វេលាម៉ោង៤ទៀបភ្លឺ នៅឃុំអន្សារចំបក់ ស្រុកក្រគរ ។នាយប៉ុស្តិ៍រដ្ឋបាលអន្សារចំបក់ឱ្យដឹងថា ក្មេងប្រុសដែលជាប់ចោទពីបទចាប់រំលោភនេះមានអាយុ១៤ឆ្នាំ ហើយទាំងក្មេងប្រុស និងក្មេងស្រីរងគ្រោះជាកម្មករត្រីរស់នៅក្នុងផ្ទះថៅកែជាមួយគ្នា ។
ក្មេងស្រីរងគ្រោះបានចោទប្រកាន់ថា ក្មេងប្រុសម្នាក់នេះ បានចាប់នាងរំលោភចំនួនពីរលើកហើយ ។ លើកទី១ កាលពីថ្ងៃទី២០ កញ្ញា វេលាម៉ោង៤ទៀបភ្លឺ ខណៈថៅកែជាម្ចាស់ផ្ទះមិននៅ ជននេះបានលូនចូលក្នុងមុងចាប់នាងរំលោភរហូតបានសម្រេច ។ លើកទី២ នៅថ្ងៃទី៦ តុលា វេលាម៉ោង៤ទៀបភ្លឺដដែល ជននេះក៏បានបើកមុងចូលចាប់នាងរំលោភរហូតបានសម្រេចម្តងទៀត ទើបនាងទៅផ្ទះប្រាប់ម្តាយឱ្យប្តឹងសមត្ថកិច្ចតែម្តង ។
ចំណែកក្មេងប្រុសជាប់ចោទបានសារភាពថា ខ្លួនពិតជាបានចាប់នាងរំលោភមែន ប៉ុន្តែមានតែម្តងទេ ហើយមិនបានសម្រេចទៀត ។ មន្ត្រីប៉ូលិសបញ្ជាក់ថា ទោះរំលោភបានសម្រេចក្តី ឬមិនបានសម្រេចក្តីជនសង្ស័យត្រូវតែមានទោសគ្រាន់តែទោសធ្ងន់ និងស្រាលប៉ុណ្ណោះ ។ ជនជាប់ចោទត្រូវបានបញ្ជូនទៅតុលាការនាព្រឹកថ្ងៃទី៨ តុលា ដើម្បីវិនិច្ឆ័យតាមច្បាប់ ៕
ចែករំលែកព័តមាននេះ