រាជធានីភ្នំពេញ ៖ រថយន្តក្រុងបើកជែងគ្នាជាមួយរថយន្តមែរសឺដេស ពណ៌ទឹកប្រាក់ បណ្តាលឱ្យកៀបជាប់ម៉ូតូគុបមូលមួយគ្រឿងធ្លាក់ស្ត្រីម្នាក់ជិះពីក្រោយដួលបោកក្បាលរបួសធ្ងន់ ឯអ្នកឌុបរងរបួសស្រាល ។ អ្វីដែលគួរឱ្យចាប់អារម្មណ៍នោះ បន្ទាប់ពីបើកជែងគ្នាធ្វើឱ្យកៀបជាប់ម៉ូតូនៅប្រលោះកណ្តាលរួចហើយ បែរជារថយន្តក្រុង និងរថយន្តមែរសឺដេសនោះមិនព្រមទទួលស្គាល់កំហុសរបស់ខ្លួន ដោយចោទប្រកាន់ដាក់គ្នាទៅវិញទៅមក ។ ហេតុការណ៍នេះកើតឡើងកាលពីវេលាម៉ោង៦និង៣០នាទីល្ងាចថ្ងៃទី១ តុលា ២០១២ នៅចំណុចរង្វង់មូលគួចកាណុង លើកំណាត់ផ្លូវលេខ៧០ ក្នុងសង្កាត់ស្រះចក ខណ្ឌដូនពេញ ។
សាក្សីបានឱ្យដឹងថា រថយន្តក្រុងបានបើកជែងគ្នាជាមួយរថយន្តមែរសឺដេស ពណ៌ទឹកប្រាក់ តាមផ្លូវលេខ៧០ ចំណុចរង្វង់មូលគួចកាណុង បណ្តាលឱ្យកៀបជាប់ម៉ូតូគុបមូល ពណ៌ស្លែ ជិះគ្នា២នាក់ ប្រុសម្នាក់ ស្រីម្នាក់ មានដឹកអីវ៉ាន់ផងនោះនៅប្រលោះកណ្តាលធ្វើឱ្យស្ត្រីអ្នកជិះពីក្រោយធ្លាក់ពីលើម៉ូតូដួលបោកក្បាលរងរបួសធ្ងន់ ត្រូវបានបញ្ជូនទៅព្យាបាលនៅមន្ទីរពេទ្យកាល់ម៉ែត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ