រាជធានីភ្នំពេញ ៖ យុវជន២នាក់បានរងរបួសធ្ងន់ ហើយត្រូវបានគេបញ្ជូនទៅមន្ទីរពេទ្យតាមរថយន្តសាមុយ ក្រោយពីជិះម៉ូតូវីវ៉ាទៅបុករថយន្តឡិចស៊ីស RX300 មួយគ្រឿងពេញទំហឹងក្នុងដំណើរស្របទិសគ្នា ហើយរថយន្តបត់ស្តាំមិនមើលមុខក្រោយ ។ ហេតុការណ៍នេះ កើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី ៩ មិថុនា នៅតាមបណ្តោយមហាវិថីសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ ហើយក្រោយពីកើតហេតុ រថយន្តខាងលើបានបើករត់គេចបាត់។
នៅកន្លែងកើតហេតុ មន្ត្រីប៉ូលិសឱ្យដឹងថា រថយន្តឡិចស៊ីស RX300 ធ្វើដំណើរតាមបណ្តោយមហាវិថីសហព័ន្ធរុស្សុី ពីកើតទៅលិច ហើយបានបត់ស្តាំចូលទៅផ្លូវណតប្រ៊ីតដោយមិនបានមើលមុខក្រោយ ។ ចំណែកម៉ូតូស្មាស់ជិះដោយយុវជន២នាក់ក្នុងល្បឿនលឿនស្របទិសគ្នាពីក្រោយ លុះពេលរថយន្តបត់ជាន់ហ្រ្វាំងមិនទាន់ ក៏បុកចំក្បាលរថយន្តខាងស្តាំពេញទំហឹង បណ្តាលឱ្យដួលម៉ូតូបោកក្បាលយុវជនទាំងពីរនាក់ទៅនឹងផ្លូវរងរបួសធ្ងន់ ព្រោះមិនមានពាក់មួកការពារសុវត្ថិភាព ។
មន្ត្រីប៉ូលិសបន្តទៀតថា រថយន្តឡិចស៊ីសបានត្រូវប៉ូលិសដេញតាមទាន់ហើយចាប់ឃាត់ ប៉ុន្តែអ្នកបើកបររថយន្តដែលជាស្រ្តីនៅពេលប៉ូលិសឃាត់ ក៏បម្រុងបុកប៉ូលិសថែមទៀត ព្រោះប៉ូលិសមានតែម្នាក់ឯង ហើយបើកគេចបាត់ តែទោះជាបែបណារថយន្តត្រូវបានប៉ូលិសស្គាល់ស្លាកលេខរួចហើយ ។ ក្រោយពីកើតហេតុម៉ូតូរបស់ជនរងគ្រោះត្រូវបានប៉ូលិសយកទៅរក្សាទុកនៅអធិការដ្ឋានខណ្ឌសែនសុខ ៕
ចែករំលែកព័តមាននេះ