រាជធានីភ្នំពេញ ៖ បុរសម្នាក់បានរងរបួស ធ្ងន់ដោយរថយន្តម៉ាកកូរ៉ូឡា ពណ៌ទឹកប្រាក់មួយគ្រឿងបុកពេញទំហឹងក្នុងខណៈពេលដែលរូបគេកំពុងជិះម៉ូតូតែម្នាក់ឯង ហើយត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ ឯរថយន្តនោះបន្ទាប់ពីបុកម៉ូតូរួចបានរេចង្កូតជ្រុលទៅបុកគំនរឥដ្ឋនៅលើចិញ្ចើមផ្លូវទៀតទើបទៅ មុខលែងរួច ហើយអ្នកបើកបរបានចុះរត់គេចខ្លួនបាត់ស្រមោល ។
ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៩និង៤០នាទីយប់ថ្ងៃទី៦ ឧសភា នៅលើកំណាត់ផ្លូវលេខ២១៧ ហៅផ្លូវចម្ការដូង ត្រង់ចំណុចមុខស្ថានីយប្រេងតេលា ភូមិម័ល សង្កាត់ដង្កោ ខណ្ឌដង្កោ ។ ជនរងគ្រោះឈ្មោះហ៊ុម សុភ័ក្ត្រ ភេទប្រុស អាយុ២៦ឆ្នាំ ជាបុគ្គលិកក្រុមហ៊ុនស្រាបៀរ មានទីលំនៅភូមិរលួស សង្កាត់ស្ពានថ្ម ខណ្ឌដង្កោ ជិះម៉ូតូម៉ាកស៊ុយហ៊្សុយគីស្មាស់រីវ៉ូ ពណ៌ខ្មៅ ។
តាមប្រភពព័ត៌មានបានឱ្យដឹងថា មុនពេលកើតហេតុរថយន្តនិងម៉ូតូបើកបរបញ្ច្រាសទិសគ្នា ដោយម៉ូតូបើកបរពីជើងទៅត្បូង ឯរថយន្តបង្កហេតុបើកបរពីត្បូងទៅជើងក្នុងល្បឿនលឿន ដោយគេពុំដឹងថា អ្នកបើកបរស្រវឹងស្រា ឬបែបណានោះទេ ។ លុះមកដល់ត្រង់ចំណុចកើតហេតុរថយន្តនេះបានរេចង្កូតជ្រុលទៅបុកម៉ូតូពេញទំហឹងបណ្តាលឱ្យជនរងគ្រោះបែកក្បាលនិងបាក់ជើងរបួសធ្ងន់តែម្តង ។ ប្រភពដដែលបានបន្តទៀតថា ក្រោយពេលកើតហេតុរថយន្តនោះមិនមានចេតនាឈប់នោះទេ បានព្យាយាមបើករត់ ហើយក៏រេចង្កូតទៅបុកគំនរឥដ្ឋដែលគេគរនៅលើចិញ្ចើមផ្លូវបណ្តាលឱ្យរងការខូចខាតយ៉ាងដំណំ រួចទើបទៅមុខលែងរួច ។
ក្រោយពេលកើតហេតុអ្នកបើកបររថយន្តកូរ៉ូឡានោះបានបើកទ្វារចុះរត់គេចខ្លួនបាត់ស្រមោលចោលរថយន្ត ហើយប៉ូលិសមូលដ្ឋានបានចុះទៅវាស់វែង និងស្ទូចយករថយន្តនោះទៅរក្សាទុករង់ចាំការដោះស្រាយតាមផ្លូវច្បាប់ ៕
ចែករំលែកព័តមាននេះ