ខេត្តបន្ទាយមានជ័យ ៖ បុរស២នាក់ក្នុងចំណោមគ្នីគ្នា៦នាក់ បាននាំគ្នាផឹកស្រា.សចាប់ពីម៉ោង៨ព្រឹករហូតដល់ម៉ោង៤និង៣០នាទីល្ងាចថ្ងៃទី១៨ មីនា ២០១២ ស្រាប់តែស្លាប់ម្នាក់ និងម្នាក់ទៀតកំពុងសម្រាកព្យាបាលនៅមណ្ឌលសុខភាពស្រះជីក ស្ថិតក្នុងភូមិពង្រ ឃុំប៉ោយចារ ស្រុកភ្នំស្រុក។
លោកវរសេនីយ៍ត្រី ស៊ី ឌី អធិការនគរបាលស្រុកភ្នំស្រុក បានឱ្យដឹងថា បុរសដែលស្លាប់នោះឈ្មោះរាជ ផាក់ អាយុ៥៣ឆ្នាំ និងម្នាក់ទៀតកំពុងសម្រាកព្យាបាលនៅមណ្ឌលសុខភាព ស្រះជីក ឈ្មោះកេតុ ចើន អាយុ៤៩ឆ្នាំ អ្នកទាំងពីររស់នៅភូមិ-ឃុំខាងលើ។ លោកអធិការនគរបាលស្រុកបានបន្តថា នៅថ្ងៃកើតហេតុបុរសនៅក្នុងភូមិពង្រចំនួនពី៥ទៅ៦នាក់ បាននាំគ្នាផឹកស្រា.សមិនដឹងជាអស់ប៉ុន្មានលីត្រនោះទេ គឺពួកគេចាប់ផ្តើមផឹកពីម៉ោង៨ព្រឹករហូតដល់ម៉ោង៤និង៣០នាទីល្ងាច ទើបចប់កម្មវិធីបែកផ្លូវគ្នាទៅដេករៀងៗខ្លួន តែបុរសឈ្មោះរាជ ផាក់ បានដេកស្លាប់ និងបុរសឈ្មោះកេតុ ចើន កំពុងស្ថិតក្នុងការព្យាបាល ប៉ុន្តែក្រៅពីនោះពុំមាននរណាគេមានបញ្ហានោះឡើយ ។
លោកស៊ី ឌី បានបញ្ជាក់បន្ថែមទៀតថា ជនដែលស្លាប់និងកំពុងព្យាបាលនេះ មិនមែនបណ្តាលមកពីពុលស្រា.សនោះទេ គឺបណ្តាលមកពីពួកគាត់ផឹកស្រាច្រើន ហើយជាប្រចាំទៀតម្យ៉ាងប្រសិនជាស្រា.សនោះមានជាតិពុល មិនមែនរងគ្រោះតែ២នាក់នោះទេ ៕
ចែករំលែកព័តមាននេះ