រាជធានីភ្នំពេញ ៖ កាលពីថ្ងៃទី២៥ មករា លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានដឹកនាំក្រុមគ្រូពេទ្យស្ម័គ្រចិត្តប្រមាណជាង២០០នាក់ ចុះជួយពិនិត្យនិងព្យាបាលជំងឺច្រមុះ បំពង់ក ត្រចៀក និងភ្នែក ដល់ប្រជាពលរដ្ឋក្រីក្រ ដោយឥតគិតថ្លៃ ដែលពិធីនេះបានព្រឹត្តធ្វើឡើងនៅមណ្ឌលសុខភាពព្រែកព្នៅ សង្កាត់ព្រែកព្នៅ ខណ្ឌសែនសុខ ។
លោកវេជ្ជបណ្ឌិត លូ លីឃាង ប្រធានមន្ទីរពេទ្យព្រះអង្គឌួងបានថ្លែងថា ការចុះជួយពិនិត្យនិងព្យាបាលជំងឺភ្នែក ត្រចៀក ច្រមុះ និងបំពង់ក ដល់ប្រជាពលរដ្ឋក្រីក្រដោយឥតគិតថ្លៃនៅពេលនេះ គឺធ្វើឡើងក្រោមកិច្ចសហការគ្នារវាងមន្ទីរពេទ្យព្រះអង្គឌួង និងមន្ទីរសុខាភិបាលរាជធានីភ្នំពេញ ហើយនិងអង្គការអ៊ីមផេកផងដែរ ។ មន្ទីរពេទ្យព្រះអង្គឌួង តែងតែសហការជាមួយមន្ទីរសុខាភិបាល ចុះជួយពិនិត្យព្យាបាលជំងឺភ្នែកត្រចៀក ច្រមុះ និងបំពង់ក ដល់ប្រជាពលរដ្ឋក្រីក្រ ក្នុងរាជធានីភ្នំពេញ ។ ដោយឡែកសម្រាប់ខណ្ឌសែនសុខ សកម្មភាពចុះជួយព្យាបាលបែបនេះតែងតែធ្វើឡើងជារៀងរាល់ខែនៅតាមមណ្ឌលសុខភាពនានារយៈពេលមួយខែម្តង ។
លោកសុខ សុគន្ធ ប្រធានមន្ទីរសុខាភិបាលរាជធានីភ្នំពេញ បានឱ្យដឹងថា គ្រូពេទ្យស្ម័គ្រចិត្តនៅក្នុងរាជធានីភ្នំពេញ ត្រូវបានបង្កើតឡើងក្នុងឆ្នាំ២០០៩ ដើម្បីចុះពិនិត្យព្យាបាលជំងឺទូទៅជូនដល់ប្រជាពលរដ្ឋក្រីក្រ នៅតាមសហគមន៍ក្រីក្រក្នុងរាជធានី ដោយក្នុងមួយលើកៗការពិនិត្យព្យាបាលជូនប្រជាជនមានចាប់ពី២០០នាក់ទៅ៣០០នាក់ ។ ក្រៅពីនេះ នៅមានករណីស្រាវជ្រាវរកជំងឺធ្ងន់ធ្ងរដូចជា ជំងឺរបេងជាដើម ដើម្បីជូនពួកគាត់ឱ្យទៅធ្វើរោគវិនិច្ឆ័យ និងព្យាបាលឱ្យបានទាន់ពេលវេលា ។ ក្រុមគ្រូពេទ្យស្ម័គ្រចិត្តនៅប្រទេសកម្ពុជាបច្ចុប្បន្នមាន៥ក្រុមដែល
បង្កើតឡើងដោយក្រសួងសុខាភិបាល និងសាលារាជធានីភ្នំពេញ ដើម្បីជួយព្យាបាលដល់ប្រជាពលរដ្ឋក្រីក្រ និងរួមចំណែកកាត់បន្ថយភាពក្រីក្រ ។
លោករដ្ឋមន្ត្រី ម៉ម ប៊ុនហេង បានថ្លែងថា ដោយមានការយកចិត្តទុកដាក់ពីសំណាក់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន និងមានការចូលរួមពីអង្គការអ៊ីមផេក ផងនោះ កម្មវិធីចុះជួយពិនិត្យ និងព្យាបាលជំងឺភ្នែក ច្រមុះត្រចៀក និងបំពង់ក ដល់ប្រជាពលរដ្ឋក្រីក្រ ត្រូវបានបង្កើតឡើង ។ ចំពោះអ្នកជំងឺដែលធ្ងន់ធ្ងរ កម្មវិធីនឹងបញ្ជូនឱ្យទៅទទួលការព្យាបាលនៅមន្ទីរពេទ្យដោយឥតគិតថ្លៃ ពីព្រោះមានអង្គការអីុមផេកជាអ្នកចេញថ្លៃសេវាឱ្យហើយ ៕
ចែករំលែកព័តមាននេះ