រាជធានីភ្នំពេញ ៖ ខ្សែវីដេអូដែលផលិតដោយអង្គការ BBC Media Action បានទទួលចំណាប់អារម្មណ៍យ៉ាងខ្លាំងនៅលើប្រព័ន្ធអ៊ីនធើរណេត ។ នៅក្នុងរយៈពេលតែបួនថ្ងៃតែប៉ុណ្ណោះ វីដេអូភ្លេងឡូយ៩បានទាញចំណាប់អារម្មណ៍អ្នកទស្សនាចំនួនជាង១០.០០០នាក់ នៅគេហទំព័រ youtube និងបានជំរុញឱ្យមានការជជែកពិភាក្សានៅលើគេហទំព័រ face-book ។
ចម្រៀងមួយបទដែលច្រៀងដោយកញ្ញាមាស សុខសោភា និងឌីជេ ឃ្លាំង រួមទាំងតារាល្បីៗ ដែលកំពុងពេញនិយមនៅក្នុងព្រះរាជាណាចក្រកម្ពុជា ដើម្បីផ្សព្វផ្សាយកម្មវិធីឡូយ៩ ដែលជាយុទ្ធនាការនៃប្រព័ន្ធផ្សព្វផ្សាយដ៏ធំមួយ ដើម្បីជំរុញឱ្យមានការចូលរួមរបស់យុវជននៅក្នុងកិច្ចការសង្គម ។
«នៅក្នុងប្រទេសកម្ពុជា មានអ្នកប្រើប្រាស់ facebook ជិតកន្លះលាននាក់ធ្វើការប្រាស័យទាក់ទងគ្នាតាមប្រព័ន្ធផ្សព្វផ្សាយសង្គម និង
ប្រព័ន្ធអ៊ីនធើរណេត ដែលដើរតួនាទីយ៉ាងសំខាន់នៅក្នុងការរៀបចំយុទ្ធនាការផ្សព្វផ្សាយ» នេះបើតាមប្រសាសន៍របស់លោក Colin Spurway ដែលជានាយកគម្រោងរបស់អង្គការ BBC Media Action ។
«បើទោះបីជាការប្រើប្រាស់ប្រព័ន្ធអ៊ីនធើរណេតក្នុងប្រទេសកម្ពុជានៅមានកម្រិតទាបនៅឡើយ ផ្អែកតាមការស្រាវជ្រាវរបស់អង្គការ BBC Media Action មានមនុស្សចំនួន៦ភាគរយប៉ុណ្ណោះ ដែលប្រើប្រាស់ប្រព័ន្ធអ៊ីនធើរណេត ។ ចំនួននេះគឺមានការកើនឡើងទ្វេដងក្នុងរយៈពេលមួយឆ្នាំតែប៉ុណ្ណោះ ហើយបើតាមការទស្សន៍ទាយចំនួននេះនឹងមានការកើនឡើងជាបន្តទៀត ។ អ្នកចូលរួមដំបូង គឺមានសារសំខាន់ណាស់សម្រាប់កម្មវិធីរបស់យើង ។ ប្រព័ន្ធអ៊ីនធើរណេត នឹងក្លាយជាមធ្យោបាយដ៏សំខាន់មួយសម្រាប់ឱ្យយុវជនចូលរួមនាពេលអនាគតនៅក្នុងប្រទេសកម្ពុជា» ។
យុទ្ធនាការតាមទូរទស្សន៍ វិទ្យុ និងអីុនធើរណេត បានសម្ពោធឡើងនៅសប្តាហ៍នេះ និងធ្វើការផ្សព្វផ្សាយរហូតដល់ខែកក្កដា ឆ្នាំ២០១៣ ។
ការផ្តួចផ្តើមគម្រោងនេះត្រូវបាជំនួយឧបត្ថម្ភពីកម្មវិធីអភិវឌ្ឍន៍សហប្រជាជាតិ (UNDP) ។
អង្គការ BBC Media Action ជាអង្គការអភិវឌ្ឍន៍មនុស្សធម៌អន្តរជាតិរបស់ BBC ។ យើងជឿជាក់ថា ព័ត៌មានអាចទាក់ទាញ និងគាំទ្របុគ្គល និងផ្លាស់ប្តូរសង្គម ។ យើងធ្វើការជាមួយព័ត៌មាន ដើម្បីជួយកាត់បន្ថយភាពក្រីក្រ និងលើកស្ទួយសិទ្ធិមនុស្សនៅជុំវិញពិភពលោក ។ ព័ត៌មានជួយកាត់បន្ថយភាពក្រីក្រ និងលើកស្ទួយសិទ្ធិមនុស្សនៅជុំវិញពិភពលោក ។ ព័ត៌មានជួយមនុស្សឱ្យយល់ពីព្រឹត្តិការណ៍ ចូលរួមក្នុងការពិភាក្សា និងកំណត់ទិសដៅជីវិតរបស់ខ្លួន ។ ប៉ុន្តែមនុស្សរាប់លាននាក់នៅតែខ្វះខាតសិទ្ធិទទួលបានព័ត៌មានដោយសេរីដែលអាចទុកចិត្តបាន និងជាក់ស្តែង ។ យើងធ្វើការជាមួយដៃគូក្នុងស្រុក ដើម្បីជួយជនក្រីក្រ និងជនងាយរងគ្រោះ ដើម្បីទទួលបានសិទ្ធិរបស់ខ្លួនបង្កើនជម្រើសរបស់ពួកគេ និងរស់នៅឱ្យកាន់តែមានសុខុមាលភាព ។ យើងជួយមនុស្សក្នុងការបញ្ចេញមតិ និងធ្វើឱ្យអ្នកដឹកនាំរបស់ពួកគេ មានការទទួលខុសត្រូវ ។ គោលបំណងគឺជូនព័ត៌មានពាក់ព័ន្ធ និងឱ្យមនុស្សទូទាំងពិភពលោកចូលរួម ៕
ចែករំលែកព័តមាននេះ